ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ସାରା ଦେଶରେ ଥିବା ଏମ୍ସରେ କେନ୍ଦ୍ରୀୟସ୍ତରରେ ନିଯୁକ୍ତି ଦେବା ଉପରେ ବିଚାର କରୁଛନ୍ତି । ଏହି ନିଯୁକ୍ତି ଶିକ୍ଷକ ଏବଂ ଅଣ-ଶିକ୍ଷକ ଉଭୟ ବିଭାଗରେ କରାଯିବ । ବର୍ତ୍ତମାନ ସମୟରେ ଦେଶରେ ନୂତନ ଭାବେ ଖୋଲାଯାଇଥିବା ଏମ୍ସରେ କର୍ମଚାରୀଙ୍କ ଅଭାବ ଏକ ବଡ଼ ସମସ୍ୟା ହୋଇ ରହିଛି । ଏହି କାରଣରୁ କେନ୍ଦ୍ର ସରକାର ନିଜେ ଏହି ସଂସ୍ଥା ଗୁଡିକରେ ନିଯୁକ୍ତି ଦେବା ଉପରେ ବିଚାର କରୁଛନ୍ତି । ବର୍ତ୍ତମାନ ସମୟରେ ଏମ୍ସ ସଂସ୍ଥାନ ନିଜ ସ୍ତରରେ କର୍ମଚାରୀଙ୍କୁ ନିଯୁକ୍ତି ଦେଇଥାନ୍ତି ।

ଏମ୍ସରେ କେନ୍ଦ୍ର ସରକାରଙ୍କ ଦ୍ୱାରା କର୍ମଚାରୀ ନିଯୁକ୍ତି ଉପରେ ବିଚାର କରିବା ପାଇଁ ଗୋଟିଏ କମିଟି ଗଠନ କରାଯାଇଛି । ଏଥିରେ ନୀତି ଅୟୋଗ ସଦସ୍ୟ ଡା.ଭିକେ ପଲ, ପ୍ରଧାନମନ୍ତ୍ରୀ ସ୍ୱାସ୍ଥ୍ୟ ସୁରକ୍ଷା ଯୋଜନାର ଅତିରିକ୍ତ ସଚିବ, ସ୍ୱାସ୍ଥ୍ୟ ମନ୍ତ୍ରାଳୟର ଅଧିକାରୀ, ନୂଆଦିଲ୍ଲୀ ସ୍ଥିତ ଏମ୍ସର ନିର୍ଦ୍ଦେଶକ ସାମିଲ ଅଛନ୍ତି । ଉଲ୍ଲେଖଯୋଗ୍ୟ ଯେ ଗତ ଜାନୁଆରୀ ୮ରେ ଭୁବନେଶ୍ୱର ଏମ୍ସରେ ସେଣ୍ଟ୍ରାଲ ଇନଷ୍ଟିଚ୍ୟୁଟ୍ ବଡି (ସିଆଇବି)ର ବୈଠକ ହୋଇଥିଲା । ଏହି ବୈଠକରେ ବିଭିନ୍ନ ଏମ୍ସରେ ଫେକଲ୍ଟି ଏବଂ ଅନ୍ୟ କର୍ମଚାରୀଙ୍କ ଶୀଘ୍ର ନିଯୁକ୍ତି ଉପରେ ଆଲୋଚନା କରିଥିଲେ ।

ଉଲ୍ଲେଖଯୋଗ୍ୟ ଯେ ଦେଶର ୧୮ ନୂଆ ଏମ୍ସରେ ପ୍ରାୟ ୪୪ ପ୍ରତିଶତ ଫେକଲ୍ଟି ପଦ ଖାଲି ରହିଛି । ଏମ୍ସ ରାଜକୋଟରେ ୧୮୩ ପଦ ମଞ୍ଜୁର ରହିଛି କିନ୍ତୁ ଏଥିରୁ ମାତ୍ରା ୪୦ ପଦରେ ହିଁ ନିଯୁକ୍ତି ମିଳିଛି । ସ୍ୱାସ୍ଥ୍ୟ ମନ୍ତ୍ରାଳୟ ଗତ ବର୍ଷ ଲୋକସଭାରେ ଏହି ସୂଚନା ଦେଇଥିଲେ । ସ୍ୱାସ୍ଥ୍ୟ ମନ୍ତ୍ରାଳୟର ଡାଟା ଅନୁସାରେ, ଦେଶର ନୂଆ ୧୮ ଏମ୍ସରେ ୪୦୨୬ ପଦ ପାଇଁ ମଞ୍ଜୁରୀ ଦିଆଯାଇଥିଲା, କିନ୍ତୁ ଏଥିରୁ ୨୨୫୯ ପଦରେ ନିଯୁକ୍ତି ମିଳିଛି । ଏମ୍ସରେ ନିଯୁକ୍ତି ପାଇଁ ସରକାର ପ୍ରଫେସର ପଦ ପାଇଁ ବୟସସୀମା ୫୦ ବର୍ଷରୁ ବଢାଇ ୫୮ ବର୍ଷ କରାଯାଇଛି । ଏହାସହ ଅବସର ବୟସ ମଧ୍ୟ ବଢାଇ ୭୦ ବର୍ଷ କରାଯାଇଛି ।