ଦୁବାଇ,୧୩/୯: ପ୍ରକାଶ ପାଇଲା ଆଇସିସି ବ୍ୟାଟିଂ ରାଙ୍କିଂ । ଏହି ତାଲିକାରେ ଭାରତୀୟ ଖେଳାଳିଙ୍କ ଉନ୍ନତି ହୋଇଛି । ଗତ ସପ୍ତାହରେ ତୃତୀୟ ସ୍ଥାନରେ ରହିଥିବା ଯୁବ ଓପନର ଶୁଭମନ ଗିଲ୍ ଦ୍ୱିତୀୟକୁ ଉଠିଛନ୍ତି । ସେହିପରି ଶ୍ରେଷ୍ଠ ୧୦ ଜଣଙ୍କ ମଧ୍ୟରେ ୩ଜଣ ଭାରତୀୟ ଖେଲାଳି ସ୍ଥାନ ପାଇଛନ୍ତି । ପାକିସ୍ତାନ ବିପକ୍ଷରେ ଶତକ ଅର୍ଜନ କରିଥିବା ବିରାଟ କୋହଲି ଅଷ୍ଟମ ସ୍ଥାନରେ ରହିଛନ୍ତି । ସେହିପରି କ୍ରମାନ୍ୱୟରେ ୩ଟି ଅର୍ଦ୍ଧଶତକ ଅର୍ଜନ କରିଥିବା ରୋହିତ ଶର୍ମା ନବମକୁ ଉନ୍ନୀତ କରିଛନ୍ତି ।
ସେପଟେ ପାକିସ୍ତାନର ବାବର ଆଜମ ଶ୍ରୀର୍ଷ ସ୍ଥାନ ବଜାୟ ରଖିଥିବାବେଳେ ଦକ୍ଷିଣ ଆଫ୍ରିକାର ରାଶି ଭାନ ଡର୍ ଡୁସେନ ତୃତୀୟ, ଡେଭିଡ୍ ୱାର୍ଣ୍ଣର ଚତୁର୍ଥ, ଇମାମ ଉଲ୍-ହକ୍ ପଞ୍ଚମ, ଆୟର୍ଲାଣ୍ଡର ହ୍ୟାରୀ ଟେକ୍ଟର ଷଷ୍ଠ, କ୍ୱିଣ୍ଟନ ଡି କକ୍ ସପ୍ତମ, ଫଖାର ଜମାନ ଦଶମ ସ୍ଥାନରେ ରହିଛନ୍ତି । ଇଶାନ କିଷନଙ୍କ ମାନ୍ୟତାରେ ୩ଟି ସ୍ଥାନ ଉନ୍ନତି ହୋଇଛି । ସେ ୨୨ତମ ସ୍ଥାନରେ ପହଞ୍ଚିଛନ୍ତି । ପାକିସ୍ତାନ ବିପକ୍ଷରେ ଶତକ ଅର୍ଜନ କରିଥିବା କେ ଏଲ୍ ରାହୁଲଙ୍କ ମଧ୍ୟ ୩ଟି ସ୍ଥାନ ଉନ୍ନତି ଘଟାଇ ୩୭ତମ ସ୍ଥାନ ଦଖଲ କରିଛନ୍ତି । ବୋଲିଂ ମାନ୍ୟତରେ ମଧ୍ୟ ଭାରତୀୟଙ୍କ ଉନ୍ନତି ହୋଇଛି । ପାକିସ୍ତାନ ବିପକ୍ଷରେ ୫ଟି ଓ ଶ୍ରୀଲଙ୍କା ବିପକ୍ଷରେ ୪ଟି ୱିକେଟ୍ ନେଇଥିବା କୁଲଦୀପ ଯାଦବ ମାନ୍ୟତା ତାଲିକାର ସପ୍ତମ ସ୍ଥାନ ଅକ୍ତିଆର କରିଛନ୍ତି ।
ସେହିପରି ଯଶପ୍ରୀତ ବୁମରା ୨୭ତମ ସ୍ଥାନକୁ ଉଠିଥିବାବେଳେ ହାର୍ଦ୍ଦିକ ପାଣ୍ଡ୍ୟା ୫୬ତମ ସ୍ଥାନରେ ପହଞ୍ଚିଛନ୍ତି । ମହମ୍ମଦ ସିରାଜ ନବମ ସ୍ଥାନ ବଜାୟ ରଖିଛନ୍ତି । ବର୍ତ୍ତମାନ ମାନ୍ୟତା ତାଲିକାର ତୃତୀୟ ସ୍ଥାନରେ ରହିଥିବା ଭାରତ ଶୀର୍ଷ ସ୍ଥାନ ଦଖଲ କରିବାର ସୁଯୋଗ ରହିଛି । ଏଥିପାଇଁ ଭାରତୀୟ ଦଳକୁ ଆଗାମୀ ବାଂଲାଦେଶ ବିପକ୍ଷ ଏସିଆ କପ୍ ସୁପର-୪ ରାଉଣ୍ଡ ମୁକାବିଲା ସହ ଫାଇନାଲ୍ ମ୍ୟାଚ୍ ଜିତିବାକୁ ହେବ । ଏଥିସହ ପାକିସ୍ତାନ ବିପକ୍ଷରେ ଶ୍ରୀଲଙ୍କା(ସୁପର-୪) ବିଜୟ ହାସଲ କରିବା ଜରୁରି ଓ ଦକ୍ଷିଣ ଆଫ୍ରିକା ବିପକ୍ଷରେ ଅଷ୍ଟ୍ରେଲିଆ ଶେଷ ୨ଟି ଯାକ ଦିନିକିଆରେ ପରାଜିତ ହେବା ଆବଶ୍ୟକ । ଏହା ସମ୍ଭବ ହେଲେ ଭାରତ ଶୀର୍ଷ ସ୍ଥାନ ହାସଲ କରିପାରିବ ।