ନୂଆଦିଲ୍ଲୀ: ଆଇସିସି ୱାର୍ଲଡ ଟେଷ୍ଟ ଚାମ୍ପିୟନଶିପ୍ ୨୦୨୧-୨୩ର ଫାଇନାଲ ମ୍ୟାଚ୍ ଆସନ୍ତା ଜୁନ ୭ରୁ ଦ ଓଭାଲ ମୈଦାନରେ ଖେଳାଯିବ । ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଟାଇଟଲ ଲଢେଇ ହେବ । ଏହାରି ଭିତରେ ଶୁକ୍ରବାର ଆଇସିସି ଏହି ଟୁର୍ଣ୍ଣାମେଣ୍ଟର ପ୍ରାଇଜ୍ ମନି ଘୋଷଣା କରିଛି । ଚାମ୍ପିୟନ ଟିମକୁ ୧.୬ ମିଲିୟନ ଡଲାର (ପ୍ରାୟ ୧୩ କୋଟି ଟଙ୍କା) ଏବଂ ଉପବିଜେତା ଟିମକୁ ୮ ଲକ୍ଷ ଡଲାର (ପ୍ରାୟ ୬.୫ କୋଟି ଟଙ୍କା) ମିଳିବ ।

ୱାର୍ଲଡ ଟେଷ୍ଟ ଚାମ୍ପିୟନଶିପ ୨୦୨୧-୨୩ରେ ମୋଟ୍ ପୁରସ୍କାର ରାଶି ୩.୮ ମିଲିୟନ ଡଲାର (ପ୍ରାୟ ୩୧.୪ କୋଟି ଟଙ୍କା) ରହିଛି । ଏହି ପୁରସ୍କାର ରାଶିକୁ ୯ଟି ଟିମ୍ ମଧ୍ୟରେ ବଣ୍ଟାଯିବ । ତୃତୀୟ ସ୍ଥାନରେ ଥିବା ଟିମ୍ ଦକ୍ଷିଣ ଆଫ୍ରିକା କ୍ରିକେଟ୍ ଟିମକୁ ୩.୫ କୋଟି ଟଙ୍କା, ଚତୁର୍ଥରେ ଥିବା ଇଂଲଣ୍ଡ କ୍ରିକେଟ୍ ଟିମକୁ ୨.୮ କୋଟି ଟଙ୍କା ମିଳିବ ।  

ପଞ୍ଚମ ସ୍ଥାନରେ ଥିବା ଶ୍ରୀଲଙ୍କା ଟିମକୁ ମୋଟ ୧.୬ କୋଟି ଟଙ୍କା ମିଳିବ । ଏହାପରେ ନ୍ୟୁଜିଲାଣ୍ଡ, ପାକିସ୍ତାନ, ୱେଷ୍ଟଇଣ୍ଡିଜ୍ ଏବଂ ବାଂଲାଦେଶକୁ ୮୨ ଲକ୍ଷ ଲେଖାଏଁ ମିଳିବ । ଆଇସିସି ଟେଷ୍ଟ ଚାମ୍ପିୟନଶିପ ୨୦୨୧-୨୩ର ଟାଇଟଲ ବିଜେତା ଟିମକୁ ଟେଷ୍ଟ ଗଦା ମିଳିବା ସହ ପ୍ରାୟ ୧୩ କୋଟି ଟଙ୍କା ମିଳିବ । ଆଇସିସି ୱାର୍ଲଡ ଟେଷ୍ଟ ଚାମ୍ପିୟନଶିପ ୨୦୧୯-୨୧ର ପୁରସ୍କାର ରାଶି ମଧ୍ୟ ସମାନ ରହିଥିଲା । ଦ୍ୱିତୀୟ ସଂସ୍କରଣରେ ଆଇସିସି ଏହି ଟୁର୍ଣ୍ଣାମେଣ୍ଟର ପ୍ରାଇଜ୍ ମନିରେ କୌଣସି ପରିବର୍ତ୍ତନ କରି ନାହିଁ ।