ପଟଣା: ବିହାର ରାଜନୈତିକ ପୃଷ୍ଠଭୂମିରେ ଗୋଟିଏ ସାଧାରଣ କାରକ। ବିଜେପି, ଜେଡିୟୁ ଓ କଂଗ୍ରେସର ରାଜ୍ୟ ସଭାପତିଙ୍କ ସହିତ ଆରଜେଡି ପୃଷ୍ଠଭୂମି ଜଡ଼ିତ ରହିଛି । ବିଜେପି ପ୍ରମୁଖ ସମ୍ରାଟ୍ ଚୌଧୁରୀ ହୁଅନ୍ତୁ କି ବିହାର କଂଗ୍ରେସ ମୁଖ୍ୟ ଅଖିଲେଶ ପ୍ରସାଦ ସିଂହ ଓ ଜେଡିୟୁ ରାଜ୍ୟ ସଭାପତି ଉମେଶ ଖୁଶଓ୍ବାହା ହୁଅନ୍ତୁ, ସମସ୍ତେ ଲାଲୁ ପ୍ରସାଦ ଯାଦବଙ୍କ ପାର୍ଟି ଆରଜେଡି ସହିତ ଦୀର୍ଘ ଦିନ ଯୋଡ଼ି ରହିଥିଲେ ଏବଂ ପରେ ଦଳ ଡିଆଁ ନୀତି ଆପଣାଇଛନ୍ତି । ଆରଜେଡିରୁ ବାହାରି ବିଜେପି, କଂଗ୍ରେସ ଓ ଜେଡିୟୁରେ ସାମିଲ ହୋଇଛନ୍ତି ।

ଏମିତି ସମୟ ଥିବା ବିହାର କହିଲେ ଲାଲୁଙ୍କୁ ବୁଝାଏ ଏବଂ ଲାଲୁ କହିଲେ ବିହାରକୁ ବୁଝାଇଥାଏ । ବିହାର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡି ସଂସ୍ଥାପକ ଲାଲୁ ପ୍ରସାଦ ଯାଦବ ରାଜନୀତିର ଶୀର୍ଷକୁ ଛୁଇଁଛନ୍ତି । ଆନେକ ରାଜନେତା ନେତା ଗଢିବାରେ ତାଙ୍କ ହାତ ରହିଛି । ଲାଲୁ କହିଥିଲେ, ଯେ ପର୍ଯ୍ଯନ୍ତ ସମୋସା ଆଳୁ ଥିବା, ସେପର୍ଯ୍ୟନ୍ତ ବିହାର ରାଜନୀତିରେ ଲାଲୁ ଥିବେ ।

୨୦୧୭ରେ ସମ୍ରାଟ୍ ଚୌଧୁରୀ ବିଜେପିରେ ଯୋଗ ଦେଇଥିଲେ । ତାଙ୍କୁ ଡ. ସଞ୍ଜୟ ଜୈଶଓ୍ବାଲଙ୍କ ସ୍ଥାନରେ ଅବସ୍ଥାପିତ କରାଯାଇଥିଲା । ତାଙ୍କ କାର୍ଯ୍ୟକାଳ ଶେଷ ହେବା ପରେ ବିଜେପି କେନ୍ଦ୍ରୀୟ ନେତା ତାଙ୍କୁ ନୀତୀଶ କୁମାର ବିଧାନସଭା କ୍ଷେତ୍ରରେ ଭୋଟ ବିଭାଜନ କରିବାକୁ ଦାୟିତ୍ବ ଦେଇଥିଲେ ।

ବିହାର ତାରାପୁର ବିଧାନସଭା ଆସନରୁ ପ୍ରତିନିଧିତ୍ବ କରୁଥିବା ପୂର୍ବତନ ଆରଜେଡି ନେତା ସୁକୁନି ଚୌଧୁରୀଙ୍କ ପୁଅ ସମ୍ରାଟ୍ ଚୌଧୁରୀ କେବେ ଲାଲୁ ପ୍ରସାଦ ଯାଦବଙ୍କ ବିଶ୍ବସ୍ତ ଥିଲେ । ୧୯୯୯ ମସିହାରେ ବାପା ଓ ପୁଅ ଉଭୟରେ ଆରଜେଡିରେ ସାମିଲ ହୋଇଥିଲେ । ରାବିଡି ଦେବୀଙ୍କ ସରକାରରେ ସମ୍ରାଟ୍ ଚୌଧୁରୀ ମନ୍ତ୍ରୀ ଭାବେ ଦାୟିତ୍ବ ତୁଲାଇ ଥିଲେ । ହେଲେ ତାଙ୍କୁ କମ୍ ବୟସ ହୋଇଥିବାରୁ ପଦ ଛାଡ଼ିବାକୁ ପଡ଼ିଥିଲା । ସମ୍ରାଟ୍ ଖଗରିଆ ବିଧାନସଭା ସିଟରୁ ଆରଜେଡି ଟିକେଟରେ ୨୦୦୪ ଓ ୨୦୧୦ ନିର୍ବାଚନରେ ବିଜୟୀ ହୋଇଥିଲେ ।  

ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି, ସମ୍ରାଟ୍ ଚୌଧୁରୀ କିଏ? ଲାଭ ଯେଉଁଠି ସମ୍ରାଟ୍ ସେଇଠି । ପ୍ରଥମେ ଆରଜେଡି ପରେ ଜେଡିୟୁ ଏବଂ ବିଜେପିରେ ସାମିଲ ହୋଇଛନ୍ତି । ସେପଟେ ଆରଜେଡି ମୁଖପାତ୍ର ସୁବୋଧ କୁମାର କହିଛନ୍ତି, ବିହାରରେ ଆରଜେଡି ହେଉଛି ରାଜନୀତିର ପ୍ରଶିକ୍ଷଣ କେନ୍ଦ୍ର ।

ଦେଶରେ ନିର୍ବାଚନ ପ୍ରକ୍ରିୟା ଆରମ୍ଭ ହେବା ଠାରୁ ବିହାରରେ ଜାତି ଭିତ୍ତିକ ରାଜନୀତି ଚାଲିଆସୁଛି । ଉଚ୍ଚ ଜାତିର ଲୋକଙ୍କ ହାତରେ ରହିଛି ବିହାର ରାଜନୀତିର ପସାପାଲି । କଂଗ୍ରେସ ନେତା ଅଖିଲେଶ ପ୍ରସାଦ ସିଂଙ୍କ ସହିତ ରହିଛି ଆରଜେଡି ପୃଷ୍ଠଭୂମି । ମଦନ ମୋହନ ଝାଙ୍କ ସ୍ଥାନରେ କଂଗ୍ରେସ ତାଙ୍କୁ ଅବସ୍ଥାପିତ କରିଛି । ଅଖିଲେଶ ସିଂ ୨୦୦୪ରେ ମୋତିହାରୀ ଲୋକସଭା ଆସନରୁ ଆରଜେଡି ଟିକେଟରୁ ବିଜୟୀ ହୋଇଥିଲେ । UPA ସରକାରରେ ସେ କେନ୍ଦ୍ର ମନ୍ତ୍ରୀ ମଧ୍ୟ ରହିଥିଲେ । ୨୦୦୯ ସାଧାରଣ ନିର୍ବାଚନ ପୂର୍ବରୁ ସେ ଲାଲୁଙ୍କ ଦଳ ଛାଡ଼ିଥିଲେ । ପରେ ୨୦୦୯ ଓ ୨୦୧୪ରେ କଂଗ୍ରେସ ନୋମିନି ହୋଇ ଅସଫଳ ହୋଇଥିଲେ ।

ସେହିପରି ଜେଡିୟୁ ରାଜ୍ୟ ମୁଖ୍ୟ ଉମେଶ ଖୁସଓ୍ବାହା ଲାଲୁ ପ୍ରସାଦ ଯାଦବଙ୍କ ପାର୍ଟିର ଜଣେ ଅନ୍ୟତମ ନେତା । ୨୦୦୫ ବିଧାନସଭା ନିର୍ବାଚନରେ ପରାସ୍ତ ହେବା ପରେ ଲାଲୁଙ୍କ ହାତ ଛାଡ଼ି ଦେଉଥିଲେ । ପରେ ୨୦୧୦ ନିର୍ବାଚନରେ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ମୈଦାନକୁ ଓହ୍ଲାଇ ଥିଲେ । ପରେ ନୀତୀଶ କୁମାରଙ୍କ ପାର୍ଟିରେ ଯୋଗ ଦେଇଥିଲେ । ୨୦୨୧ ଜାନୁଆରୀରେ ଦଳ ତାଙ୍କୁ ପାର୍ଟି ମୁଖ୍ଯ ଭାବେ ଘୋଷଣା କରିଛି । ଜଣେ କଂଗ୍ରେସ ନେତା କହିଛନ୍ତି, ଜଣେ ଲୋକ ପ୍ରତିନିଧିଙ୍କ ରାଜନୈତିକ ପୃଷ୍ଠଭୂମିର କୌଣସି ପ୍ରଭାବ ପକାଏ ନାହିଁ ।