ଦୁବାଇ, ୨୨।୦୩ : ସଦ୍ୟ ପ୍ରକାଶିତ ଆଇସିସି ମାନ୍ୟତା ତାଲିକାରେ ଭାରତୀୟ ଖେଳାଳିଙ୍କ ଅବନତି ଘଟିଛି । ଦିନିକିଆ ବୋଲିଂ ମାନ୍ୟତାରେ ୪ ସପ୍ତାହ ଧରି ଶୀର୍ଷ ସ୍ଥାନ ଦଖଲ କରିଥିବା ମହମ୍ମଦ ସିରାଜ ତୃତୀୟ ସ୍ଥାନକୁ ଖସିଛନ୍ତି । ଟେଷ୍ଟ ବ୍ୟାଟିଂ ମାନ୍ୟତାରେ କେନ ୱିଲିୟମସନ ୨ୟକୁ ଉନ୍ନୀତ ହୋଇଥିବା ବେଳେ ରିଷଭ ପନ୍ତ, ରୋହିତ ଶର୍ମା, ବିରାଟ କୋହଲିଙ୍କ ଅବନତି ହୋଇଛି ।

ତେବେ ଟେଷ୍ଟ ବ୍ୟାଟିଂରେ ମାର୍ନସ ଲାବୁସାନ ଶୀର୍ଷ ସ୍ଥାନ ବଜାୟ ରଖିଛନ୍ତି । ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟେଷ୍ଟରେ ଦ୍ୱିଶତକ ଅର୍ଜନ କରିବା ପରେ ୱିଲିୟମସନଙ୍କ ମାନ୍ୟତାରେ ୪ଟି ସ୍ଥାନ ଉନ୍ନତି ହୋଇଥିଲା । ସେ ୮୮୩ପଏଣ୍ଟ ସହ ଦ୍ୱିତୀୟ ସ୍ଥାନରେ ରହିଛନ୍ତି । ଲାବୁସାନ ୯୧୫ ପଏଣ୍ଟ ହାସଲ କରିଛନ୍ତି । ଷ୍ଟିଭେନ ସ୍ମିଥ୍‌ ତୃତୀୟକୁ ଖସିଥିବା ବେଳେ, ଜୋ ରୁଟ୍‌ ଚତୁର୍ଥ,  ବାବର ଆଜମ ପଞ୍ଚମ ଓ ଟ୍ରେଭିସ୍‌ ହେଡ ଷଷ୍ଠକୁ ଖସିଛନ୍ତି । ଗତ ସପ୍ତାହରେ ଦଶମ ସ୍ଥାନରେ ରହିଥିବା ରୋହିତ ଶର୍ମାଙ୍କ ମାନ୍ୟତାରେ ୨ଟି ସ୍ଥାନ ଅବନତି ହୋଇଛି । ସେ ବର୍ତ୍ତମାନ ୧୨ତମ ସ୍ଥାନରେ ରହିଛନ୍ତି । କୋହଲି ୧୩ତମ ସ୍ଥାନ ଦଖଲ କରିଛନ୍ତି ।

ସେହିପରି ଚଳିତ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ ନୈରାଶ୍ୟଜନକ ପ୍ରଦର୍ଶନ କରିବା ଫଳରେ ସିରାଜଙ୍କ ମାନ୍ୟତାରେ ଅବନତି ଘଟିଛି । ସେ ତୃତୀୟକୁ ଖସିଛନ୍ତି । ଫଳରେ ଆହତ ସମସ୍ୟା ଦେଇ ଗତି କରୁଥିବା ଜୋସ ହାଜେଲଉଡ୍‌ ଶୀର୍ଷକୁ ଫେରିଛନ୍ତି । ଟ୍ରେଣ୍ଟ ବୋଲ୍ଟ ଦ୍ୱିତୀୟ ସ୍ଥାନରେ ରହିଛନ୍ତି । ଦିନିକିଆ ବ୍ୟାଟିଂ ମାନ୍ୟତାରେ ବାବର ଆଜମ ଶୀର୍ଷ ସ୍ଥାନ ବଜାୟ ରଖିଛନ୍ତି । ଭାରତୀୟଙ୍କ ମଧ୍ୟରେ ରୋହିତ ଶର୍ମାଙ୍କ ଉନ୍ନତି ହୋଇଛି । ସେ ନବମ ସ୍ଥାନକୁ ଉଠିଛନ୍ତି । ବିରାଟ କୋହଲି ପୂର୍ବବତ ଅଷ୍ଟମ ସ୍ଥାନ ବଜାୟ ରଖିଛନ୍ତି ।