ନୂଆଦିଲ୍ଲୀ: ଏକ ଲୋକ କଥା ରହିଛି 'ଶତ୍ରୁର ଶତ୍ରୁ ମିତ୍ର' । ଚୀନ ସହ ସମ୍ପର୍କ ଅଧିକ ଖରାପ ହେବା ଭିତରେ ଆମେରିକା ଏବେ ଭାରତକୁ କିଛି ଏପରି ଭୂମିକାରେ ଦେଖୁଛି । ଆମେରିକା ନୌସେନାର ଅପରେଶନାଲ ହେଡ୍ ଆଡନିରାଲ ମାଇକ ଗିଲ୍ଡେଙ୍କ ଏକ ବୟାନରୁ ଏହା ପ୍ରମାଣିତ ହେଉଛି । ଆମେରିକା ନୌସେନାର ବଡ଼ ଅଧିକାରୀ ମାଇକ ଗିଲ୍ଡେ କହିଛନ୍ତି, ଭବିଷ୍ୟତରେ ଚୀନକୁ କାଉଣ୍ଟର କରିବାରେ ଭାରତ ଆମେରିକାର ଏକ ବଡ଼ ସହଯୋଗୀ ହେବ। ୱାଶିଂଟନରେ ଆୟୋଜିତ ଏକ କାର୍ଯ୍ୟକ୍ରମରେ ଗିଲ୍ଡେ ଏହି ବୟାନ ଦେଇଛନ୍ତି ।
ଉଲ୍ଲେଖଯୋଗ୍ୟ ଯେ, ନିକଟ ଅତୀତରେ ଚୀନ ଏବଂ ଆମେରିକା ମଧ୍ୟରେ ବିବାଦ ଅଧିକ ଘନିଭୂତ ହୋଇଛି । ପ୍ରଥମେ ଆମେରିକା ପ୍ରତିନିଧି ସଭାର ଅଧ୍ୟକ୍ଷ ନାନ୍ସି ପେଲୋସି ଏବଂ ପରେ ଆମେରିକା କଂଗ୍ରେସର ସାଂସଦ ତାଇୱାନ ଗସ୍ତ କରିଥିଲେ । ଚୀନକୁ ଏହାକୁ ନେଇ କଡା ଅପତ୍ତି ଉଠାଇଥିଲା । ଏହାସହ ଏହାକୁ ନିଜ ସାର୍ବଭୌମତ୍ୱ ପ୍ରତି ବିପଦ କହି ଆମେରିକାକୁ ଭୟଙ୍କର ପରିଣାମ ଭୋଗିବାର ଚେତାବନୀ ଦେଇଥିଲା।
ଆମେରିକା ନୌସେନାର ଶୀର୍ଷ ଅଧିକାରୀ ମାଇକ ଗିଲ୍ଡେ କହିଛନ୍ତି, ଚୀନକୁ ଅଟକାଇବା ପାଇଁ ଜାପାନ ଏବଂ ଭାରତ ରୂପରେ ଦୁଇ ପ୍ରତରୋଧ ଅଛନ୍ତି । ସେ କହିଛନ୍ତି, ଯଦି ତାଇୱନକୁ ନେଇ ଚୀନ ମନ୍ଦ ଉଦ୍ଦେଶ୍ୟ ରଖେ ତେବେ ଭାରତ ଏବଂ ଜାପାନ ତାକୁ ବିରୋଧ କରିବାରେ ବଡ଼ ଭୂମିକା ଗ୍ରହଣ କରିବେ । ମାଇକ ଗିଲ୍ଡେ ଭାରତକୁ ପ୍ରଶଂସା କରି କହିଛନ୍ତି, 'ମୁଁ ଅନ୍ୟ କୌଣସି ଦେଶ ତୁଳନାରେ ଅଧିକ ଥର ଭାରତ ଯାଇଛି । ଏହି କାରଣରୁ ମୋର ବିଶ୍ୱାସ ଭବିଷ୍ୟତରେ ଭାରତ ଆମ ପାଇଁ ଏକ ବଡ଼ ରଣନୈତିକ ସହଯୋଗୀ ହେବ। ଏହାସହ ଭାରତ ଏବଂ ଚୀନ ସୀମାରେ ସ୍ଥିତି ସାମାନ୍ୟ ନାହିଁ ଏବଂ ଏହା ରଣନୈତିକ ଦୃଷ୍ଟିରୁ ଆମ ପାଇଁ ଅତି ଗୁରୁତ୍ୱପୂର୍ଣ୍ଣ ହୋଇପାରେ'।
