ନୂଆଦିଲ୍ଲୀ ୨୮।୧: ଭାରତୀୟ ବାୟୁସେନା ଯୁଦ୍ଧବିମାନ ସୁଖୋଇ-୩୦ ଓ ମିରାଜ-୨୦୦୦ ପରସ୍ପର ସହ ଧକ୍କା ଲାଗି ଦୁର୍ଘଟଣାଗ୍ରସ୍ତ ହୋଇଛନ୍ତି। କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ଏହା ପୁଷ୍ଟି କରିଛନ୍ତି। ଏହି ଦୁର୍ଘଟଣା ନେଇ ଅଧିକ ସୂଚନା କୋର୍ଟ ଅଫ ଇନକ୍ୱାରୀରେ ଜଣାପଡିବ। ଏହି ଦୁର୍ଘଟଣାରେ ଜଣେ ପାଇଲଟ ସହିଦ ହୋଇଥିବା ଅଧିକାରୀକ ଭାବେ ପୁଷ୍ଟି ହୋଇଛି। ସେପଟେ ହେଲିକପ୍ଟରରେ ଦୁର୍ଘଟଣାସ୍ଥଳକୁ ପହଞ୍ଚିଥିବା ବାୟୁସେନା କର୍ମଚାରୀ ପାଇଲଟଙ୍କୁ ଠାବ କରି ଗ୍ୱାଲିୟର ବାୟୁସେନା ଘାଟିକୁ ନେଇ ଆସିଛନ୍ତି।  ଆହତ ପାଇଲଟମାନଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି।

ଉଲ୍ଲେଖଯୋଗ୍ୟ ଯେ ଭାରତୀୟ ବାୟୁସେନା (ଆଇଏଏଫ)ଙ୍କ ଦୁଇଟି ଯୁଦ୍ଧବିମାନ ସୁଖୋଇ-୩୦ ଓ ମିରାଜ ୨୦୦୦ ଶନିବାର ମଧ୍ୟପ୍ରଦେଶ ମୁରୈନା ଜିଲ୍ଲାରେ ଦୁର୍ଘଟଣାଗ୍ରସ୍ତ ହୋଇଥିଲେ। ତେବେ ଏଥିରୁ ଗୋଟିଏ ବିମାନର ଅଂଶ ରାଜସ୍ଥାନର ଭରତପୁର ପିଙ୍ଗୋରା ଗାଁ ନିକଟରେ ପଡିଥିଲା। ତେବେ ଦୁର୍ଘଟଣାଗ୍ରସ୍ତ ୨ ବିମାନ ଗ୍ୱାଲିୟର ବାୟୁସେନା ଘାଟିରୁ ଉଡାଣ କରିଥିଲେ। ଦୁର୍ଘଟଣାର ତଦନ୍ତ ଲାଗି ଆଇଏଏଫ କୋର୍ଟ ଅଫ ଇନକ୍ୱାରୀ ଗଠନ କରିଛନ୍ତି।

मुरैना के कैलारस के पास वायुसेना के सुखोई-30 और मिराज-2000 विमानों के दुर्घटनाग्रस्त होने की खबर अत्यंत दुखद है। मैंने स्थानीय प्रशासन को त्वरित बचाव एवं राहत कार्य में वायुसेना के सहयोग के निर्देश दिए हैं। विमानों के पायलट के सुरक्षित होने की ईश्वर से कामना करता हूं।

— Shivraj Singh Chouhan (@ChouhanShivraj) January 28, 2023

କୁହାଯାଉଛି ପ୍ରଶିକ୍ଷଣ ଉଡାଣରେ ସୁଖୋଇରେ ୨ ଜଣ ଓ ମିରାଜରେ ଜଣେ ପାଇଲଟ ଉଡାଣ କରୁଥିଲେ। ଦୁଇଟି ବିମାନ ଦୁର୍ଘଟଣାଗ୍ରସ୍ତ ହୋଇଥିବା ନେଇ ବାୟୁସେନା ମୁଖ୍ୟ କେନ୍ଦ୍ର ପ୍ରତିରକ୍ଷାମନ୍ତ୍ରୀ ରାଜନାଥ ସିଂହଙ୍କୁ ସୂଚିତ କରିଛନ୍ତି। ପୁରା ଘଟଣାକ୍ରମ ଉପରେ ଏବେ ରାଜନାଥ ନଜର ରଖିଛନ୍ତି। ଘଟଣାରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଏକ ଟ୍ୱିଟ୍‌ କରି ମୁରୈନାର କୋଲାରସ ନିକଟରେ ବାୟୁସେନାର ସୁଖୋଇ-୩୦ ଓ ମିରାଜ-୨୦୦୦ ବିମାନ ଦୁର୍ଘଟଣାଗ୍ରସ୍ତ ହେବା ଖବର ଅତ୍ୟନ୍ତ ହୃଦୟ ବିଦାରକ ବୋଲି ଉଲ୍ଲେଖ କରିଛନ୍ତି।

ଏ ନେଇ ବାୟୁସେନାର ବୟାନ ମଧ୍ୟ ଆସିଛି। ଏଥିରେ ଭାରତୀୟ ବାୟୁସେନାର ୨ଟି ଯୁଦ୍ଧବିମାନ ଶନିବାର ସକାଳେ ଗ୍ୱାଲିୟର ନିକଟରେ ଦୁର୍ଘଟଣାଗ୍ରସ୍ତ ହୋଇଥିବା କହିଛନ୍ତି। ଏଥିରେ ଥିବା ୩ ପାଇଲଟଙ୍କ ମଧ୍ୟରୁ ଜଣେ ପ୍ରାଣ ହରାଇଥିବା ବେଳେ ଅନ୍ୟ ୨ ଜଣ ଗୁରୁତର ଆହତ ହୋଇଛନ୍ତି। ଘଟଣାର ତଦନ୍ତ ଲାଗି ନିର୍ଦ୍ଦେଶ ଦିଆଯାଇଥିବା ବାୟୁସେନା କହିଛନ୍ତି।