ଭୁବନେଶ୍ୱର,୧୧/୦୨: ଏଫ୍ଆଇଏଚ୍ ପ୍ରୋ-ଲିଗ୍ରେ ଭାରତୀୟ ପୁରୁଷ ହକି ଦଳ ପ୍ରଥମ ମ୍ୟାଚରେ ସ୍ପେନକୁ ହରାଇ ବିଜୟ ଅଭିଯାନ ଆରମ୍ଭ କରିଛି । ଶନିବାର କଳିଙ୍ଗ ଷ୍ଟାଡ଼ିୟମ୍ରେ ଖେଳାଯାଇଥିବା ମ୍ୟାଚରେ ଟିମ୍ ଇଣ୍ଡିଆ ୪-୧ ଗୋଲ୍ରେ ସ୍ପେନ୍କୁ ମାତ୍ ଦେଇଛି ।
ମ୍ୟାଚ୍ ପ୍ରାରମ୍ଭରୁ ଭାରତ ପ୍ରଭାବ ବିସ୍ତାର କରିଥିଲା । ପ୍ରଥମ କ୍ବାର୍ଟରର ସପ୍ତମ ମିନିଟ୍ରେ ହର୍ମନପ୍ରୀତ ସିଂହ ଏକ ପେନାଲ୍ଟି କର୍ଣ୍ଣରକୁ ଗୋଲ୍ରେ ପରିଣତ କରି ଭାରତକୁ ୧-୦ରେ ଅଗ୍ରଣୀ କରାଇଥିଲେ । ସେହିପରି ଦ୍ୱିତୀୟ କ୍ୱାର୍ଟର ରୋମାଞ୍ଚକର ରହିଥିଲା ଖେଳ । ଭାରତ ଘନ ଘନ ଆକ୍ରମଣ କରିଥିଲା । ୨୦ତମ ମିନିଟ୍ରେ ଭାରତ ପେନାଲ୍ଟି ହାତେଇଥିଲା । ହର୍ମନପ୍ରୀତ ଶକ୍ତିଶାଳୀ ଷ୍ଟ୍ରୋକ୍ ବଳରେ ପେନାଲ୍ଟିକୁ ଗୋଲ୍ରେ ରୂପାନ୍ତରିତ କରିଥିଲେ । ଏହାପରେ ୨୪ତମ ମିନିଟ୍ରେ ଭାରତ ଆଉ ଏକ ପେନାଲ୍ଟି କର୍ଣ୍ଣର ହାସଲ କରିଥିଲା ଓ ଗୁରଜନ୍ତ ସିଂହ ଏହାକୁ ଗୋଲ୍ରେ ପରିଣତ କରିଥିଲେ । ଭାରତ ଦ୍ୱିତୀୟ କ୍ୱାର୍ଟର ଶେଷ ସୁଦ୍ଧା ୩-୦ ଗୋଲ୍ରେ ଆଗୁଆ ରହିଥିଲା ।
ତୃତୀୟ କ୍ୱାର୍ଟରରେ ସ୍ପେନ୍ ଆକ୍ରମଣ କରିଥିଲା ଓ କଠିନ ପରିଶ୍ରମର ମୂଲ୍ୟ ମିଳିଥିଲା । ୩୪ତମ ମିନିଟ୍ରେ ଦଳକୁ ମିଳିଥିବା ଏକ ପେନାଲ୍ଟି କର୍ଣ୍ଣରକୁ ମାର୍କ ମିରାଲେସ୍ ଗୋଲ୍ରେ ପରିଣତ କରିବାରେ ସଫଳ ହୋଇଥିଲେ ।
wp:embed {"url":"https://www.prameyanews7.com/u19-cwc-2024-title-clash/","type":"wp-embed","providerNameSlug":"prameya-news-7"}ଚତୁର୍ଥ କ୍ୱରାର୍ଟରରେ ସ୍ପେନ୍ ଲଢୁଆ ଖେଳ ପ୍ରଦର୍ଶନ କରିଥିଲେ ହେଁ ଭାରତ ବାଜି ମାରି ଦେଇଥିଲା । ସ୍ପେନକୁ ୨ଟି ପେନାଲ୍ଟି କର୍ଣ୍ଣର ମିଳିଥିଲା ମାତ୍ର ଦଳ ବିଫଳ ହୋଇଥିଲା । ଅନ୍ୟ ପଟରେ ଭାରତ ପକ୍ଷରୁ ଲଳିତ ଉପାଧ୍ୟାୟ ୫୦ତମ ମିନିଟ୍ରେ ଏକ ଦର୍ଶନୀୟ ଫିଲ୍ଡ ଗୋଲ୍ କରିବା ଫଳରେ ଭାରତ ୪-୧ ଗୋଲ୍ରେ ବିଜୟ ହାସଲ କରିଥିଲା ।
