ଗୌହାଟୀ: ଆସାମ ସରକାର ବାଲ୍ୟ ବିବାହ ବିରୋଧରେ ବଡ ସ୍ତରରେ ବଡ କାର୍ଯ୍ୟାନୁଷ୍ଠାନ ନେବାକୁ ପ୍ରସ୍ତୁତି  କରୁଛନ୍ତି। ଶନିବାର ମୁଖ୍ୟମନ୍ତ୍ରୀ ହିମନ୍ତ ବିଶ୍ଵ ଶର୍ମା କହିଛନ୍ତି, ନାବାଳକଙ୍କୁ ବିବାହ କରିଥିବା ହଜାର ସଂଖ୍ୟକ ସ୍ଵାମୀଙ୍କୁ ଆଗାମୀ ପାଞ୍ଚରୁ ଛଅ ମାସରେ ଗିରଫ କରାଯିବ। ତାଙ୍କ ସରକାର ବାଲ୍ୟ ବିବାହ ବିରୋଧୀ ଅଟନ୍ତି। ରାଜ୍ୟର ବିଜେପି ସରକାର ୧୪ ବର୍ଷରୁ କମ ବୟସର ନାବାଳିକାଙ୍କୁ ବିବାହ କରିଥିବା ପୁରୁଷଙ୍କ ବିରୋଧରେ ପୋକ୍ସୋ ଆକ୍ଟ ଆଧାରରେ ଦୃଢ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ନିଷ୍ପତ୍ତି ନେଇଛି। ଯଦି କୌଣସି ପୁରୁଷ ଏମିତି ବିବାହ କରିବେ ତେବେ ସେମାନଙ୍କୁ ପୋକ୍ସୋ ଆକ୍ଟ ଆଧାରରେ ଜେଲ୍ ଯିବାକୁ ପଡିବ।

ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵ ଶର୍ମା ଶନିବାର ପୁଣି ଥରେ ଦୋହରାଇଛନ୍ତି ଯେ, ସରକାର ଅଳ୍ପ ବୟସରେ ବିବାହ ଏବଂ ଶିଶୁ ଜନ୍ମକୁ ରୋକିବା ପାଇଁ ପ୍ରତିବଦ୍ଧ। ୧୮ ବର୍ଷରୁ କମ ବୟସର ନାବାଳିକାଙ୍କୁ ବିବାହ କରୁଥିବା ବ୍ୟକ୍ତି ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ। ତେଣୁ ଆଗାମୀ ସମୟରେ ଏମିତି ବ୍ୟକ୍ତିଙ୍କୁ ଜେଲ୍ ହାଓ୍ଵା ଖାଇବାକୁ ପଡିପାରେ।

ମୁଖ୍ୟମନ୍ତ୍ରୀ ହିମନ୍ତ ବିଶ୍ଵ ଶର୍ମା କହିଛନ୍ତି, ଆମ ସରକାର ବହୁତ କମ ବୟସରେ ମା ହେବା ବିରୋଧରେ ରହିଛୁ। ମାତ୍ର ମହିଳାଙ୍କୁ ମାତୃତ୍ଵ ପାଇଁ ଅଧିକ ସମୟ ଅପେକ୍ଷା କରିବା ଉଚିତ୍ ନୁହେଁ। ଈଶ୍ଵର ଶରୀରକୁ ଏମିତି ଗଠନ କରିଛନ୍ତି, ଯାହା ସମସ୍ତ ପାଇଁ ଉଚିତ୍ ବୟସ ରହିଛି।

ଏ ଖବର ପଢନ୍ତୁ- ‘ଥରୁରଙ୍କୁ ଭୋଟ୍ ଦେଇଥିବା କଂଗ୍ରେସ ନେତା ଶୀଘ୍ର ବିଜେପିରେ ଯୋଗଦେବେ’: ହିମନ୍ତ ବିଶ୍ବଶର୍ମା

କାହିଁକି ହଙ୍ଗାମା ?

ଆସାମ ମନ୍ତ୍ରିମଣ୍ଡଳ ସୋମବାର ନିଷ୍ପତ୍ତି ନେଇଛନ୍ତି, ଯେଉଁ ପୁରୁଷ ୧୪ ବର୍ଷରୁ କମ ବୟସର ବାଳିକାକୁ ବିବାହ କରିବେ, ତାଙ୍କ ବିରୋଧରେ ପୋକ୍ସୋ ଆଇନ ଆଧାରରେ କାର୍ଯ୍ୟାନୁଷ୍ଠାନ ନିଆଯିବ।  ଆସାମ ସରକାରଙ୍କ ଏହି ନିଷ୍ପତ୍ତିର ବ୍ୟାପକ ପ୍ରଭାବ ବଙ୍ଗାଳି ସମୁଦାୟର ମୁସଲିମଙ୍କ ଉପରେ ଅଧିକ ପଡିବ। କାରଣ ମୁସଲିମ ଯୁବତୀଙ୍କ ପାଇଁ ବିବାହ  କମ ବୟସ ରଖାଯାଇଛି। ତେଣୁ ରାଜ୍ୟରେ ବିଜେପି ସରକାର ଉପରେ ମୁସଲିମ ବିରୋଧୀର ଅଭିଯୋଗ ଲାଗିଛି।