ଭୁବନେଶ୍ଵର: ବିଜେଡି ଫୋକସରେ ପଶ୍ଚିମ ଓଡ଼ିଶା । ୨୦୨୪ ସାଧାରଣ ନିର୍ବାଚନରେ ପଶ୍ଚିମ ଓଡ଼ିଶାରେ ୫ରୁ ୫ ଏମପି ସିଟ୍ ଏବଂ ୩୧ରୁ ଅଧିକ ବିଧାନସଭା ଆସନ ଜିତିବୁ ବୋଲି ଆଜି ଦମ୍ଭୋକ୍ତି କରିଛନ୍ତି ଭଟଲି ବିଧାୟକ ସୁଶାନ୍ତ ସିଂ । କହିଛନ୍ତି ପଶ୍ଚିମ ଓଡ଼ିଶାର ୯ଟି ଜିଲ୍ଲାରେ ଗଡ଼ ମଜବୁତ୍ ପାଇଁ ତାଙ୍କୁ ଦାୟିତ୍ବ ଦେଇଛନ୍ତି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେପଟେ ପୂର୍ବ ଅପେକ୍ଷା ଅଧିକ ସିଟ୍ ହାତେଇବ ବୋଲି ବିଜେପି  କହିଥିବା ବେଳେ ଆଦିବାସୀ ଅଂଚଳରେ କଂଗ୍ରେସ ଭଲ ପ୍ରଦର୍ଶନ କରିବ ବୋଲି କହିଛନ୍ତି ଦଳୀୟ ନେତା ।

ମିଶନ ୨୦୨୪ । ବିଜେଡି ଫୋକସରେ ପଶ୍ଚିମ ଓଡ଼ିଶା । ୫ରୁ ୫ ସାଂସଦ, ୩୧ରୁ ଅଧିକ ବିଧାନସଭା ଆସନ ଜିତିବୁ କହିଲେ ବିଜେଡି ବିଧାୟକ ସୁଶାନ୍ତ ସିଂ । ପଶ୍ଚିମରେ ଗଡ଼ ମଜବୁତ୍ ପାଇଁ ପୂର୍ବତନ ମନ୍ତ୍ରୀ ତଥା ଭଟଲୀ ବିଧାୟକ ସୁଶାନ୍ତ ସିଂଙ୍କୁ ମିଳିଛି ୯ଟି ଜିଲ୍ଲାର ଦାୟିତ୍ବ । ନିକଟରେ ମନ୍ତ୍ରୀ ପଦ ନପାଇବାକୁ ନେଇ ଚର୍ଚ୍ଚାରେ ଥିବା ସୁଶାନ୍ତ ସିଂ ଆଜି ମିଡିଆ ସାମ୍ନାକୁ ଆସି ନିଜର ଆଭିମୁଖ୍ୟ ଜଣାଇଥିଲେ । କହିଥିଲେ ମନ୍ତ୍ରୀ ପଦ ପାଇଁ ସେ କେବେ ଆଶାୟୀ ନଥିଲେ । ଦଳୀୟ ସଂଗଠନ କାର୍ଯ୍ୟ କରିବାକୁ ୨୦୨୨ରେ ସେ ସ୍ବଇଚ୍ଛାରେ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଆଗାମୀ ଦିନରେ ପଶ୍ଚିମ ଓଡ଼ିଶାର ୩୫ ବିଧାନସଭା ଆସନରୁ ୩୧ରୁ ଅଧିକ ସିଟ୍ ବିଜେଡି ଜିତିବ ଏବଂ ୫ରୁ ୫ ଲୋକସଭା ସିଟ୍ ଆମେ ହାତେଇବୁ ବୋଲି ଆଜି ଦମ୍ଭୋକ୍ତି କରିଛନ୍ତି ସୁଶାନ୍ତ ସିଂ । ରାଜ୍ୟରେ ଆଗୁଆ ନିର୍ବାଚନ ସମ୍ଭାବନାକୁ ନେଇ ରାଜନୈତିକ ପ୍ରସ୍ତୁତି ଭିତରେ ସୁଶାନ୍ତଙ୍କ ଏଭଳି ବୟାନ ରାଜ୍ୟ ରାଜନୀତିର ପାରା ବଢ଼ାଇଛି ।   

ଆମେ ଯଦି ୨୦୧୯ ନିର୍ବାଚନ ଫଳାଫଳ ଉପରେ ନଜର ପକାଇବା ତାହେଲେ ପଶ୍ଚିମ ଓଡ଼ିଶାର ୧୦ଟି ଜିଲ୍ଲାର ୫ରୁ ୫ ଲୋକସଭା ଆସନ ବିଜେପି ଖାତାକୁ ଯାଇଥିଲା । ସମ୍ବଲପୁର, ବରଗଡ଼, ସୁନ୍ଦରଗଡ଼, ବଲାଙ୍ଗିର, କଳାହାଣ୍ଡି ସବୁଠି ବିଜେପି ଏମପି ଜିତିଥିଲେ ।ସେହିଭଳି ୩୫ ବିଧାନସଭା ଆସନ ମଧ୍ୟରୁ ୨୨ ଆସନରେ ବିଜେଡି ବିଧାୟକ ଜିତିଥିବା ବେଳେ ବିଜେପି ଖାତାକୁ ଯାଇଥିଲା  ୮ଟି ଆସନ । ଆଉ କଂଗ୍ରେସ ହାତେଇଥିଲା ୪ଟି ଆସନ । ଗୋଟିଏ ଆସନରେ ସିପିଆଇ (ଏମ) ପ୍ରାର୍ଥୀ ଜିତିଥିଲେ । ତେବେ ୨୦୧୯ରେ ୨୨ଟି ବିଧାନସଭା ଆସନ ଜିତିଥିବା ବିଜେଡି ୨୦୨୪ରେ ୩୧ରୁ ଅଧିକ ବିଧାନସଭା ଆସନ ଜିତିବାକୁ ରଣନୀତି ପ୍ରସ୍ତୁତ କରିଛି । ସେହିଭଳି ବିଜେପି ହାତରେ ଥିବା ୫ରୁ ୫ ଲୋକସଭା ଆସନ ବିଜେଡି ଛଡ଼ାଇ ନେବାକୁ ଯେତେବେଳେ ସୁଶାନ୍ତ  ସିଂ ଦମ୍ଭୋକ୍ତି କରିଛନ୍ତି ସେତେବେଳେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ଉଭୟ ବିଜେପି ଓ କଂଗ୍ରେସ । ବିଜେପି କହିଛି ୨୪ରେ ପଶ୍ଚିମ ଓଡ଼ିଶାରେ ବିଜେପିର ସିଟ୍ ଆହୁରି ବଢ଼ିବ । କଂଗ୍ରେସ ମଧ୍ୟ ପଶ୍ଚିମ ଓଡ଼ିଶାରେ ଦଳ ଭଲ ପ୍ରଦର୍ଶନ କରିବ ବୋଲି ଆଶା ବାନ୍ଧିଛି ।

ମିଶନ ୨୦୨୪କୁ ନେଇ ଏବେ ସବୁ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିଛନ୍ତି । ତେବେ ରଣନୀତି ପ୍ରସ୍ତୁତ କ୍ଷେତ୍ରରେ ଆଗୁଆ ରହିଛି ଶାସକ ଦଳ । ଉପକୂଳରୁ ଉତ୍ତର ଏବଂ ପଶ୍ଚିମରୁ ଦକ୍ଷିଣ ସବୁ କ୍ଷେତ୍ରରେ ବିଜେଡି ସଂଗଠନକୁ ମଜବୁତ୍ କରିବାକୁ ଦଳର ହେଭିଓ୍ବେଟ୍ଙ୍କୁ ଦାୟିତ୍ବ ଦିଆଯାଇଛି । ଯେହେତୁ  ପଶ୍ଚିମ ଓଡ଼ିଶାରେ ୫ରୁ ୫ ଏମପି ସିଟ୍ ବିଜେପି ହାତରେ ରହିଛି ତେଣୁ ପଶ୍ଚିମ ଓଡ଼ିଶାକୁ ଅଧିକ ଫୋକସ କରିଛି ବିଜେଡି ।