ନୂଆଦିଲ୍ଲୀ ୧୪।୧୧: ଭାରତରେ ଛୋଟ-ବଡ ହୋଇ ପ୍ରାୟ ୨୦୦ରୁ ଅଧିକ ନଦୀ ରହିଛି । ହିନ୍ଦୁ ଧର୍ମରେ ନଦୀମାନଙ୍କୁ ଦେବୀ ଭାବରେ ପୂଜା କରାଯାଏ । କୁହାଯାଏ ନଦୀରେ ଗାଧୋଇବା ଦ୍ୱାରା ସମସ୍ତ ପାପ ଧୋଇଯାଏ। କିନ୍ତୁ ଜାଣନ୍ତି କି ଦେଶରେ ଏପରି ଏକ ନଦୀ ଅଛି ଯାହାକୁ ଛୁଇଁବାକୁ ଭୟ କରନ୍ତି ଲୋକେ ।
ଏହି ନଦୀକୁ ଅପବିତ୍ର ବୋଲି ଭାବନ୍ତି ସମସ୍ତେ । ଏହି ନଦୀର ନାଁ ହେଉଛି କର୍ମନାଶା । ନଦୀଟି ବିହାରର କୈମୁର ଜିଲ୍ଲାରୁ ଉତ୍ପନ୍ନ ହୋଇ ଉତ୍ତରପ୍ରଦେଶର ସୋନଭଦ୍ର, ଚନ୍ଦୌଲି, ବାରାଣାସୀ ଏବଂ ଗାଜିପୁର ଜିଲ୍ଲା ଦେଇ ପ୍ରବାହିତ ହେଉଛି। କୁହାଯାଏ ଏହି ନଦୀ ଅଭିଶାପିତ ।
କୁହାଯାଏ ଏହି ନଦୀର ପାଣିରେ ସ୍ନାନ କିମ୍ବା ଏହାକୁ ବ୍ୟବହାର କରିବା ଦ୍ବାରା ଲୋକଙ୍କ କର୍ମ ଅର୍ଥାତ୍ ପୁଣ୍ୟ ସବୁ ନଷ୍ଟ ହୋଇଯାଏ । ଲୋକକଥା ଅନୁଯାୟୀ, ତ୍ରିଶଙ୍କୁ ନାମକ ଜଣେ ରାଜାଙ୍କୁ ଉଭୟ ଦେବତା ଏବଂ ପିତୃପୁରୁଷ ସ୍ୱର୍ଗ ଓ ନର୍କକୁ ଯିବାକୁ ମନା କରିଦେଇଥିଲେ । ଯେଉଁ କାରଣରୁ ସେ ସ୍ୱର୍ଗ ଏବଂ ପୃଥିବୀ ମଧ୍ୟରେ ଓଲଟା ଓହଳିକି ରହିଥିଲେ । ଅନେକ ବର୍ଷ ପର୍ଯ୍ୟନ୍ତ ରାଜା ଏପରି ଅବସ୍ଥାରେ ରହିଥିଲେ ।
ଯାହା ପରେ ଗୋଟିଏ ଦିନ ତାଙ୍କର ଲାଳ ପୃଥିବୀ ଉପରେ ପଡିଥିଲା । ଆଉ ଏଥିରୁ ହିଁ ଜନ୍ମ ନେଇଥିଲା କର୍ମନାଶା ନଦୀ । କିନ୍ତୁ ଏହାପରଠାରୁ ନଦୀକୁ ଅଭିଶାପିତ ମାନିଥାନ୍ତି ସମସ୍ତେ । ଏହି ନଦୀର ପାଣିକୁ କେହି ବି କରନ୍ତିନି ବ୍ୟବହାର ।
