ଢେଙ୍କାନାଳ ୦୭/୦୩: ଅପପ୍ରଚାର ବିବାଦରୁ ଗୋଷ୍ଠୀ ସଂଘର୍ଷ। ଢେଙ୍କାନାଳ ଜିଲ୍ଲା ସଦର ଥାନା ଇଚ୍ଛାପୁର ଗାଁରେ ଏପରି ଘଟିଛି। ଦୁର୍ବୃତ୍ତଙ୍କ ଆକ୍ରମଣରେ ଗଲୁଅ ସାହିର ଦୁଇ ଭାଇ ବିଷ୍ଣୁ ପ୍ରସାଦ ଓ ମହେଶ୍ୱର ରାଉତ ଗୁରୁତର ହୋଛନ୍ତି। ସେମାନଙ୍କୁ ସଙ୍କଟାପନ୍ନ ଅବସ୍ଥାରେ କଟକ ବଡ଼ ମେଡ଼ିକାଲ୍‌କୁ ସ୍ଥାନାନ୍ତର କରାଯାଇଛି। ଦୁର୍ବୃତ୍ତମାନେ କଟୁରି ଓ ଟାଙ୍ଗିଆରେ ଆକ୍ରମଣ କରିଥିବା ଜଣାପଡ଼ିଛି।

ଖବର ଅନୁସାରେ, ଉଭୟ ବିଷ୍ଣୁ ଓ ମହେଶ୍ୱର ବାହାରେ ରହି କାମ କରନ୍ତି। ତାଙ୍କ ନାଁରେ ଜଣେ ମହିଳାଙ୍କୁ ଯୋଡି ଗାଁର ପ୍ରେମାନନ୍ଦ ରାଉତଙ୍କ ପରିବାର ଅପପ୍ରଚାର କରିଥିଲେ। ତେଣୁ ଦୋଳ ପାଇଁ ଗାଁକୁ ଫେରିବା ପରେ ମଙ୍ଗଳବାର ସନ୍ଧ୍ୟାରେ ଉଭୟ  ପ୍ରେମାନନ୍ଦଙ୍କ ଘରକୁ ଯାଇ ପଚାରିବାରୁ ଝଗଡ଼ା ହୋଇଥିଲା। ଫଳରେ ଉଭୟ ପ୍ରେମାନନ୍ଦଙ୍କ ବିଷ୍ଣୁ ପ୍ରସାଦଙ୍କ ପରିବାର ମଧ୍ୟରେ ଗୋଷ୍ଠୀ ସଂଘର୍ଷ ହୋଇଥିଲା। 

ସଂଘର୍ଷ ବେଳେ ଅଭିଯୁକ୍ତ କଟୁରି, ଟାଙ୍ଗିଆ ଓ ଶାବଳ ଆଦିରେ ଆକ୍ରମଣ କରିଥିଲେ। ଏହା ପରେ ଆକ୍ରମଣ କାରୀମାନେ ଫେରାର ହୋଇ ଯାଇଛନ୍ତି। ଆକ୍ରମଣର ଶିକାର ବିଷ୍ଣୁପ୍ରସାଦଙ୍କ ପରିବାର ପକ୍ଷରୁ ଭାପୁର ଫାଣ୍ଡି ଓ ଥାନାରେ ଏନେଇ ଏତଲା ଦେଇଛନ୍ତି।  ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଛି।