ହାଇତି ୦୫/୦୩: କାରବୀୟ ଦେଶ ହାଇତିରେ ବ୍ୟାପକ ହିଂସାକାଣ୍ଡ ଘଟିଛି । ଗତ ଫେବ୍ରୁଆରୀ ୨୯ ତାରିଖରୁ ସଶସ୍ତ୍ର ଗୋଷ୍ଠୀର ସଦସ୍ୟମାନେ ଦେଶର ବିଭିନ୍ନ ଭାଗରେ ଜଳାପୋଡା କରିଛନ୍ତି । ସରକାରୀ ସମ୍ପତ୍ତି ଓ ଦୋକାନ ବଜାରେ ନିଆଁ ଲଗାଇ ପୋଡିଦେବା ସହ ଲୁଟପାଟ କରିଛନ୍ତି । ମହିଳା ଓ ପିଲାଙ୍କ ଉପରେ ଅତ୍ୟାଚାର ଆରମ୍ଭ କରିଦେଇଛନ୍ତି । ସେମାନଙ୍କ ଆକ୍ରମଣରୁ ପୁଲିସ ଥାନା ମଧ୍ୟ ବାଦ୍ ପଡିନାହିଁ ।
ହିଂସାକାଣ୍ଡ ଯୋଗୁ ଏପର୍ଯ୍ୟନ୍ତ ୧୨ ଜଣଙ୍କର ମୃତ୍ୟୁ ଘଟିଛି । ସୂଚନା ଅନୁସାରେ ସଶସ୍ତ୍ର ଗୋଷ୍ଠୀର ସଦସ୍ୟମାନେ ଦେଶର ଦୁଇଟି ପ୍ରମୁଖ ଜେଲ୍ ଉପରେ ଆକ୍ରମଣ କରିଛନ୍ତି । ଫଳରେ ପୋର୍ଟ ଔ ପ୍ରିନ୍ସ ନ୍ୟାସନାଲ ପେନିଟେନ୍ସିଆରୀ ଜେଲ୍ରୁ ୩୬୮୭ କଏଦୀ ଫେରାର ହୋଇଯାଇଛନ୍ତି । ସେହିଭଳି କ୍ରକ୍ସ ଡେକ୍ସ ବୋକେଟ୍ ଜେଲ୍ରେ ଥିବା ୫୦୦ରୁ ଅଧିକ କଏଦୀ ମଧ୍ୟ ପଳାଇଛନ୍ତି ।
ପରିସ୍ଥିତିକୁ ନିୟନ୍ତ୍ରଣ କରିବାରେ ସେନା ବିଫଳ ହୋଇଛି । ଫଳରେ ଦେଶରେ ଜରୁରି ପରିସ୍ଥିତ ଲାଗୁ କରାଯାଇଛି । ପ୍ରଧାନମନ୍ତ୍ରୀ ଆରିଏଲ ହେନ୍ରୀ ଗତ ୨୯ ତାରିଖରେ ବିଦେଶ ଗସ୍ତରେ କେନିଆ ଯିବା ପରଠାରୁ ଏହି ହିଂସା ଆରମ୍ଭ ହୋଇଛି । ପ୍ରକୃତ କଥା ହଉଛି କେନିଆ ନେତୃତ୍ୱାଧୀନ ବହୁରାଷ୍ଟ୍ରୀୟ ସୁରକ୍ଷା ବଳକୁ ହାଇତିରେ ମୁତୟନ କରିବା ଉଦ୍ଦେଶ୍ୟରେ ହେନ୍ରୀ ନାଇରୋବି ଯାଇଛନ୍ତି ।
ଯାହାକୁ ନେଇ ଦେଶର ବିଭିନ୍ନ ଅପରାଧୀ ଗ୍ୟାଙ୍ଗ କଡା ଆପତ୍ତି ଉଠାଇଛନ୍ତି । ଗ୍ୟାଙ୍ଗ ଲିଡର ଜିମି ଚେରିଜର ଓରଫ ବାର୍ବେକ୍ୟୁ କହିଛନ୍ତି ସେମାନଙ୍କର ମୁଖ୍ୟ ଦାବି ହେଉଛି ପ୍ରଧାନମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ । ହେନ୍ରୀ କ୍ଷମତାରୁ ନ ହଟିବା ପର୍ଯ୍ୟନ୍ତ ଦେଶରେ ଏଭଳି ହିଂସା ଜାରି ରହିବ । ସେ କହିଛନ୍ତି ସାଧାରଣ ଜନତାଙ୍କ ସହିତ ସେମାନଙ୍କର ଶତ୍ରୁ ନୁହନ୍ତି କିମ୍ବା ସେମାନଙ୍କ ସହିତ କୌଣସି ବିବାଦ ନାହିଁ । ଜନତାଙ୍କୁ ସେମାନେ କ୍ଷତି ପହଞ୍ଚାଇବାକୁ ଚାହୁନାହାନ୍ତି ।
ସେମାନଙ୍କର ମୁଖ୍ୟ ଉଦ୍ଦେଶ୍ୟ ହେଉଛି ହେନ୍ରୀଙ୍କୁ ହଟାଇବା । ସେନା ଓ ପୁଲିସ ତୁରନ୍ତ ହେନରୀଙ୍କୁ ଗିରଫ କରନ୍ତୁ ବୋଲି ସେ ଦାବି କରିଛନ୍ତି । ଦେଶର ଶେଷ ରାଷ୍ଟ୍ରପତି ଜୋଭେନେଲ ମୋଇଜଙ୍କ ହତ୍ୟା ପରେ ୨୦୨୧ରେ ହେନ୍ରୀ ଦେଶର ପ୍ରଧାନମନ୍ତ୍ରୀ ହୋଇଥିଲେ । ପୂର୍ବରୁ ସେ ଘୋଷଣା କରିଥିଲେ କି ଫେବ୍ରୁଆରୀ ୭ ତାରିଖ ସୁଦ୍ଧା କ୍ଷମତା ସ୍ଥାନାନ୍ତର କରିବେ ଓ ଦେଶରେ ସାନି ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ନିର୍ବାଚନ କରାଇବେ ।
ମାତ୍ର ଧାର୍ଯ୍ୟ ସମୟ ଗଡିଯାଇଥିଲେ ମଧ୍ୟ ସେ ନିର୍ବାଚନ କରାଇନାହାନ୍ତି । ଫଳରେ ତାଙ୍କ ବିରୋଧରେ ଅସନ୍ତୋଷ ଦେଖାଦେଇଛି । ବିଭିନ୍ନ ସ୍ଥାନରେ ବିଦ୍ରୋହ ଆରମ୍ଭ ହୋଇଛି । ଏହି ବିଦ୍ରୋହକୁ ଚପାଇବା ଲାଗି ଦେଶରେ ବହୁରାଷ୍ଟ୍ରୀୟ ସୁରକ୍ଷା ବଳକୁ ନିୟୋଜିତ କରିବାକୁ ଚାହୁଁଛନ୍ତି । ଅନ୍ୟପକ୍ଷରେ ହେନ୍ରୀ କହିଛନ୍ତି ନିର୍ବାଚନ କରାଇବା ପୂର୍ବରୁ ଦେଶରେ ଆଇନ ଶୃଙ୍ଖଳା ବଜାୟ ରଖାଯିବା ଆବଶ୍ୟକ । ସେଥିପାଇଁ ଜାତିସଂଘ ସମର୍ଥିତ ସେନା ସେ ମୁତୟନ କରିବାକୁ ଚାହାନ୍ତି ।
you can also read...
wp:embed {"url":"https://www.prameyanews7.com/nadda-resigned-from-himachal-pradesh-rajya-sabha-seat/","type":"wp-embed","providerNameSlug":"prameya-news-7"} /wp:embed