ଭୁବନେଶ୍ବର, ୧୬/୧୧: ନାଟକ ମାଧ୍ୟମରେ ଏଡସ୍ ସଚେତନତା ବର୍ତ୍ତା । ଯୁବବର୍ଗଙ୍କୁ ଏଚ.ଆଇ.ଭି ବାବଦରେ ସଚେତନ କରାଯାଉଛି । ଏଡସ୍ ନିୟନ୍ତ୍ରଣ ସମିତି ପକ୍ଷରୁ ରାଜ୍ୟସ୍ତରୀୟ ନାଟକ ପ୍ରତିଯୋଗୀତା ‘ଅଭିବ୍ୟକ୍ତି’-ଦି ରେଡ୍ ଶୋ’ ଆୟୋଜିତ ହୋଇଥିଲା । ରାଜଧାନୀ ଭୁବନେଶ୍ବରର ୟୁନିଟ-୨ ମାର୍କେଟ ଅଞ୍ଚଳରେ ଏଡସକୁ ନେଇ ପ୍ରତିଯୋଗୀ ମାନେ ନାଟକ ପରିବେଷଣ କରି ସମାଜକୁ ସଚେତନତା ବାର୍ତ୍ତା ଦେଇଛନ୍ତି ।

ମଙ୍ଗଳବାର ଆରମ୍ଭ ହୋଇଥିବା ଏହି ପ୍ରତିଯୋଗୀତାରେ ଏଚଆଇଭି ପ୍ରବଣ ଅନୁଗୁଳ, ବଲାଙ୍ଗିର, ଗଞ୍ଜାମ ଓ ଖୋର୍ଦ୍ଧ ଜିଲ୍ଲାରେ ନାଟକ ପରିବେଷଣ ହୋଇଥିଲା । ଏହି ଜିଲାସ୍ତରୀୟ ନାଟକ ସଚେତନତା କାର୍ଯ୍ୟକ୍ରମରେ ବହୁ ପ୍ରତିଭା ଭାଗ ନେଇଥିଲେ । ବିଜେବି କେନ୍ଦ୍ରଶାସିତ କଲେଜ, ବଲାଙ୍ଗିର ପଞ୍ଚାୟତ ସମିତି ଡିଗ୍ରୀ କଲେଜ, ଗଞ୍ଜାମ ଅଦର୍ଶ ବିଦ୍ୟାଳୟର ଛାତ୍ରଛାତ୍ରୀମାନେ ଅଂଶଗ୍ରହଣ କରିଛନ୍ତି । ପ୍ରତିଯୋଗୀତାରେ ଗଂଜାମ ଜିଲ୍ଲା ‘ହାରିଗଲା ଏଚଆଇଭି’ ନାଟକରେ ପ୍ରଥମ ସ୍ଥାନ ଅଧିକାର କରିଛି । ଏହି ଅବସରରେ ଆସିଷ୍ଟାଣ୍ଟ ଡାଇରେକ୍ଟର ସ୍ମୃତି ସାଗରିକା କାନୁନଗୋଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଓସାକ୍ସାର କର୍ମକର୍ତ୍ତାଙ୍କ ଦ୍ବାରା ମଞ୍ଚରେ ‘ହାତରେ ହାତ ମିଶାଇବା, ଏଡସ୍ ମୁକ୍ତ ରାଜ୍ୟ ଗଠନ କରିବା’ ଉପରେ ଏକ ସ୍ଵତନ୍ତ୍ର ନାଟକ ପରିବେଷଣ କରାଯାଇଛି ।

ରାଜ୍ୟସ୍ତରୀୟ ଏହି ପ୍ରତିଯୋଗୀତାରେ ବିଚାରକ ଭାବେ ପୂର୍ବତନ ନାଟକ ନିର୍ଦ୍ଦେଶକ, ସଂସ୍କୃତି ବିଭାଗ ଧୀର ମଲିକ, ନାଟକ ସଂଘର ପୂର୍ବତନ ସଭାପତି ହରେନ୍ଦ୍ର ସାହୁ, କ୍ୟାପିଟାଲ ହସ୍ପିଟାଲର ଏଆଇଟି ମେଡିକାଲ ଅଫିସର ଡାକ୍ତର ବିଜୟ ବେହେରା ପ୍ରମୁଖ ଯୋଗଦେଇଥିଲେ ।

ସୂଚନାଯୋଗ୍ୟ ଯେ ଓଡ଼ିଶାର ଯୁବପିଢୀ ସ୍ବାସ୍ଥ୍ୟ କ୍ଷେତ୍ରରେ ତାଙ୍କର ସକାରାତ୍ମକ ଭୂମିକା ପ୍ରଦର୍ଶନ କରିବାର ଆବଶ୍ୟକତାକୁ ଦେଖି ରାଜ୍ୟର ବିଭିନ୍ନ କଲେଜରେ ରେଡକ୍ରସ୍ ସୋସାଇଟି ସହଯୋଗରେ ଓସାକ୍ସ ତରଫରୁ ୬୪୦ ରେଡ୍ ରିବନ କ୍ଲବ ଖୋଲାଯାଇଛି । ଏହା କରିଆରେ ଛାତ୍ରଛାତ୍ରୀମାନଙ୍କୁ ଏଡସ୍ କ୍ଷେତ୍ରରେ ସଚେତନ କରାଯିବା ସହିତ ସମାଜ ପ୍ରତି ନିଜର କର୍ତ୍ତବ୍ୟତୁ ଠିକ୍ ଭାବେ ସଂପାଦନ କରିବା ପାଇଁ ବିଭିନ୍ନ କାର୍ଯ୍ୟକ୍ରମ କରାଯାଉଛି ।