ଇସ୍‌ଲାମାବାଦ: ପାକିସ୍ତାନରେ ପୁଣି ବିସ୍ଫୋରଣ। ବାରୁଦ ଧୁଆଁରେ ଆକ୍ତାମାକ୍ତା ବଲୋଚିସ୍ତାନର କ୍ୱେଟ୍ଟା ସହର। ରବିବାର ସକାଳେ କ୍ୱେଟ୍ଟାରେ ବିସ୍ଫୋରଣ ହେବାରୁ ୫ରୁ ଅଧିକ ଆହତ ହୋଇଛନ୍ତି। ପାକିସ୍ତାନ ନ୍ୟୁଜ୍ ସାଇଟ୍‌ ଦି ଡନ୍‌ର ସୂଚନା ଅନୁସାରେ ଏଫ୍‌ସି ମୁସା ଚେକ୍‌ପଏଣ୍ଟ ନିକଟରେ ଏହି ବିସ୍ଫୋରଣ ହୋଇଛି।

ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁସାରେ, କ୍ୱେଟ୍ଟାର ଏକ ସୁରକ୍ଷିତ ସ୍ଥାନରେ ବିସ୍ଫୋରଣ ହୋଇଛି। ପୁଲିସ ମୁଖ୍ୟାଳୟ ଏବଂ କ୍ୱେଟ୍ଟା କାଣ୍ଟୋନମେଣ୍ଟ ନିକଟରେ ବିସ୍ଫୋରଣ ହୋଇଥିବା ଖବର ପ୍ରକାଶ ପାଇଛି। ବିସ୍ଫୋରଣ ସମୟରେ ଭିଡିଓ ସୋସିଆଲ୍‌ ମିଡିଆରେ ଭାଇରାଲ ହେଉଥିବା ବେଳେ ଏଥିରେ ମୃତ୍ୟୁ ସଂଖ୍ୟା ନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ତେବେ ଆହତମାନଙ୍କୁ କ୍ୱେଟ୍ଟାର ସିଭିଲ ହସ୍‌ପିଟାଲ୍‌ରେ ଭର୍ତ୍ତି କରାଯାଇଛି। ସେଠାରେ ତାଙ୍କର ଚିକିତ୍ସା ଚାଲିଛି ବୋଲି ସ୍ୱେଚ୍ଛା ସେବୀ ସଂଗଠନ ‘ଇଧି’ କର୍ମଚାରୀ ଜୀଶନ ଅହମଦ କହିଛନ୍ତି। ବିସ୍ଫୋରଣ ପରେ ଜୀଶନ ଅହମଦ ଉକ୍ତ ସ୍ଥାନରେ ଉଦ୍ଧାର କାର୍ଯ୍ୟ କରୁଛନ୍ତି।  

ବିସ୍ଫୋରଣ ଖବର ପାଇବା ପରେ ପାକିସ୍ତାନ ପୁଲିସ ଘଟଣା ସ୍ଥଳରେ ପହଞ୍ଚିଥିଲା। ଉକ୍ତ ଅଞ୍ଚଳକୁ କର୍ଡନ କରି ସର୍ଚ୍ଚ ଅପରେସନ ଜାରି ରହିଛି ବୋଲି ଜୀଶନ ସୂଚନା ଦେଇଛନ୍ତି।

ଗତ ସୋମବାର ପାକିସ୍ତାନର ଉତ୍ତର ପଶ୍ଚିମ ପେଶାୱାର ସହରର ହାଇ ସିକ୍ୟୁରିଟି ଜୋନ୍‌ରେ ଥିବା ଏକ ମସ୍‌ଜିଦ୍‌ରେ ଭୟଙ୍କର ବିସ୍ଫୋରଣ ହୋଇଥିଲା। ତାଲିବାନର ଜଣେ ଆତ୍ମଘାତି ଆତଙ୍କବାଦୀ ହେଲ୍‌ମେଟ୍ ପିନ୍ଧି ମ୍‌ସିଜିଦ୍‌ ଭିତରକୁ ପଶିଯାଇ ନିଜକୁ ବିସ୍ଫୋରଣ କରି ଉଡ଼ାଇ ଦେଇଥିଲେ। ଏଥିରେ ୧୦୦ ଜଣଙ୍କର ମୃତ୍ୟୁ ହୋଇଥିଲା। ୧୫୦ରୁ ଅଧିକ ଆହତ ହୋଇଥିଲେ। ଏଥିରେ ଅଧିଂକାଶ ପୁଲିସ କର୍ମୀ ଥିଲେ।

ପାକିସ୍ତାନ ପୁଲିସ ଉପରେ ରାଗ ସୁଝାଇବାକୁ ଯାଇ ଏହି ଆକ୍ରମଣ କରିଥିଲେ ଆତଙ୍କବାଦୀ। ପାକିସ୍ତାନ ପୁଲିସ ପକ୍ଷରୁ ଏହି ସୂଚନା ଦିଆଯାଇଥିଲା। ତେବେ ଏହି ଦୁର୍ଘଟଣା ପୂରା ଦେଶକୁ ଦୋହଲାଇ ଦେଇଥିଲା।