କାଠମାଣ୍ଡୁ: ନେପାଳରେ ସ୍ୱାସ୍ଥ୍ୟ କ୍ଷେତ୍ରକୁ ବିକାଶ ଏବଂ ମଜଭୁତ କରିବା ଲକ୍ଷ୍ୟରେ ଭାରତ ସୋମବାର ନେପାଳ ସରକାରଙ୍କୁ ୨୦ କିଡନୀ ଡାଇଲିସିସ୍ ମେସିନ ହସ୍ତାନ୍ତର କରିଛି । ଭାରତ ଦ୍ୱାରା ନେପାଳକୁ ଏହିପରି ୨୦୦ ମେସିନ ଦିଆଯିବ । ସୋମବାର ଏହାର ପ୍ରଥମ ବ୍ୟାଚ୍ ହସ୍ତାନ୍ତର କରାଯାଇଛି । ନେପାଳରେ ଭାରତର ରାଷ୍ଟ୍ରଦୂତ ନବୀନ ଶ୍ରୀବାସ୍ତବ ଭାରତ ସରକାର ଏବଂ ଭାରତବାସୀଙ୍କ ପକ୍ଷରୁ କାଠମାଣ୍ଡରେ ଏକ ସମାରୋହ ସମୟରେ ନେପାଳର ସ୍ୱାସ୍ଥ୍ୟ ମନ୍ତ୍ରୀ ପଦମ ଗିରିଙ୍କୁ ମେସିନ ହସ୍ତାନ୍ତର କରିଛନ୍ତି ।

ଶ୍ରୀବାସ୍ତବ କହିଛନ୍ତି ଯେ ଭଲ ବନ୍ଧୁ ଭାବେ ଭାରତ ସବୁବେଳେ ନେପାଳର ବିକାଶରେ ସହଭାଗୀ ହୋଇ ରହିଛି । ଭାରତ ଏବଂ ନେପାଳ ବିଭିନ୍ନ କ୍ଷେତ୍ରରେ ମିଳିମିଶ କାମ କରୁଛନ୍ତି ଏବଂ ସ୍ୱାସ୍ଥ୍ୟ ଉଭୟଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଅଟେ । ଏହି ଅବସରରେ ନବନିଯୁକ୍ତ ସ୍ୱାସ୍ଥ୍ୟ ମନ୍ତ୍ରୀ ପଦମ ଗିରି ସହାୟତା ପାଇଁ ଭାରତ ସରକାଙ୍କୁ ଧନ୍ୟବାଦ ଜଣାଇଛନ୍ତି । ଏହା ନେପାଳର ସ୍ୱାସ୍ଥ୍ୟ ଭିତ୍ତିଭୂମିକୁ ମଜଭୁତ କରିବାରେ ସହାୟକ ହେବ ବୋଲି ମନ୍ତ୍ରୀ ପବନ ଗିରି କହିଛନ୍ତି ।

ଏହାସହ ନେପାଳ ସ୍ୱାସ୍ଥ୍ୟମନ୍ତ୍ରୀ କହିଛନ୍ତି ଯେ ପଡୋଶୀ ପ୍ରଥମେ ନୀତି ଅଧିନରେ ଭାରତ ୨୦୧୫ରେ ଭୂକମ୍ପ, କୋଭିଡ ୧୯ ମହାମାରୀ ଏବଂ ସ୍ୱାସ୍ଥ୍ୟ ସହ ବିଭିନ୍ନ କ୍ଷେତ୍ରରେ ନେପାଳର ସହାଯ୍ୟ କରୁଛି ଏବଂ ଏଥିପାଇଁ ଆମେ କୃତଜ୍ଞ । ଉଲ୍ଲେଖଯୋଗ୍ୟ ଯେ ନେପାଳରେ ଅଣ ସରକାରୀ ସଂଗଠନ ଦ୍ୱାରା ପରିଚାଳିତ ୫୦ରୁ ଅଧିକ ହସ୍ପିଟାଲ, ନର୍ସିଂ ହୋମ ଏବଂ ଡାୟଲିସିସ କେନ୍ଦ୍ରରେ ମାଗଣା ସ୍ୱାସ୍ଥ୍ୟ ସେବା ପ୍ରଦାନ କରିବା ନେଇ ସ୍ୱାସ୍ଥ୍ୟ ମନ୍ତ୍ରାଳୟ ସହ ବୁଝାମଣା ଉପରେ ହସ୍ତାକ୍ଷର କରିଛି ।