ଦେବଗଡ ୧୬।୮: ଗତ ୫ ଦିନ ଧରି ଲଗାଣ ବର୍ଷା ଯୋଗୁଁ ଦେବଗଡ ଜିଲ୍ଲାର ବିଭିନ୍ନ ଅଞ୍ଚଳରେ ଘର ଭାଙ୍ଗିଥିବା ଜଣାପଡିଛି । ଦେବଗଡ ସହର ୪ ନମ୍ବର ୱାର୍ଡ ଗୁରୁସାହିରେ ଜଣେ ବ୍ୟକ୍ତିଙ୍କ ଘର ଭୁଶୁଡି ପଡିଥିବା ବେଳେ ପରିବାର ଲୋକ ଅଳ୍ପକେ ବର୍ତ୍ତିଯାଇଛନ୍ତି ।  

ଗୁରୁସାହିର ପ୍ରଦୀପ କାରିଗରଙ୍କ ଘରେ ସୋମବାର ରାତିରେ ସ୍ବାମୀ, ସ୍ତ୍ରୀ ଓ ତିନି ସନ୍ତାନ ଶୋଇଥିଲେ। ଲଗାଣ ବର୍ଷା ଯୋଗୁଁ ଘରୁ ପାଣି ଗଳିବାରୁ ସେମାନେ ମଧ୍ୟ ରାତ୍ରିରେ ନିକଟସ୍ଥ ଘରକୁ ଆସବାବପତ୍ର ସ୍ଥାନାନ୍ତରିତ କରିଥିଲେ । ସ୍ଥାନାନ୍ତରିତ କରିବାର କିଛି ସମୟ ପରେ ହଠାତ ତାଙ୍କ ଘରର ଟାଇଲ ଛପର ଭୁଶୁଡି ପଡିଥିଲା। ପରିବାର ସଦସ୍ୟ ସ୍ଥାନାନ୍ତରିତ ହୋଇଥିବା ଯୋଗୁଁ ଅଳ୍ପକେ ରକ୍ଷା ପାଇଯାଇଛନ୍ତି । ଘରଟି ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି ।