ନୂଆଦିଲ୍ଲୀ: ଜିଏସଟି କାଉନସିଲର ଶନିବାର ହେବାକୁ ଥିବା ବୈଠକରେ ଗୁଟଖା, ପାନ ମସଲା ପରି ପଦାର୍ଥ ଉପରେ ଏକ୍ସଟ୍ରା ଟ୍ୟାକ୍ସ ଲାଗୁ କରିବା ଉପରେ ଆଲୋଚନା ହୋଇପାରେ । ଉଲ୍ଲେଖଯୋଗ୍ୟ ଯେ ମନ୍ତ୍ରିସ୍ତରୀୟ କମିଟି(ଜିଓଏମ)ର ରିପୋର୍ଟରେ ପାନ ମସଲା ଏବଂ ଗୁଟଖା କମ୍ପାନିଙ୍କ ଦ୍ୱାରା ଅଧିକ ଟ୍ୟାକ୍ସ ଚୋରି ମାମଲା ବିଷୟରେ ଉଲ୍ଲେଖ କରାଯାଇଛି । ଏହାସହ ଅଧିକ ଟିକସ ଲାଗୁ ନେଇ ମଧ୍ୟ ଉଲ୍ଲେଖ କରାଯାଇଛି ।
ରିପୋର୍ଟ ଅନୁସାରେ ଜିଓଏମ ଏକ ବିଶିଷ୍ଟ ଟ୍ୟାକ୍ସ ଆଧାରିତ ଲେଭିର ପ୍ରସ୍ତାବ ଦେଇଛି । ଏହା ସାମଗ୍ରୀର ଖୁଚୁରା ମୂଲ୍ୟ ସହ ଯୋଡି ହୋଇ ରହିବ । ପ୍ୟାନେଲର ରିପୋର୍ଟରେ ପାନ ମସଲା, ହୁକ୍କା, ଚିଲମ ଏବଂ ଅନ୍ୟ ତମାଖୁ ଜାତୀୟ ସାମଗ୍ରୀ ସହ ମୋଟ ୩୮ଟି ସାମଗ୍ରୀ ଉପରେ ବିଶିଷ୍ଟ ଟ୍ୟାକ୍ସ ରେଟ୍ସର ପ୍ରସ୍ତାବ ଦେଇଛି । ଏହା ଏହି ସାମଗ୍ରୀର ଖୁଚୁରା ବିକ୍ରି ମୂଲ୍ୟର ୧୨ ପ୍ରତିଶତରୁ ୬୯ ପ୍ରତିଶତ ହୋଇପାରେ । ଉଲ୍ଲେଖଯୋଗ୍ୟ ଯେ ବର୍ତ୍ତମାନ ସମୟରେ ଏହି ସାମଗ୍ରୀ ଉପରେ ୨୮ ପ୍ରତିଶତ ଜିଏସଟି ଲାଗିଥାଏ ।
ରିପୋର୍ଟ ଅନୁସାରେ, ଓଡ଼ିଶାର ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କ ନେତୃତ୍ୱରେ ମନ୍ତ୍ରିସ୍ତରୀୟ ପ୍ୟାନେଲ ଏହି ପ୍ରସଙ୍ଗରେ ନିଜ ଚୂଡାନ୍ତ ରିପୋର୍ଟ ହସ୍ତାନ୍ତର କରିସାରିଛି । ଶନିବାର ହେବାକୁ ଥିବା ଜିଏସଟି କାଉନସିଲ ବୈଠକରେ ଏହାକୁ ଆଗତ କରାଯିବାର ସମ୍ଭାବନା ରହିଛି । ଯଦି ରିପୋର୍ଟକୁ ମଞ୍ଜୁରୀ ଦିଆଯାଏ, ତେବେ ଖୁଚୁରା ଏବଂ ପାଇକାରୀ ଉଭୟ ସ୍ତରରେ ଟ୍ୟାକ୍ସ ଚୋରି ରୋକିବାରେ ବଡ଼ ସହାୟକ ହେବ।
