ନୂଆଦିଲ୍ଲୀ: ପେଟ୍ରୋଲ ଏବଂ ଡିଜେଲ ମୂଲ୍ୟରେ ଖୁବଶୀଘ୍ର ଲୋକଙ୍କୁ ଆଶ୍ୱସ୍ତି ମିଳିପାରେ । ଭାରତ ସରକାର କିଛି ଉତ୍ପାଦ ଉପରୁ ଟ୍ୟାକ୍ସ ହ୍ରାସ କରିପାରନ୍ତି । ଖୁଚୁରା ମୁଦ୍ରାସ୍ଫୀତିକୁ କମ କରିବା ପାଇଁ ଆରବିଆଇ ଦ୍ୱାରା କରାଯାଇଥିବା ସୁପାରିଶ ଉପରେ ସରକାର ନିଷ୍ପତ୍ତି ନେଇପାରନ୍ତି । ସରକାର ମକା (MAIZE) ଏବଂ ଫ୍ୟୁଏଲ ଉପରୁ ଟିକସ ହ୍ରାସ କରିପାରନ୍ତି । ନ୍ୟୁଜ ଏଜେନ୍ସି ରୟଟର୍ସର ସୂତ୍ରକୁ ଆଧାର ପ୍ରକାଶ କରିଥିବା ରିପୋର୍ଟ ଏହା ଜଣାପଡିଛି । ତେବେ ଫେବ୍ରୁଆରୀର ଦରବୃଦ୍ଧି ହାର ସାମନାକୁ ଆସିବା ପରେ ହିଁ ସରକାର କୌଣସି ନିଷ୍ପତ୍ତି ଗ୍ରହଣ କରିବେ । ଜାନୁଆରୀରେ ଭାରତର ମୁଦ୍ରାସ୍ଫୀତି ହାର ୬.୫୨ ପ୍ରତିଶତ ରହିଥିଲା । ୨୦୨୨ ଡିସେମ୍ୱରରେ ଏହା ୫.୭୨ ପ୍ରତିଶତ ଥିଲା ।
ବିଶେଷଜ୍ଞଙ୍କ କହିବା ଅନୁସାରେ, ଖାଦ୍ୟ ମୁଦ୍ରାସ୍ଫୀତି ହାର ଉଚ୍ଚ ରହିପାରେ । ଦୁଗ୍ଧ, ମକା ଏବଂ ସୋଆବିନ ତେଲର ମୂଲ୍ୟ ଆସନ୍ତା ସମୟରେ ଦରବୃଦ୍ଧି ଚିନ୍ତାକୁ ଆହୁରି ଅଧିକ କରିପାରେ । ଏହାକୁ ଦୃଷ୍ଟିରେ ରଖି ସରକାର ମକା ପରି ଖାଦ୍ୟ ଉତ୍ପାଦ ଉପରୁ ଶୁଳ୍କ ହ୍ରାସ କରିବା ଉପରେ ବିଚାର କରୁଛନ୍ତି । ଏହା ଉପରେ ବର୍ତ୍ତମାନ ସମୟରେ ୬୦ ପ୍ରତିଶତ ବେସିକ ଡ୍ୟୁଟି ରହିଛି । ତେବେ ଅର୍ଥ ମନ୍ତ୍ରାଳୟ କିମ୍ୱା ଆରବିଆଇ ପକ୍ଷରୁ ବର୍ତ୍ତମାନ ସୁଦ୍ଧା ଏହା ଉପରେ ପ୍ରତିକ୍ରିୟା ରଖିନାହାନ୍ତି ।
ପେଟ୍ରୋଲ-ଡିଜେଲ ଉପରୁ ମଧ୍ୟ ଟ୍ୟାକ୍ସ ହ୍ରାସ ହୋଇପାରେ । ଅଶୋଧିତ ତୈଳର ବୈଶ୍ୱିକ ମୂଲ୍ୟରେ ଗତ ମାସରେ ହ୍ରାସ ଘଟିଛି ଏବଂ ଏବେ ଏହା ସ୍ଥିର ହୋଇ ରହିଛି । ବୁଧବାର ଅପରାହ୍ଣରେ ବ୍ରେଣ୍ଟ ଅଏଲ ଫ୍ୟୁଚର୍ସ ହ୍ରାସ ସହ ୮୪.୩୨ ଡଲାର ପ୍ରତି ବ୍ୟାରେଲ ବ୍ୟବସାୟ କରୁଥିଲା । ତୈଳ କମ୍ପାନି ଗୁଡିକ ଏହାର ଲାଭ ବର୍ତ୍ତମାନ ସୁଦ୍ଧା ଗ୍ରହାକଙ୍କୁ ଦେଇ ନାହାନ୍ତି, କିମ୍ୱା ନିଜର ପୁରୁଣା କ୍ଷତିକୁ ଭରଣା କରିବାରେ ଲାଗିଛନ୍ତି ।
ଭାରତ ନିଜ ଆବଶ୍ୟକତାର ଦୁଇ-ତୃତୀୟାଂଶରୁ ଅଧିକ ଆମଦାନୀ କରିଥାଏ । କେନ୍ଦ୍ର ସରକାରଙ୍କ ଦ୍ୱାରା ଟ୍ୟାକ୍ସରେ ହ୍ରାସ କରାଯିବା ପରେ ପମ୍ପ ପରିଚାଳକଙ୍କ ଉପରେ ଗ୍ରାହକଙ୍କ ପାଇଁ ମୂଲ୍ୟ ହ୍ରାସ ନେଇ ଚାପ ପଡିବ । ଏହାଦ୍ୱାରା ଦରବୃଦ୍ଧି ହାରରୁ ହ୍ରାସ କରିବାରେ ସହାୟତା ମିଳିବ ।