ନୂଆଦିଲ୍ଲୀ: ଦକ୍ଷିଣ ଆଫ୍ରିକାରେ ଚାଲିଥିବା ଆଇସିସି ମହିଳା ଟି-ଟ୍ୱେଣ୍ଟି ବିଶ୍ୱକପ୍‌ରେ ଶନିବାର ଭାରତ ଓ ଇଂଲଣ୍ଡ ମଧ୍ୟରେ ଲଢେଇ । ସଂଧ୍ୟାରେ ଖେଳାଯିବାକୁ ଥିବା ଏହି ମ୍ୟାଚ୍ ଉଭୟ ଦଳ ପାଇଁ ବହୁ ଗୁରୁତ୍ବପୂର୍ଣ୍ଣ । ଆଜିର ମ୍ୟାଚ ଜିତି ନକ୍ଆଉଟ୍‌ ସ୍ଥାନ ଦୃଢ଼ କରିବାକୁ ଲକ୍ଷ୍ୟ ରଖିଛନ୍ତି ଦୁଇ ଦଳ ।

ଗ୍ରୁପ୍‌-୨ରେ ଇଂଲଣ୍ଡ ଓ ଭାରତ ଅପରାଜେୟ ସାବ୍ୟସ୍ତ ହୋଇଛନ୍ତି । ଉଭୟ ଦଳ ୨ଟି ଲେଖାଏଁ ମ୍ୟାଚ୍‌ ଜିତି ୪ ପଏଣ୍ଟ ଲେଖାଏଁ ପାଇଛନ୍ତି । ତେବେ ଇଂଲଣ୍ଡ ରନ୍‌ରେଟ୍‌ ଅନୁଯାୟୀ ଟେବୁଲରେ ଶୀର୍ଷରେ ଥିବାବେଳେ ଭାରତ ଦ୍ୱିତୀୟରେ ରହିଛି । ଭାରତ ପ୍ରଥମ ମ୍ୟାଚ୍‌ରେ ପାକିସ୍ତାନକୁ ୭ ୱିକେଟ୍‌ରେ ଏବଂ ଦ୍ୱିତୀୟ ମ୍ୟାଚ୍‌ରେ ୱେଷ୍ଟଇଣ୍ଡିଜ୍‌କୁ ୬ ୱିକେଟ୍‌ରେ ପରାଜିତ କରିଥିଲା । ଅନ୍ୟ ପଟରେ ଇଂଲଣ୍ଡ ୭ ୱିକେଟ୍‌ରେ ୱେଷ୍ଟଇଣ୍ଡିଜ୍‌କୁ ଏବଂ ୪ ୱିକେଟ୍‌ରେ ଆୟର୍ଲାଣ୍ଡକୁ ହରାଇଛି ।

ଭାରତ ଓ ଇଂଲଣ୍ଡ ପୂର୍ବରୁ ୫ଥର ମୁହାଁମୁହିଁ ହୋଇଛନ୍ତି । ଏଥିରେ ଇଂଲଣ୍ଡ ସମସ୍ତ ମ୍ୟାଚ୍‌ ବିଜୟୀ ହୋଇଛି । ୨୦୨୦ରେ ଉଭୟ ଦଳ ମଧ୍ୟରେ ସେମି ଫାଇନାଲ୍‌ ଲଢେଇ ହୋଇଥାନ୍ତା, ହେଲେ ବର୍ଷା ଯୋଗୁ ମ୍ୟାଚ୍‌ ବାତିଲ୍‌ ହେବା ଫଳରେ ଭାରତକୁ ବିଜୟୀ ଘୋଷଣା କରାଯାଇଥିଲା । ହର୍ମନପ୍ରୀତ କୌରଙ୍କ ନେତୃତ୍ୱାଧିନ ଭାରତ ଦଳ ପରାଜୟଧାରା ଭାଙ୍ଗିବା ଲକ୍ଷ୍ୟରେ ରହିଛି । ପ୍ରଥମ ୨ଟି ମ୍ୟାଚ୍‌ରେ ଦଳକୁ ବିଜୟୀ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିବା ୱିକେଟ୍‌ କିପର ବ୍ୟାଟର ରିଚା ଘୋଷଙ୍କ ସମେତ ଜେମିମା ରୋଡ୍ରିଗ୍ସ, ହର୍ମନପ୍ରୀତ ଏବଂ ଅଲରାଉଣ୍ଡର ଦୀପ୍ତି ଶର୍ମାଙ୍କ ଉପରେ ସମସ୍ତଙ୍କ ନଜର ରହିବ ।