ୱାଶିଂଟନ୍: ଯୁଦ୍ଧ ଆରମ୍ଭରୁ ଇସ୍ରାଏଲକୁ ସମର୍ଥନ ଜଣାଇଥିଲା ଭାରତ। ସେହିପରି ଜାତିସଂଘରେ ଆଗତ ହୋଇଥିବା ଅସ୍ତ୍ରବିରତି ପ୍ରସ୍ତାବରେ ଭୋଟ୍ ଦେବାରୁ ଦୂରେଇ ରହିଥିଲା ଭାରତ। ଆଉ ଏବେ ବଦଳିଲା ଭାରତର ଆଭିମୁଖ୍ୟ। ପାଲେଷ୍ଟାଇନ ଅଞ୍ଚଳରେ ଇସ୍ରାଏଲ୍ ବସତି ନିର୍ମାଣ ବିରୋଧରେ ଭୋଟ୍ ଦେଇଛି ଭାରତ।
ଇସ୍ରାଏଲର ପାଲେଷ୍ଟାଇନ ଅଞ୍ଚଳ ଦଖଲ କରିବାକୁ ନିନ୍ଦା କରି ଏକ ସଂକଳ୍ପ ଉପସ୍ଥାପନ କରିଥିଲା ମିଳିତ ଜାତିସଂଘ, ଯାହାକୁ ସମର୍ଥନ କରିଛି ଭାରତ। ପୂର୍ବ ଜେରୁଜେଲମ୍ ଏବଂ ସିରିଆ ଗୋଲାନ୍ ସମେତ ଅଧିକୃତ ପାଲେଷ୍ଟାଇନ ଅଞ୍ଚଳରେ ଇସ୍ରାଏଲ୍ ବସତିକୁ ନିନ୍ଦା କରୁଥିବା ଏହି ସଂକଳ୍ପକୁ ଭାରତ ସମେତ ୧୪୫ ଦେଶ ସମର୍ଥନ କରିଥିଲେ।
ଇସ୍ରାଏଲ୍ ବ୍ୟତୀତ ମାତ୍ର ୬ଟି ଦେଶ କାନାଡା, ହଙ୍ଗେରୀ, ମାର୍ଶଲ ଦ୍ୱୀପପୁଞ୍ଜ, ମାଇକ୍ରୋନେସିଆ, ନାଉରୁ ଏବଂ ଆମେରିକା ମିଳିତ ଜାତିସଂଘର ନିଷ୍ପତ୍ତିକୁ ସମର୍ଥନ କରିନଥିଲେ ଅର୍ଥାତ୍ ବିପକ୍ଷରେ ଭୋଟ୍ ଦେଇଥିଲେ। ଏହା ବ୍ୟତୀତ ୧୮ଟି ଦେଶ ଭୋଟ୍ ସମୟରେ ଅନୁପସ୍ଥିତ ରହିଥିଲେ।
ଗତ ମାସରେ ଜୋର୍ଡାନ ପକ୍ଷରୁ ମିଳିତ ଜାତିସଂଘରେ ଏକ ପ୍ରସ୍ତାବ ଆଣିଥିଲା ଯେଉଁଥିରେ ଗାଜାରେ ଯୁଦ୍ଧକୁ ତୁରନ୍ତ ବନ୍ଦ କରିବାକୁ ଦାବି କରାଯାଇଥିଲା। ଏହି ସଂକଳ୍ପ ମଧ୍ୟ ବହୁ ସଂଖ୍ୟାରେ ପାରିତ ହୋଇଥିଲା କିନ୍ତୁ ଭାରତ ଏଥିରୁ ଦୂରେଇ ରହିଥିଲା ଜାତିସଂଘରେ ଜୋର୍ଡାନ ଆଣିଥିବା ସଂକଳ୍ପକୁ ୧୨୦ ଦେଶ ସମର୍ଥନ କରି ଭୋଟ୍ ଦେଇଥିଲେ ଏବଂ ୧୪ଟି ଦେଶ ଏହାକୁ ବିରୋଧ କରିଥିଲେ। ୪୫ଟି ଦେଶ ମତଦାନରୁ ନିବୃତ୍ତ ରହିଥିଲେ। ଯେଉଁଥିରେ ଭାରତ ମଧ୍ୟ ସାମିଲ ଥିଲା।
ଜୋର୍ଡାନର ପ୍ରସ୍ତାବରୁ ନିଜକୁ ଦୂରେଇ ରଖିଥିବା ଭାରତର ଆଭିମୁଖ୍ୟ ସ୍ପଷ୍ଟ ଭାବରେ ଇସ୍ରାଏଲ ସପକ୍ଷରେ ବିବେଚନା କରାଯାଉଥିଲା, କିନ୍ତୁ ବର୍ତ୍ତମାନ ଭାରତ ଏହାର ରଣନୀତି ବଦଳାଇ ପାଲେଷ୍ଟାଇନକୁ ସମର୍ଥନ କରିଛି। ଅନେକ ବିରୋଧୀ ଦଳ ମଧ୍ୟ ଭାରତ ସରକାରଙ୍କ ଷ୍ଟାଣ୍ଡକୁ ପ୍ରଶଂସା କରିଛନ୍ତି। ଟିଏମସି ସାଂସଦ ସାକେଟ ଗୋଖଲେ କହିଛନ୍ତି ଯେ ବସ୍ତିବାସିନ୍ଦାଙ୍କ ମାଧ୍ୟମରେ ଇସ୍ରାଏଲର ପାଲେଷ୍ଟାଇନ ଦଖଲ କରିବା ବେଆଇନ ଅଟେ। ଭାରତର ଏହି ପଦକ୍ଷେପ ପ୍ରଶଂସନୀୟ।
