ଚେନ୍ନାଇ: ବରିଷ୍ଠ ରାଜନେତାଙ୍କୁ ଗଳାକାଟି ହତ୍ୟା। ତାମିଲନାଡୁର ରାଜନୈତିକ ଦଳ ହିନ୍ଦୁ ମକ୍କାଲ କାଚିର ବରିଷ୍ଠ ନେତା ମଣିକନ୍ଦନଙ୍କୁ ଗତକାଲି ରାତିରେ ମଦୁରାଇ ଠାରେ ଗଳାକାଟି ହତ୍ୟା କରାଯାଇଛି। ଗତକାଲି ବିଳମ୍ବିତ ରାତ୍ରିରେ ଦୁର୍ବୃତ୍ତମାନେ ତାଙ୍କୁ ହତ୍ୟା କରି ଫେରାର୍ ହୋଇଯାଇଥିବା ସୁଚନା ମିଳିଛି।
ମିଳିଥିବା ସୂଚନା ଅନୁସାରେ, ଦକ୍ଷିଣ ଜିଲ୍ଲାରେ ଦଳର ଉପମୁଖ୍ୟ ମଣିକନ୍ଦନ ଗତକାଲି ରାସ୍ତାରେ ଯାଉଥିବା ବେଳେ କିଛି ଦୁର୍ବୃତ୍ତ ତାଙ୍କୁ ଅଟକାଇଥିଲେ। ସମସ୍ତେ ମିଶି ତାଙ୍କ ଉପରେ ଆକ୍ରମଣ କରିଥିଲେ। ତାଙ୍କୁ ଗଳା କାଟି ହତ୍ୟା କରିବା ପରେ ଘଟଣା ସ୍ଥଳରୁ ଫେରାର୍ ହୋଇଯାଇଥିଲେ।
୪୦ ବର୍ଷୀୟ ମଣିକନ୍ଦନଙ୍କର ମଦୁରାଇର ଏମ୍କେ ନଗର ଠାରେ ଏକ ସୁନା ଦୋକାନ ରହିଛି। ମଙ୍ଗଳବାର ରାତିରେ ସେ ତାଙ୍କ ଦୋକାନ ପାଖରେ ଚାଲୁଥିବା ବେଳେ ଦୁଇ ଦୁର୍ବୃତ୍ତ ପଛରୁ ଆସି ତାଙ୍କ ଏକ ଦାଆରେ ତାଙ୍କ ବେକ କାଟିଦେଇଥିଲେ। ଏହାପରେ ସେମିତି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ତାଙ୍କୁ ରାସ୍ତାରେ ଛାଡ଼ି ଚାଲିଯାଇଥିଲେ। ଏହାପରେ ମଣିକନ୍ଦନଙ୍କୁ ରାଜାଜୀ ସରକାରୀ ହସ୍ପିଟାଲ୍କୁ ନିଆଯାଇଥିଲା। ସେଠାରେ ତାଙ୍କର ମୃତ୍ୟୁ ହୋଇଛି।
ଏହି ଘଟଣାରେ ଜୟହିନ୍ଦପୁରମ ପୁଲିସ ଏକ ମାମଲା ଦାୟର କରି ତଦନ୍ତ ଚଳାଇଛି। ତେବେ ହତ୍ୟା ବ୍ୟକ୍ତିଗତ ଶତ୍ରୁତାକୁ ନେଇ ହୋଇଛି କି ରାଜନୈତିକ ଶତ୍ରୁତାକୁ ନେଇ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇ ନାହିଁ। ସେହିପରି ଦୁର୍ବୃତ୍ତମାନଙ୍କୁ ଗିରଫ କରିବା ତ ଦୂରର କଥା ଚିହ୍ନଟ ବି କରିପାରି ନାହିଁ।
