ଅହମ୍ମଦାବାଦ ୨୬/୦୯: ଗୁଜରାଟ କ୍ରିକେଟ୍ ଆସୋସିଏସନ୍ ଅଧିନସ୍ଥ ଏକ ୧୯ବର୍ଷରୁ କମ୍ କ୍ରିକେଟ୍ ଟୁର୍ଣ୍ଣାମେଣ୍ଟରେ ଅହମ୍ମଦାବାଦର ଦ୍ରୋଣ ଦେଶାଇ ୪୯୮ ରନ୍ର ଇନିଂସ ଖେଳି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଛନ୍ତି । ଅହମ୍ମଦାବାଦ କ୍ରିକେଟ୍ ଆସୋସିଏସନ୍ ଆନୁକୂଲ୍ୟରେ ଆୟୋଜିତ ୧୯ ବର୍ଷରୁ କମ୍ ଦିୱାନ ବଲ୍ଲୁଭାଇ କପ୍ କ୍ରିକେଟ୍ ଟୁର୍ଣ୍ଣାମେଣ୍ଟରେ ସେଣ୍ଟ ଜାଭିୟର୍ସ ପକ୍ଷରୁ ଖେଳୁଥିବା ଦ୍ରୋଣା ଜେଏଳ ଇଂଲିଶ ସ୍କୁଲ ବିପକ୍ଷରେ ଏହି ରେକର୍ଡ ଇନିଂସ ଖେଳିଛନ୍ତି ।
ଏହି ଇନିଂସରେ ଦ୍ରୋଣ ୩୨୦ଟି ବଲ୍ର ସାମ୍ନା କରି ୭ଟି ଛକା ଓ ୮୬ଟି ଚୌକା ମାରିଥିଲେ । ତାଙ୍କ ଇନିଂସ ବଳରେ ସେଣ୍ଟ ଜାଭିୟର୍ସ ଇନିଂସ ଓ ୭୧୨ ରନ୍ରେ ଜେଏଲ ଇଂଲିଶ ସ୍କୁଲ୍କୁ ହରାଇଥିଲା । ଭାରତୀୟ କ୍ରିକେଟ୍ରେ ଏହା ଷଷ୍ଠ ବୃହତ୍ତମ ଇନିଂସ । ସର୍ବ ବୃହତ୍ ଇନିଂସ ରେକର୍ଡ ମୁମ୍ବାଇର ପ୍ରଣବ ଧନୱାଡେଙ୍କ ନାମରେ ରହିଛି । ସେ ଅପରାଜିତ ୧୦୦୯ ରନ୍ର ଇନିଂସ ଖେଳିଥିଲେ ।
ଏହା ବ୍ୟତୀତ ପୃଥ୍ୱୀ ଶ ୫୪୬, ଡିଆର ହାଭେୱାଲା ୫୧୫, ଚମନଲାଲ ଅପରାଜିତ ୫୦୬ ଓ ଅରମାନ ଜାଫର ୪୯୮ ରନ୍ର ଇନିଂସ ଖେଳି ପ୍ରଥମ ୫ଟି ସ୍ଥାନରେ ରହିଛନ୍ତି । ଦ୍ରୋଣ ପୂର୍ବରୁ ଗୁଜରାଟ ୧୪ବର୍ଷରୁ କମ୍ କ୍ରିକେଟ୍ ଦଳର ସଦସ୍ୟ ରହିସାରିଛନ୍ତି ।
