ଭଦ୍ରକ ୧୫।୧୧: ବାଡ଼ ଖାଇଗଲା ଫସଲ । ଚୋରି ରୋକିବା ପାଇଁ ଥିବା ହୋମଗାର୍ଡ ନିଜେ ଗାଡି ଚୋର । ଚୋରି ପୁଣି ଆଉ କାହାରି ବାଇକ ନୁହେଁ ଖୋଦ ପୋଲିସ ବିଭାଗର ବାଇକ । ପୁଣି ଗାଡିର ଇଞ୍ଜିନ ନମ୍ବର ଟ୍ୟାମ୍ପରିଙ୍ଗ ସହ ରଙ୍ଗ ବଦଳାଇ ଚଲାଉଥିଲେ ନିଜେ ହୋମଗାର୍ଡ । ଏମିତି ହାସ୍ୟାସ୍ପଦ ଘଟଣା ଘଟିଛି ଭଦ୍ରକ ଜିଲ୍ଲାରେ ।
ସୂଚନାଯୋଗ୍ୟ ଯେ, ଭଦ୍ରକ ପୋଲିସର ରିଜର୍ଭ ପୋଲିସରେ କାର୍ଯ୍ୟରତ ଥିଲେ ହୋମଗାର୍ଡ ଚନ୍ଦନ ବାରିକ । ରିଜର୍ଭ ପୋଲିସକୁ ମିଳିଥିବା ଓଡି୦୫ଜେଡ୍୬୮୨୫ ନମ୍ବର ବିଶିଷ୍ଟ ବିଭାଗୀୟ ଆପାଚି ଗାଡି କ୍ୟାମ୍ପସରୁ ଚୋରି ହୋଇଥିବା ନେଇ ଆରଆଇ ଭଦ୍ରକ ଟାଉନ ଥାନାରେ ଅଭିଯୋଗ କରିଥିଲେ । ପରେ ତଦନ୍ତ ବେଳେ ଏହି ବାଇକକୁ ଏକ ଗ୍ୟାରେଜରେ ରଙ୍ଗ କରାଯାଇଥିବା ଖବର ପାଇଥିଲା ପୋଲିସ । ଧୀରେ ଧୀରେ ତଦନ୍ତ ବେଳେ ଘଟଣା ସ୍ପଷ୍ଟ ହୋଇଥିଲା ।
ହୋମଗାର୍ଡ ଚନ୍ଦନ ବାରିକ ଏହି ବାଇକ୍କୁ ନେଇ ଏରେଇଁ, ଚୁନଟି ଗ୍ରାମର ଗ୍ୟାରେଜ ମିସ୍ତ୍ରୀ ସହାଦତ ଖାଁଙ୍କ ନିକଟରେ ଇଞ୍ଜିନ ନମ୍ବର ମେସିନ ସାହାଯ୍ୟରେ ଉଡାଇ ଦେଇଥିଲେ । ପରେ ବାଇକର ରଙ୍ଗ ବଦଳାଇ ନିଜେ ଚଲାଉଥିବା ନେଇ ପୋଲିସକୁ ତଥ୍ୟ ମିଳିଥିଲା । ଏହି ଘଟଣା ପରେ ଟାଉନ ପୋଲିସ ୬୦୧/୨୩ ନମ୍ବର କେସ୍ ରୁଜୁ କରି ୩୮୦, ୪୬୭, ୪୭୮, ୩୪ ଓ ମୋଟର ଯାନ ଆଇନର ଦଫା ୧୯୨ ଅନୁଯାୟୀ ହୋମଗାର୍ଡ ଚନ୍ଦନ ବାରିକ ଓ ଗ୍ୟାରେଜ ମିସ୍ତ୍ରୀ ସହାଦତ ଖାଁକୁ ଗିରଫ କରିଛି । ଜାମିନ ନାମଞ୍ଜୁର ହେବାରୁ ଦୁଇ ଜଣଙ୍କୁ ଜେଲ୍ ପଠାଇ ଦିଆଯାଇଛି । ଘଟଣାକୁ ନେଇ ପୋଲିସ ତରଫରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
You Can Read :
wp:embed {"url":"https://www.prameyanews7.com/five-students-nabbed-by-ncb-in-jaypore/","type":"wp-embed","providerNameSlug":"prameya-news-7"}