ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସୀନା ଭିଡିଓ କନଫରେନ୍ସିଂ ଜରିଆରେ ଭାରତ-ବାଂଲାଦେଶ ଫ୍ରେଣ୍ଡଶିପ୍ ପାଇପଲାଇନର ଉଦଘାଟନ କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ଯୋଜନାର ହିତାଧିକାରୀଙ୍କୁ ଶୁଭେଚ୍ଛା ଜଣାଇଛନ୍ତି ।

ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଭାରତ-ବାଂଲାଦେଶ ସମ୍ପର୍କରେ ଆଜି ଏକ ନୂଆ ଅଧ୍ୟାୟ ଆରମ୍ଭ ହୋଇଛି । ଏହି ଭାରତ-ବାଂଲାଦେଶ ଫ୍ରିଣ୍ଡଶିପ୍ ପାଇପଲାଇନ ପରିଯୋଜନାର ମୂଳଦୂଆ ୨୦୧୮ ସେପ୍ଟେମ୍ୱରରେ ରଖାଯାଇଥିଲା । ଆଜି ପ୍ରଧାନମନ୍ତ୍ରୀ ଶେଖ ହସୀନାଙ୍କ ସହ ଉଦଘାଟନ କରିବାର ସମୟ ଆସିଛି ।

ପ୍ରଧାନମନ୍ତ୍ରୀ ନିଜ ସମ୍ୱୋଧନରେ କହିଛନ୍ତି ଯେ କରୋନା ମହାମାରୀ ସତ୍ତ୍ୱେ ଏହି ପରିଯୋଜନା ଉପରେ କାମ ଜାରି ରହିଥିଲା । ଏହି ପାଇପଲାଇନ ଯୋଗୁଁ ଉତ୍ତର ବାଂଲାଦେଶର ବିଭିନ୍ନ ଜିଲ୍ଲାକୁ ୧ ମିଲିୟନ ମ୍ୟାଟ୍ରିକ୍ ଟନ୍ ଡିଜେଲ ଯୋଗାଯାଇ ପାରିବ । ଏହି ପାଇପଲାଇନ ଯୋଗୁଁ ଡିଜେଲ୍ ଯୋଗଣାରେ ଖର୍ଚ୍ଚ କମ ହୋଇପାରିବ । ଏହାସହ ସେ କହିଛନ୍ତି ଯେ ମୋତେ ବିଶ୍ୱାସ ଏହି ପାଇପଲାଇନ ବାଂଲାଦେଶର ବିକାଶକୁ ଅଧିକ ଗତି ଦେବ ଏବଂ ଉଭୟ ଦେଶର ମଧ୍ୟରେ କନେକ୍ଟିଭିଟିର ଉତ୍କୃଷ୍ଟ ଉଦାହରଣ ହୋଇପାରିବ ।

ଉଲ୍ଲେଖଯୋଗ୍ୟ ଯେ ଏହି ପାଇପଲାଇନ ପାଇଁ ୩୭୭ କୋଟି ଟଙ୍କା ଖର୍ଚ୍ଚ କରାଯାଇଛି । ବର୍ତ୍ତମାନ ସମୟରେ ବାଂଲାଦେଶକୁ ୫୧୨ କିଲୋମିଟର ରେଳମାର୍ଗ ଦେଇ ଡିଜେଲ ରପ୍ତାନୀ କରାଯାଉଛି । ୧୩୧.୫ କିଲୋମିଟର ଏହି ପାଇପଲାଇନ ସାହାଯ୍ୟରେ ୧ ମିଲିୟନ ଟନ ଡିଜେଲ ଆସାମର ନୁମାଲିଗରରୁ ବାଂଲାଦେଶକୁ ରପ୍ତାନୀ କରାଯାଇ ପାରିବ । ଏହା ଦୁଇ ପଡୋଶୀ ଦେଶ ମଧ୍ୟରେ ପ୍ରଥମ କ୍ରସବର୍ଡର ଏନର୍ଜି ପାଇପଲାଇନ ଅଟେ ।