କଟକ ୧୦/୦୨: ୪୭୭ ପୋଲିସ ସବଇନ୍ସପେକ୍ଟର ନିଯୁକ୍ତି ଉପରେ ରୋକ ଲଗାଇଲେ ହାଇକୋର୍ଟ। ୨୦୨୧ରେ ଓଡିଶା ପୋଲିସ ସବ ଇନ୍ସପେକ୍ଟର ନିଯୁକ୍ତି ଲାଗି ଯେଉଁ ବିଜ୍ଞପ୍ତି ପ୍ରକାଶ ପାଇଥିଲା, ତା ଉପରେ ହାଇକୋର୍ଟ ଆଜି ଅନ୍ତରୀଣ ରହିତାଦେଶ ଜାରି କରିଛନ୍ତି। ଅନ୍ୟ ଆଦେଶ ପର୍ଯ୍ୟନ୍ତ ସମ୍ପୃକ୍ତ ବିଜ୍ଞପ୍ତିରେ କୌଣସି ପଦକ୍ଷେପ ଗ୍ରହଣ ନକରିବାକୁ ହାଇକୋର୍ଟ ବାରଣ କରିଛନ୍ତି। ସମ୍ପୃକ୍ତ ବିଜ୍ଞପ୍ତି କୁ କାହିଁକି ରଦ୍ଧ କରାନଯିବ ସେନେଇ ରାଜ୍ୟ ସରକାରଙ୍କୁ ଜବାବ ଦେବାକୁ ଶୁକ୍ରବାର କୋର୍ଟ ନୋଟିସ ଜାରି କରିଛି। ଆସନ୍ତା ମାର୍ଚ୍ଚ ୯ରେ ମାମଲାର ପରବର୍ତୀ ଶୁଣାଣି ହେବ ବୋଲି କୁହାଯାଇଛି।

ସୂଚନାଥାଉକି, ୨୦୨୧ ଜୁନ ୨୨ରେ ୪୭୭ଟି ପୋଲିସ ଏସଆଇ ପୋଷ୍ଟ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ପ୍ରାର୍ଥୀମାନଙ୍କ ପାଇଁ ବୟସ ସୀମା ୩୨ ରହିଥିଲା। କିନ୍ତୁ ୨୦୨୨ ମସିହା ଜାନୁୟାରୀ ୧୧ରେ ରାଜ୍ୟ ସରକାର ଏକ ବିଜ୍ଞପ୍ତି ଜରିଆରେ ସ୍ପଷ୍ଟ କଲେ ଯେ, ସମସ୍ତ ସରକାରୀ ଚାକିରୀ ପାଇଁ ବୟସ ସୀମା ୩୮କୁ ବଢ଼ାଯାଇଛି। ପୁଣି ସେହି ଜାନୁୟାରୀ ମାସ ୧୫ରେ ଆଉ ଏକ ବିଜ୍ଞପ୍ତିରେ ସରକାର ସ୍ପଷ୍ଟ କଲେଯେ, ୨୦୨୧ରେ ପ୍ରକାଶ ପାଇଥିବା ନିଯୁକ୍ତି ବିଜ୍ଞପ୍ତିରେ ଯେଉଁମାନେ ଆବେଦନ କରିଛନ୍ତି ସେମାନଙ୍କ ପାଇଁ ବୟସ କୋହଳ ହେବ ନାହିଁ।ଫଳରେ ଏହାକୁ ଚ୍ୟାଲେଞ୍ଜ କରି କିଛି ପ୍ରାର୍ଥୀ ହାଇକୋର୍ଟଙ୍କ ଦ୍ୱାରସ୍ତ ହୋଇଥିଲେ।