ରାଞ୍ଚି: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବାକୁ ଥିବା ୩ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ର ପ୍ରଥମ ମ୍ୟାଚ୍ ଆଜି ରାଞ୍ଚିରେ ଖେଳାଯାଉଛି। ଏଥିପାଇଁ ଟସ୍ ପଡ଼ିସାରିଛି।  ଭାରତ ଟସ୍‌ ଜିତି ପ୍ରଥମେ ବୋଲି ନିଷ୍ପତ୍ତି ନେଇଛି।  

ଦିନିକିଆ ସିରି୍ଜ୍‌ରେ ନ୍ୟୁଜିଲାଣ୍ଡକୁ ୩-୦ରେ ହରାଇବା ପରେ ଭାରତର ମନବଳ ଦୃଢ଼ ରହିଛି। ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ ବିଜୟ ପରେ ଭାରତ ଏହି ଶୃଙ୍ଖଳାରେ ବିଶ୍ୱର ଏକ ନମ୍ବର ଟିମ୍ ହୋଇଛି। ସେହିପରି  ଟି-୨୦ରେ ପୂର୍ବରୁ ହିଁ ଦଳ ଏକ ନମ୍ବର ସ୍ଥାନରେ ରହିଛି। ତେଣୁ ଏହି ଦୃଷ୍ଟିରୁ ନ୍ୟୁଜିଲାଣ୍ଡ ବିପକ୍ଷରେ ଭାରତ ସ୍ଥିତି ମଜଭୁତ ରହିଛି।

ତେବେ ନ୍ୟୁଜିଲାଣ୍ଡ ବିପକ୍ଷରେ ଭାରତର ପ୍ରଦର୍ଶନ ଦେଖିଲେ ଦଳ ଅଧିକ ମ୍ୟାଚ୍ ଜିତିଛି ସତ ହେଲେ ନ୍ୟୁଜିଲାଣ୍ଡ ବି ପଛରେ ନାହିଁ। ଭାରତକୁ ନ୍ୟୁଜିଲାଣ୍ଡ ବିପକ୍ଷ ଟି-୨୦ ମ୍ୟାଚ୍ ଜିତିବାକୁ ଅଧିକାଂଶ ମ୍ୟାଚ୍‌ରେ କଡ଼ା ସଂଘର୍ଷ କରିବାକୁ ପଡ଼ିଛି।

ଉଭୟ ଦଳ ମଧ୍ୟରେ ମୋଟ ୨୨ ଟି-୨୦ ମ୍ୟାଚ୍‌ ଖେଳାଯାଇଛି। ଯେଉଁଥିରେ ଭାରତ ୧୦ଟିରେ ବିଜୟଲାଭ କରିଥିବା ବେଳେ ନ୍ୟୁଜିଲାଣ୍ଡ ୯ଟି ମ୍ୟାଚ୍‌ରେ ଜିତିଛି। ସେହିପରି ୩ଟି ମ୍ୟାଚ୍ ଟାଇ ରହିଛି। ତେଣୁ ଭାରତ ଯଦିଓ ମଜଭୁତ ସ୍ଥିତିରେ ରହିଛି ତେବେ ରେକର୍ଡ ଅନୁସାରେ ନ୍ୟୁଜିଲାଣ୍ଡକୁ କ୍ଲିନ୍‌ ସ୍ୱିପ୍ କରିବା କଷ୍ଟକର ହୋଇପାରେ।

ଏପଟେ ରାଞ୍ଚି ପଡ଼ିଆରେ ଭାରତର ରେକର୍ଡ ଭଲ ରହିଛି। ଦଳ ଏଠାରେ ଗୋଟିଏ ବି ମ୍ୟାଚ୍ ହାରି ନାହିଁ। ତେଣୁ ଭାରତ ଦିନିକିଆ ସିରିଜ୍ କ୍ଲିନ୍‌ ସ୍ୱିପ୍ କରିବା ପରେ ଟି-୨୦ ସିରିଜ୍ କ୍ଲିନ୍‌ ସ୍ୱିପ୍ କରିବା ଅପେକ୍ଷାରେ ରହିଛି।

ଟିମ୍ ଇଣ୍ଡିଆ- ଇଶାନ କିଶନ(ୱିକେଟ କିପର), ଶୁଭମନ ଗିଲ, ରାହୁଲ ତ୍ରିପାଠୀ, ସୂର୍ଯ୍ୟକୁମାର ଯାଦବ(ଉପ ଅଧିନାୟକ), ହାର୍ଦ୍ଦିକ ପାଣ୍ଡ୍ୟା(ଅଧିନାୟକ), ଦୀପକ ହୁଡ୍ଡା, ୱାଶିଂଟନ ସୁନ୍ଦର, ଶିବମ ମାଭି, କୁଲଦୀପ ଯାଦବ, ଉମ୍ରାନ ମଲିକ, ଅର୍ଶଦୀପ ସିଂହ।

ନ୍ୟୁଜିଲାଣ୍ଡ ଟିମ୍- ଫିନ୍ ଆଲେନ, ଡିଭୋନ କନୱେ(ୱିକେଟ୍ କିପର), ମାର୍କ ଚାମ୍ପନ, ଡାର୍ଲି ମିଚେଲ୍, ଗ୍ଲେନ ଫିଲିପ୍ସ, ମିଚେଲ ସଣ୍ଟନର(ଅଧିନାୟକ), ମାଇେଲ ବ୍ରାସୱେଲ୍, ଜାକୋବ ଡୁଫି, ଇଶ ସୋଡ଼ି, ଲକି ଫର୍ଗୁସନ, ବ୍ଲେୟାର ଟିକନର।