ନୂଆଦିଲ୍ଲୀ ୨୦।୦୫: ବିଶ୍ଵ ସ୍ଵାସ୍ଥ୍ୟ ସଂଗଠନ (ହୁ) ବିଭିନ୍ନ ଖାଦ୍ୟ ବିଭାଗ ପାଇଁ ସୋଡିୟମ୍ ବେଞ୍ଚ୍ମାର୍କର ୨ୟ ସଂସ୍କରଣ ରିପୋର୍ଟ ଜାରି କରିଛି । ନିକୃଷ୍ଟ ମାନର ଖାଦ୍ୟ ଯୋଗୁ ବିଶ୍ୱରେ ୮୦ ଲକ୍ଷରୁ ଅଧିକ ପ୍ରାଣ ହରାଉଛନ୍ତି । ସେମାନଙ୍କ ମଧ୍ୟରୁ ୨୦ ଲକ୍ଷ ଲୋକଙ୍କ ମୃତ୍ୟୁ ଅଧିକ ସୋଡିୟମ୍ ସେବନ ଯୋଗୁ ହେଉଛି । ‘ହୁ’ର ସଦ୍ୟ ରିପୋର୍ଟ ଅନୁସାରେ, ଖାଦ୍ୟରେ ମାତ୍ରାଧିକ ସୋଡିୟମ୍ ଗ୍ରହଣ କରିବା ଦ୍ୱାରା ରକ୍ତଚାପ ବୃଦ୍ଧି ପାଉଛି । ଏହାର ପରିଣାମସ୍ୱରୂପ ହୃଦ୍ରୋଗର ଆଶଙ୍କା ବଢୁଛି । ଲୁଣରେ ମୁଖ୍ୟ ଉପାଦାନ ହେଉଛି ସୋଡିୟମ୍ । ସ୍ୱାଭାବିକ କୋଷିକା କାର୍ଯ୍ୟକଳାପ ଓ ରକ୍ତରେ ପ୍ଲାଜ୍ମା ପରିମାଣ ବଜାୟ ରଖିବାରେ ଏହା ସହାୟକ ହୋଇଥାଏ । କିନ୍ତୁ ଅତି ମାତ୍ରାରେ ସୋଡିୟମ୍ ଉଚ୍ଚ ରକ୍ତଚାପ ଆଶଙ୍କା ବୃଦ୍ଧି କରେ । ଏହା ଏକ ବିପଦପୂର୍ଣ୍ଣ ସ୍ଥିତି, ଯାହା ହୃତ୍ପିଣ୍ଡ ସମସ୍ୟା ଓ ଷ୍ଟ୍ରୋକ୍ ପାଇଁ ଦାୟୀ ।
ଅଧିକାଂଶ ଲୋକ ଲୁଣର ଏତେ ଭୟଙ୍କର ସ୍ଥିତିକୁ କେବେ ଚିନ୍ତା କରନ୍ତି ନାହିଁ । କିନ୍ତୁ ଜାଣି ଆଶ୍ଚର୍ଯ୍ୟ ହେବେ, ମାତ୍ରାଧିକ ଲୁଣ ଖାଇବା ଯୋଗୁ ହୃଦ୍ଘାତ, ଷ୍ଟ୍ରୋକ୍ ଓ କିଡ୍ନୀ ରୋଗରୁ ପ୍ରତି ବର୍ଷ ବିଶ୍ୱରେ ପ୍ରାୟ ୧୦ ଲକ୍ଷ ଲୋକ ପ୍ରାଣ ହରାଉଛନ୍ତି ବୋଲି ବିଶ୍ଵ ସ୍ଵାସ୍ଥ୍ୟ ସଂଗଠନ ରିପୋର୍ଟରେ ଉଲ୍ଲେଖ କରିଛି । କେବଳ ହୃଦ୍ରୋଗ ନୁହେଁ, ମାତ୍ରାଧିକ ସୋଡିୟମ୍ ମେଦବହୁଳତା, ଗ୍ୟାଷ୍ଟ୍ରିକ୍ କ୍ୟାନ୍ସର ଓ ଯକୃତ ରୋଗ ଭଳି ପୁରୁଣା ରୋଗ ପାଇଁ ମଧ୍ୟ ଦାୟୀ । ବ୍ରେଡ୍, ପ୍ରକ୍ରିୟାକୃତ ମାଂସ, ପ୍ୟାକେଟ୍ ଖାଦ୍ୟ ସମେତ କିଛି ଦୁଗ୍ଧଜାତୀୟ ଉତ୍ପାଦରେ ସୋଡିୟମ୍ ଥାଏ । ଲୋକେ ଦିନକୁ ୫ ଗ୍ରାମ୍ରୁ କମ୍ ଲୁଣ (୨ ଗ୍ରାମ୍ରୁ କମ୍ ସୋଡିୟମ୍) ଖାଇବା ଉଚିତ୍ ବୋଲି ହୁ ପରାମର୍ଶ ଦେଇଛି । ଖାଦ୍ୟରେ ଏକ ଗୁରୁତ୍ୱପୂର୍ଣ୍ଣ ଉପାଦାନ ହେଉଛି ଲୁଣ । କିନ୍ତୁ ମାତ୍ରାଧିକ ଲୁଣର ଭୟଙ୍କର ସ୍ୱାସ୍ଥ୍ୟ ପରିଣାମ ରହିଛି ବୋଲି ଏହା ସ୍ପଷ୍ଟ କରିଛି । ରକ୍ତ ଚାପରେ ମାତ୍ରାଧିକ ଲୁଣର ସବୁଠୁ ଗୁରୁତ୍ୱପୂର୍ଣ୍ଣ ପ୍ରଭାବ ରହିଛି।
କାରଣ ସୋଡିୟମ୍ ଜଳକୁ ଅବଶୋଷିତ କରେ । ତେଣୁ ଆମେ ଯେତେବେଳେ ଅଧିକ ମାତ୍ରାରେ ଲୁଣ ଖାଉ, ଏହାକୁ ମିଶାଇବା ପାଇଁ ଶରୀର ଜଳ ଗଚ୍ଛିତ ରଖେ । ଏଥିରେ ରକ୍ତର ପରିମାଣ ବୃଦ୍ଧି ପାଇବାକୁ ଲାଗେ । ଫଳରେ ରକ୍ତ ଚାପ ବଢ଼େ । ସମୟ ସହିତ ଉଚ୍ଚ ରକ୍ତଚାପ ହୃତ୍ପିଣ୍ଡ, ଧମନୀ ଓ ଅନ୍ୟ ଅଙ୍ଗକୁ କ୍ଷତି ପହଞ୍ଚାଏ । ହୃଦ୍ରୋଗ, ଷ୍ଟ୍ରୋକ୍ ଓ କିଡ୍ନୀ ସମସ୍ୟା ବଢ଼ାଏ । ଉଚ୍ଚ ରକ୍ତଚାପ ହୃଦ୍ରୋଗର ମୁଖ୍ୟ କାରଣ । ଏହା ଧମନୀଗୁଡ଼ିକୁ ସଙ୍କୁଚିତ କରି ସେଗୁଡ଼ିକର କାର୍ଯ୍ୟକଳାପକୁ ଜଟିଳ କରେ, ଯାହା ହୃତ୍ପିଣ୍ଡ ଉପରେ ଚାପ ବଢ଼ାଏ । ଏହା କୋରୋନାରି ଆର୍ଟେରି ଡିଜିଜ୍, ହୃଦ୍ଘାତ ଓ ହୃତ୍ପିଣ୍ଡ ଅଚଳ ଭଳି ସ୍ଥିତି ପାଇଁ ମୁଖ୍ୟତଃ ଦାୟୀ । ଷ୍ଟ୍ରୋକ୍ ଓ ଅନ୍ୟ ହୃଦ୍ ସମସ୍ୟା ପାଇଁ ମଧ୍ୟ ମାତ୍ରାଧିକ ସୋଡିୟମ୍ ଦାୟୀ ।
