ବୁଏନୋସ୍ ଆଇରେସ୍: ବିଶ୍ୱର କିମ୍ବଦନ୍ତୀ ଆର୍ଜେଣ୍ଟିନା ଫୁଟବଲ ଷ୍ଟାର୍ ଲିଓନଲ ମେସିଙ୍କୁ ଧମକ। ବାଇକ୍‌ରେ ଆସି ଆଖିବୁଜା ଗୁଳି ଚଳାଇଲେ। ଏହାପରେ ମେସିଙ୍କ ନାଁରେ ଏକ ଧମକପୂର୍ଣ୍ଣ ଚିଟି ଛାଡ଼ିଗଲେ। ଆର୍ଜେଣ୍ଟିନା ରାଜଧାନୀ ବୁଏନୋସ୍ ଆଇରେସରୁ ଉତ୍ତରପଶ୍ଚିମା ଦେଇ ୩୨୦ କିମି ଦୂର ରୋସାରିଓ ସହରରେ ଏଭଳି ଘଟଣା ଘଟିଛି।

ରୋସାରିଓ ହେଉଛି ମେସିଙ୍କ ଜନ୍ମସ୍ଥାନ। ଏଠାରେ ତାଙ୍କ ପତ୍ନୀ ଆଣ୍ଟୋନେଲା ପରିବାର ଏକ ସୁପରମାର୍କେଟ୍‌ର ପ୍ରାଞ୍ଚାଇଜ୍‌ ଚଳାଉଛନ୍ତି। ଗୁରୁବାର ଭୋର ୩ଟା ସମୟରେ ମେସିଙ୍କ ପରିବାର ଚଳାଉଥିବା ସୁପରମାର୍କେଟ୍‌ରେ ଏହି ଗୁଳିକାଣ୍ଡ ହୋଇଛି।
ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ, ଦଇଜଣ ବ୍ୟକ୍ତି ବାଇକ୍‌ରେ ଆସି ସୁପରମାର୍କେଟ୍‌ ବାହାରେ ଧୁଆଁଦାର ଗୁଳିମାଡ଼ କରିଥିଲେ। ୧୪ ଥର ଗୁଳି ଚଲାଇବା ପରେ ମେସିଙ୍କ ନାଁରେ ଏକ ଚିଠି ଛାଡ଼ିଯାଇଥିଲେ।

ଯେଉଁଥିରେ ଲେଖାଥିଲା “ମେସି ଆମେ ତୁମ ଅପେକ୍ଷା ରହିଛୁ। ଜାଭକିନ ନିଜେ ଜଣେ ଡ୍ରଗ୍ସ ତସ୍କର। ତେଣୁ ସେ ତୁମକୁ ରକ୍ଷା କରିପାରିବେନି।” ତେବେ ସୌଭାଗ୍ୟର କଥା ଯେ ଏହି ଗୁଳିକାଣ୍ଡରେ କାହାର କିଛି କ୍ଷତି ହୋଇ ନାହିଁ। ତେବେ ଫାଇରିଂ କରିଥିବା ଲୋକେ କିଏ ସେମାନଙ୍କ ପରିଚୟ ଏପର୍ଯ୍ୟନ୍ତ ମିଳିପାରି ନାହିଁ। ପୁଲିସ ତଦନ୍ତ ଆରମ୍ଭ କରିଛି।