ମୁମ୍ବାଇ,୨୩/୩(ଏଜେନ୍ସି): ଦିନ କେଇଟା ପରେ ଆଇପିଏଲ୍‌ର ୧୬ତମ ସଂସ୍କରଣ । ଆରମ୍ଭ ହେବ ଫଟାଫଟ୍ କ୍ରିକେଟର ମହାକୁମ୍ଭ । ଏନେଇ ବିଭିନ୍ନ ଦଳ ଜୋରଦାର ପ୍ରସ୍ତୁତି ଆରମ୍ଭ କରିଦେଇଛନ୍ତି । ପୂର୍ବ ସିଜନ ଅପେକ୍ଷା ଚଳିତ ଆଇପିଏଲ୍‌ ସ୍ୱତନ୍ତ୍ର ଓ ରୋମାଞ୍ଚପୂର୍ଣ୍ଣ ହେବ । କାରଣ ବିସିସିଆଇ ଏଥର ଆଇପିଏଲରେ କିଛି ନୂଆ ନିୟମ ଲାଗୁ କରିଛି । ନୂଆ ନିୟମଗୁଡ଼ିକ ମଧ୍ୟରେ ‘ଇମ୍ପାକ୍ଟ ପ୍ଲେୟାର’ ନିୟମଟି ସବୁଠୁ ଚର୍ଚ୍ଚିତ ରହିଛି । ଇମ୍ପାକ୍ଟ ପ୍ଲେୟାର ନିୟମ ବଳରେ ପ୍ରତି ମ୍ୟାଚ୍‌ ସଂଘର୍ଷପୂର୍ଣ୍ଣ ହେବ ବୋଲି ଅନୁମାନ କରାଯାଉଛି ।

 କ’ଣ ଏହି ଇମ୍ପାକ୍ଟ ପ୍ଲେୟାର’ ନିୟମ?

ଏହି ‘ଇମ୍ପ୍ୟାକ୍ଟ ପ୍ଲେୟାର’ ନିୟମକୁ ସରଳ ଭାଷାରେ ‘ଟାକ୍‌ଟିକଲ ସବ୍‌ଷ୍ଟିଟ୍ୟୁସନ’ କୁହାଯାଉଛି । ଏହି ନିୟମ ଅନୁଯାୟୀ, କୌଣସି ମ୍ୟାଚ୍‌ର ଟସ୍‌ ପରେ ଉଭୟ ଦଳ ସେମାନଙ୍କ ଚୂଡ଼ାନ୍ତ ଏକାଦଶ ତାଲିକା ଦେବେ । ଏହା ସହିତ ୪ଜଣ ସବ୍‌ଷ୍ଟିଟ୍ୟୁଟ୍‌ ଖେଳାଳିଙ୍କ ନାମ ଘୋଷଣା କରିବେ । ମ୍ୟାଚ୍‌ ଚାଲିଥିବା ସମୟରେ ଦଳ ଚାହିଁଲେ ଅତିରିକ୍ତ ୪ ଜଣଙ୍କ ମଧ୍ୟରୁ ଯେକୌଣସି ଜଣେ ଖେଳାଳିଙ୍କୁ ଆବଶ୍ୟକତା ଅନୁଯାଇ ବଦଳ କରିପାରିବେ । ଚୂଡ଼ାନ୍ତ ଏକାଦଶରୁ ଜଣେ ଖେଳାଳିଙ୍କୁ ବାଦ୍ ଦେଇ ଅତିରିକ୍ତ ଖେଳାଳିଙ୍କ ମଧ୍ୟରୁ ଜଣଙ୍କୁ ଚୂଡାନ୍ତ ଏକାଦଶରେ ସାମିଲ କରିପାରିବେ । ଉଭୟ ଇନିଂସର ୧୪ ଓଭର ମଧ୍ୟରେ ଏହି ଖେଳାଳିଙ୍କୁ ସାମିଲ କରିପାରିବେ । ଶେଷ ୬ ଓଭର ମଧ୍ୟରେ କୌଣସି ଖେଳାଳିଙ୍କୁ ପରିବର୍ତ୍ତନ କରାଯାଇପାରିବ ନାହିଁ । ମ୍ୟାଚ୍‌ ମଧ୍ୟରେ କୌଣସି ଦଳ ଥରେ ମାତ୍ର ଖେଳାଳି ବଦଳ କରିପାରିବ ।

ମ୍ୟାଚ୍‌ ସମୟରେ ଟସ୍‌ ଯୋଗୁ ମିଳୁଥିବା ଅତିରିକ୍ତ ଫାଇଦାକୁ ‘ଇମ୍ପାକ୍ଟ ପ୍ଲେୟର’ ନିମୟ ବଳରେ ଚ୍ୟାଲେଞ୍ଜ କରିହେବ । ଭାରତୀୟ ଜଳବାୟୁରେ ରାତ୍ରି ସମୟରେ ଖେଳ ହେଲେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେଉଛନ୍ତି । କାରଣ ଦ୍ୱିତୀୟ ଭାଗରେ କାକର ପଡ଼ି ଗ୍ରାଉଣ୍ଡ ଓ ବଲ୍‌ ଓଦା ହୋଇଯାଉଥିବାରୁ ବ୍ୟାଟିଂ ସହଜ ହୋଇଯାଉଛି । ଏଭଳି ସ୍ଥଳରେ ବ୍ୟାଟିଂ ଆମନ୍ତ୍ରଣ ପାଇଥିବା ଦଳ ଦ୍ୱିତୀୟ ଭାଗରେ ବୋଲିଂ କରୁଥିବାବେଳେ ଏକାଦଶରୁ ଜଣଙ୍କୁ ବାଦ ଦେଇ ଅତିରିକ୍ତ ବୋଲରଙ୍କୁ ସାମିଲ କରିପାରିବ । ସେହିଭଳି ଆଗ ବୋଲିଂ କରିଥିବା ଦଳ ଆବଶ୍ୟକ ସ୍ଥଳେ ବ୍ୟାଟିଂ ଶକ୍ତି ବୃଦ୍ଧି ପାଇଁ ଅତିରିକ୍ତ ବ୍ୟାଟ୍ସମ୍ୟାନ୍‌ଙ୍କୁ ଏକାଦଶରେ ସାମିଲ କରିପାରିବ । କିନ୍ତୁ ଏଭଳି ସ୍ଥଳେ କେବଳ ୧୧ଜଣ ଖେଳାଳି ହିଁ ବ୍ୟାଟିଂ କରିପାରିବେ ।

‘ସୁପର ସବ୍‌’ ନିୟମଠୁ ଏହା ଭିନ୍ନ:

୨୦୦୫ ଓ ୨୦୦୬ରେ ଦିନିକିଆ କ୍ରିକେଟ୍‌ରେ ଆଇସିସି ଲାଗୁ କରିଥିବା ‘ସୁପର ସବ୍‌’ ନିୟମ ସହ ମଧ୍ୟ ‘ଇମ୍ପାକ୍ଟ ପ୍ଲେୟାର’ ନିୟମ ସମାନ ନୁହେଁ । ‘ସୁପର ସବ୍‌’ ନିୟମ ଅନୁଯାୟୀ ମ୍ୟାଚ୍‌ ବେଳ କୌଣସି ଦଳ ଜଣେ ବ୍ୟାଟରଙ୍କ ସ୍ଥାନରେ ଆଉ ଜଣେ ଖେଳାଳିଙ୍କୁ ସାମିଲ କରିପାରୁଥିଲେ । ଫଳ ସ୍ୱରୂପ ମ୍ୟାଚ୍‌ ଅଧାରୁ ବାଦ ପଡ଼ିଥିବା ବ୍ୟାଟର ଆଉଟ୍‌ ହୋଇଥିଲେ ତାଙ୍କ ସ୍ଥାନରେ ଆସିଥିବା ଖେଳାଳି ବ୍ୟାଟିଂ କରିପାରିବେ ନାହିଁ । ସେହିପରି ବୋଲିଂ କରି ବ୍ୟୟ ବହୁଳ ସାବ୍ୟସ୍ତ ହୋଇଥିବା ଖେଳାଳିଙ୍କ ସ୍ଥାନରେ ଦଳକୁ ଆସିଥିବ ଖେଳାଳି ଜଣଙ୍କ ସମ୍ପୂର୍ଣ୍ଣ ୧୦ ଓଭର ବୋଲିଂ କରିପାରିବେ ନାହିଁ । ବାଦ ପଡ଼ିଥିବା ବୋଲରଙ୍କ ବାକି ଥିବା ଓଭରକୁ ନୂଆ ଖେଳାଳି ସମ୍ପୂର୍ଣ୍ଣ କରିପାରିବେ । ଆଇପିଏଲରେ ‘ଇମ୍ପାକ୍ଟ ପ୍ଲେୟର’ ଇମ୍ପାକ୍ଟ ପକାଇବ ବୋଲି କୁହାଯାଉଛି ।