ବାଲିପାଟଣା ୦୬/୦୬; ବୃକ୍ଷ ପାଇଁ ଜୀବନ ଉତ୍ସର୍ଗିକୃତ । ନା ବିବାହ କଲେ ନା ଚାକିରି କଲେ । ପିଲା ବେଳରୁ ଆଜି ପର୍ଯ୍ୟନ୍ତ ରହିଆସିଛି ବୃକ୍ଷ ସାଥିରେ । ଅଂଚଳକୁ ସବୁଜମୟ କରିଛନ୍ତି ସେ। ବୃକ୍ଷ ହିଁ ହେଉଛନ୍ତି ତାଙ୍କ ବନ୍ଧୁ। ଆଜି ପର୍ଯ୍ୟନ୍ତ ପ୍ରାୟ ୧୫ ହଜାର ବୃଷ ରୋପଣ କରିସାରିଛନ୍ତି ସେ । ଆଖପାଖ ଅଞ୍ଚଳରେ ଏହି ବ୍ୟକ୍ତି ଜଣଙ୍କ ଗ୍ରୀନ ମ୍ୟାନ୍ ନାଁରେ ପରିଚିତ ।
ରାଜଧାନୀ ଉପକଣ୍ଠ ବାଲିଅନ୍ତା ବ୍ଲକ ସରକଣା ଗାଁର ପ୍ରସନ୍ନ ସାମନ୍ତରାୟ । ଗ୍ରୀନ୍ ମ୍ୟାନ୍ ଭାବେ ଅଂଚଳରେ ବେଶ ପରିଚିତ । ବୟସ ୫୭ ଛୁଇଁଲାଣି । ସବୁଜ ପୋଷାକ ସାଙ୍ଗକୁ ସବୁଜ ପରିବେଶରେ ରୁହନ୍ତି। ବୃଷ ରୋପଣ କରିବା ନିଶା । ସକାଳୁ ରାତି ପର୍ଯ୍ୟନ୍ତ ତାହ୍କର ଖାଲି ଗଛ ଚିନ୍ତା। ସକାଳ ହେଲେ ସାଇକେଲ ଟିଏ ଧରି ବାହାରି ପଡନ୍ତି ବୃକ୍ଷ ରୋପଣ କରିବା ପାଇଁ । ବୃଷ ପାଇଁ ବିବାହ କରିନାହାନ୍ତି କି ଚାକିରି ପଛରେ ଗୋଡାଇ ନାହାନ୍ତି । ବିନା ସ୍ଵାର୍ଥରେ ବୃଷ ରୋପଣ କରିଚାଲିଛନ୍ତି ଏବଂ ଆଗକୁ ମଧ୍ୟ ଏଭଳି କାମ ଜାରି ରଖିବେ ବୋଲି କହିଛନ୍ତି ।୧୦ ଏକରରୁ ଉର୍ଦ୍ଧ ସରକାରୀ ଜାଗାରେ ବୃଷ ରୋପଣ କରିସାରଛି ପ୍ରସନ୍ନ । କରଂଚ, ନିମ, ବେଲ, ଗମ୍ଭାରୀ, ବଉଳକୋଳି, ସିରିସ, ଅର୍ଜୁନ, ଅଶୋକ, ଜାମୁ, ଚମ୍ପା, ଔଷଧିୟ ବୃକ୍ଷ ରୋପଣ କରିଛନ୍ତି ।
ବିଜେବି କଲେଜ ରୁ ଅର୍ଥ ଶାସ୍ତ୍ରରେ ସ୍ନାତକ ଏବଂ ଉତ୍କଳ ବିଶ୍ବବିଦ୍ୟାଳୟରୁ ସ୍ନାତକୋତର ଶିକ୍ଷା ଲାଭ କରିଛି । ମାତ୍ର ବୃକ୍ଷ ରୋପଣ ପାଇଁ ସେ ଚାକିରି ପଛରେ ଗୋଡାଇ ନାହାନ୍ତି । ସବୁଜମୟ ପରିବେଶ ତାଙ୍କର ଲକ୍ଷ । ପ୍ରସନ୍ନଙ୍କ ଏପରି ପ୍ରୟାସକୁ ଅଂଚଳବବାସୀ ବେଶ ପ୍ରସଂସା କରିଛି । ତାଙ୍କ ଦ୍ବାରା ସୃଷ୍ଟି ଜଙ୍ଗଲକୁ ସ୍ଥାନୀୟ ପ୍ରସାଶନ ସୁରକ୍ଷା ଦେବାକୁ ନିବେଦନ କରିଛନ୍ତି ।
