ନୂଆଦିଲ୍ଲୀ ୩।୫: ଭାରତ ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ପାକିସ୍ତାନ ସହ ସବୁପ୍ରକାର ଡାକ ଓ ପାର୍ସଲ ସେବା ଉପରେ ରୋକ ଲଗାଇ ଦେଇଛନ୍ତି। ଏହି ନିଷ୍ପତ୍ତି ଉଭୟ ଆକାଶ ଓ ଭୂ ଭାଗରେ ଲାଗୁ ହେବ। ଶନିବାର ଭାରତ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଏଥିରେ ପାକିସ୍ତାନରୁ ସବୁ ପ୍ରକାର ଆମଦାନୀ ଉପରେ ରୋକ ଲାଗିଥିବା ବେଳେ ପାକିସ୍ତାନୀ ପତାକା ଲଗା ଜାହାଜଙ୍କ ଭାରତୀୟ ବନ୍ଦର ପ୍ରବେଶ ଉପରେ ରୋକ ଲାଗିଛି।
ଏବେ ଭାରତୀୟ ଡାକ ବିଭାଗ ଦ୍ୱାରା ଜାରି ଏକ ସର୍ବସାଧାରଣ ନୋଟିସ୍ ରେ କୁହାଯାଇଛି ଯେ ‘ଭାରତ ସରକାର ଆକାଶ ଓ ଭୂ-ଭାଗରେ ପାକିସ୍ତାନରୁ ଆସୁଥିବା ସବୁ ଶ୍ରେଣୀର ମେଲ୍ ଓ ପାର୍ସଲ ଆଦାନ ପ୍ରଦାନ ନିଲମ୍ବିତ କରିବାକୁ ନିଷ୍ପତ୍ତି ନେଇଛନ୍ତି’। ଭାରତ ଓ ପାକିସ୍ତାନ ମଧ୍ୟରେ ଡାକସେବା ଦୀର୍ଘ ସମୟରୁ ସୀମିତ ଥିଲା। ୨୦୧୯ରେ ଜମ୍ମୁ-କାଶ୍ମୀରରୁ ଧାରା ୩୭୦ ହଟିବା ପରେ କିଛିସମୟ ପାଇଁ ପାକିସ୍ତାନ ନିଜ ପଟରୁ ଡାକ ସେବା ନିଲମ୍ବନ କରିଥିଲା। ତେବେ ୩ ମାସ ପରେ ଏହା ପୁଣି ଆରମ୍ଭ ହୋଇଯାଇଥିଲା।
ଏବେ ଭାରତ ସରକାର ଉତ୍ତେଜନାପୂର୍ଣ୍ଣ ପରିସ୍ଥିତିରେ ସବୁପ୍ରକାର ଡାକ ଓ ପାର୍ସଲ ସେବାକୁ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ଭାରତ ସରକାରଙ୍କ ଏହି ନିଷ୍ପତ୍ତି ପରେ ଦୁଇ ଦେଶଙ୍କ ମଧ୍ୟରେ ପତ୍ରାଚାର ସମେତ ବ୍ୟବସାୟୀକ ଡାକ ଓ ବ୍ୟକ୍ତିଗତ ପାର୍ସଲ ଆଦାନପ୍ରଦାନ ସମ୍ପୂର୍ଣ୍ଣ ବନ୍ଦ ହୋଇଯିବ। ବିଶେଷଜ୍ଞଙ୍କ ଅନୁସାରେ ଏହା ଦ୍ୱାରା ସେପରି ଲୋକେ ଅଧିକ ପ୍ରଭାବିତ ହେବେ ଯେଉଁମାନଙ୍କର ଦୁଇ ଦେଶଙ୍କ ମଧ୍ୟରେ ପାରିବାରିକ ଓ ବ୍ୟାପାରିକ ପତ୍ରାଚାର ଥିଲା। ଏହା ଛଡା ଏହି ନିଷ୍ପତ୍ତି ପାକିସ୍ତାନ ଅର୍ଥ ବ୍ୟବସ୍ଥାକୁ ମଧ୍ୟ ପ୍ରଭାବିତ କରିବ। କାରଣ ଭାରତରୁ ଆମଦାନୀ ହେଉଥିବା କିଛି ସାମଗ୍ରୀର ପରିବହନ ଡାକ ସେବା ମାଧ୍ୟମରେ ହେଉଥିଲା।
