ନୂଆଦିଲ୍ଲୀ,୦୩/୦୩: ଭାରତ ପାଇଁ ଖୁସି ଖବର । ଗରିବୀରୁ ବାହାରୁଛି ଦେଶ । ଭାରତରେ ଆଉ ଅତି ଗରିବ ନାହାନ୍ତି । ଆମେରିକୀୟ ଥିଙ୍କ୍ ଟ୍ୟାଙ୍କ୍ ବ୍ରୁକିଙ୍ଗ୍ସ ରିପୋର୍ଟରେ ତଥ୍ୟ ପ୍ରକାଶ ପାଇଛି । ରିପୋର୍ଟ ଅନୁସାରେ, ଦେଶ ଏବେ ଅତି ଗରିବୀରୁ ସମ୍ପୂର୍ଣ୍ଣ ରୂପେ ବାହାରିଯାଇଛି । ଭାରତରେ ଦାରିଦ୍ର୍ୟଙ୍କ ସଂଖ୍ୟାରେ ବି ଲଗାତର ହ୍ରାସ ପାଉଛି ।
ସୁରଜିତ ଭଲ୍ଲା ଏବଂ କରଣ ଭାସିନ୍ଙ୍କ ଦ୍ୱାରା ପ୍ରସ୍ତୁତ ଏହି ରିପୋର୍ଟରେ କୁହାଯାଇଛି ଯେ, ଏହା ସରକାରଙ୍କ ମଜଭୁତ ନୀତିର ଫଳ । ସରକାରଙ୍କ ବିଭିନ୍ନ ବିକାଶମୂଳକ କାର୍ଯ୍ୟକ୍ରମ ଯୋଗୁ ଗତ ଦଶନ୍ଧିରେ ଭାରତ ଦ୍ରୁତ ବେଗରେ ଉନ୍ନତି କରିଛି ଏବଂ ଆତି ଗରିବୀରୁ ବାହାରି ଆସିଛି ଦେଶ ।
ଭାରତ ଇତିମଧ୍ୟରେ ୨୦୨୨-୨୩ ପାଇଁ ଏହାର ‘କଞ୍ଜମ୍ପସନ୍ ଏକ୍ସପେଣ୍ଡିଚର ଡାଟା’ ଜାରି କରିଛି । ତଥ୍ୟ ଅନୁସାରେ, ୨୦୧୧-୧୨ ତୁଳନାରେ ୨୦୨୨-୨୩ରେ ବ୍ୟକ୍ତି ପିଛା ଘରୋଇ ମାସିକ ଖର୍ଚ୍ଚ ଦୁଇଗୁଣାରୁ ଅଧିକ ବଢ଼ିଛି । ଚଳନ୍ତି ଦରରେ ୨୦୧୧-୧୨ରୁ ଗ୍ରାମାଞ୍ଚଳରେ ମାସିକ ମୁଣ୍ଡ ପିଛା ବ୍ୟୟ ୧୬୪% ବୃଦ୍ଧି ପାଇଛି । ୨୦୧୧-୧୨ରେ ଏହା ୧,୪୩୦ ଟଙ୍କା ଥିବାବେଳେ ୨୦୨୨-୨୩ରେ ୩, ୭୭୩ ଟଙ୍କାକୁ ବୃଦ୍ଧି ପାଇଛି । ସେହିଭଳି ସହରାଞ୍ଚଳରେ ଏହା ୨,୬୩୦ ଟଙ୍କାରୁ ୬,୪୫୯ ଟଙ୍କାକୁ ବୃଦ୍ଧି ପାଇଛି ।
ରିପୋର୍ଟରେ ଆହୁରି କୁହାଯାଇଛି ଯେ, ଭାରତ ପାଇଁ ଏବେ ସମୟ ହେଉଛି, ଏହା ଅନ୍ୟ ଦେଶଗୁଡ଼ିକ ଭଳି ଦାରିଦ୍ର୍ୟର ଉଚ୍ଚ ରେଖାକୁ ଆପଣାଉ । ଦାରିଦ୍ର୍ୟର ଉଚ୍ଚ ରେଖା ଆପଣାଇବା ଦ୍ୱାରା ସରକାରଙ୍କୁ ସାମାଜିକ ସୁରକ୍ଷା କାର୍ଯ୍ୟକ୍ରମଗୁଡ଼ିକୁ ପୁଣି ଥରେ ପରିଭାଷିତ କରିବାର ସୁଯୋଗ ମିଳିବ । ଫଳରେ ଅଭାବୀ ଲୋକଙ୍କୁ ଠିକ୍ ଭାବେ ଚିହ୍ନଟ କରାଯାଇପାରିବ ଏବଂ ସେମାନଙ୍କୁ ଅଧିକ ସହାୟତା ପ୍ରଦାନ କରାଯାଇପାରିବ ବ୍ରୁକିଙ୍ଗ୍ସ ରିପୋର୍ଟ ଅନୁସାରେ, ସହର ଏବଂ ଗ୍ରାମୀଣ ଉଭୟ କ୍ଷେତ୍ରରେ ଅସମାନତାରେ ବଡ଼ ହ୍ରାସ ଦେଖିବାକୁ ମିଳିଛି । ସହରୀ ଗିନି ସୂଚକାଙ୍କ ୩୬.୭ରୁ ଖସି ୩୧.୯ ହୋଇଛି । ସେହିଭଳି ଗ୍ରାମୀଣ ଗିନି ସୂଚକାଙ୍କ ୨୮.୭ରୁ ଖସି ୨୭.୦ ହୋଇଛି । ଗିନି ଇଣ୍ଡେକ୍ସକୁ ସାଧାରଣତଃ ଆର୍ଥିକ ଅସମାନତାକୁ ମାପିବା ପାଇଁ ବ୍ୟବହାର କରାଯାଇଥାଏ, ଯାହାକି ଏକ ଜନସଂଖ୍ୟା ମଧ୍ୟରେ ଆୟ କିମ୍ବା ସମ୍ପତ୍ତିର ବିତରଣକୁ ମାପିଥାଏ । ରିପୋର୍ଟରେ କୁହାଯାଇଛି ଯେ, ଉଚ୍ଚ ବିକାଶ ହାର ଏବଂ ଅସମାନତାରେ ବଡ଼ ହ୍ରାସ ଯୋଗୁ ଭାରତରେ ଅତି ଗରିବୀ ଶେଷ ହୋଇଛି ।
wp:embed {"url":"https://www.prameyanews7.com/marathon-meeting-of-modi-ministry-today/","type":"wp-embed","providerNameSlug":"prameya-news-7"} /wp:embedହେଡ୍କାଉଣ୍ଟ ପଭର୍ଟି ରେସିଓକୁ ଯଦି ବିଚାରକୁ ନିଆଯିବ ତେବେ ଏହା ୨୦୧୧-୧୨ରେ ୧୨.୨% ଥିବାବେଳେ ୨୦୨୨-୨୩ରେ ୨%କୁ ହ୍ରାସ ପାଇଛି । ରିପୋର୍ଟରେ ଆହୁରି କୁହାଯାଇଛି ଯେ, ବିଶ୍ୱ ବ୍ୟାଙ୍କ ଅନୁମାନ ତୁଳନାରେ ଭାରତରେ ଦାରିଦ୍ର୍ୟ ସୀମା ରେଖା ତଳେ ଥିବା ଲୋକଙ୍କ ସଂଖ୍ୟା ଅନେକ ମାତ୍ରାରେ ହ୍ରାସ ପାଇଛି ।
ରିପୋର୍ଟ ଅନୁସାରେ, ୨୦୧୧-୧୨ରୁ ବାସ୍ତବ ମୁଣ୍ଡ ପିଛା ଖର୍ଚ୍ଚ ବାର୍ଷିକ ହାରରେ ୨.୯% ବୃଦ୍ଧି ପାଇଛି । ଗ୍ରାମାଞ୍ଚଳରେ ଏହି ଅଭିବୃଦ୍ଧି ହାର ୩.୧% ଥିବାବେଳେ ସହରାଞ୍ଚଳରେ ୨.୬% ରହିଛି ।