ନୂଆଦିଲ୍ଲୀ ୦୧/୧୧ : ସରକାର ସାରା ଦେଶରେ ସି-ପ୍ଲେନ୍ ସେବା ପାଇଁ ଆଉ ୧୪ଟି ୱାଟର ବେସ ତିଆରି କରିବାକୁ ଯୋଜନା କରୁଛନ୍ତି। ଅକ୍ଟୋବର ୩୧ ତାରିଖ ଶନିବାର ଦିନ ପ୍ରଧାନମନ୍ତ୍ରୀ ମୋଦି ଗୁଜରାଟ କେବଡିୟାରେ ଷ୍ଟାଚ୍ୟୁ ଅଫ୍ ୟୂନିଟି ଏବଂ ଅହମଦାବାଦ ସାବରମତୀ ରିଭରଫ୍ରଣ୍ଟ ମଧ୍ୟରେ ସି-ପ୍ଲେନ୍ ସେବା ଉଦଘାଟନ କରିଛନ୍ତି।

ପରିବହନ ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି ଯେ, ସରକାର ଆଞ୍ଚଳିକ ଏୟାର କନେକ୍ଟିଭିଟି ଫ୍ଲାଇଟ୍ ସ୍କିମ୍ ଅନୁଯାୟୀ ସମଗ୍ର ଦେଶରେ ଏହିପରି ୧୪ ଟି ୱାଟର ବେସ ନିର୍ମାଣ କରିବାକୁ ଯୋଜନା କରୁଛନ୍ତି। ଭାରତର ବିମାନବନ୍ଦର କର୍ତ୍ତୃପକ୍ଷ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଭାରତୀୟ ଆଭ୍ୟନ୍ତରୀଣ ଜଳପଥ ପ୍ରାଧିକରଣକୁ ହାଇଡ୍ରୋଗ୍ରାଫିକ୍ ସର୍ଭେ କରିବାକୁ କହିଛନ୍ତି। ଏହାସହ ଯାତ୍ରୀଙ୍କ ଯାତାୟାତ ପାଇଁ ମଧ୍ୟ ସୁବିଧା ଓ ବିମାନ ପାଇଁ ଜେଟୀ ବିକଶିତ କରିବାକୁ ସାହାଯ୍ୟ କରିବାକୁ କହିଛନ୍ତି।

ପରିବହନ ମନ୍ତ୍ରୀ ମାନସୁଖ ମାଣ୍ଡାଭିଆନ୍ ଗତ ସପ୍ତାହରେ କହିଥିଲେ ଯେ ଗୁଜୁରାଟରେ ସି-ପ୍ଲେନ୍ ସେବା ଆରମ୍ଭ କରିବା ପରେ ଗୁଆହାଟି, ଉତ୍ତରପ୍ରଦେଶ ଏବଂ ଆଣ୍ଡାମାନ-ନିକୋବରରେ ଏହାର ନିୟମିତ ସେବା ଆରମ୍ଭ କରାଯିବ।

ସରକାରଙ୍କ ଏହି ଯୋଜନାରେ ଲକ୍ଷ୍ମୀଦୀପ, ଆଣ୍ଡାମାନ ଏବଂ ନିକୋବର, ଆସାମ, ମହାରାଷ୍ଟ୍ର ଏବଂ ଉତ୍ତରାଖଣ୍ଡରେ ଏହି ସେବା ଉପକୃତ ହେବ ବୋଲି ଆଶା କରାଯାଉଛି।

ସର୍ଦ୍ଦାର ଭାଲାଭଭାଇ ପଟେଲଙ୍କ ୧୪୫ତମ ଜନ୍ମ ଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେଭଡିୟା ସାବରମତୀ ଏରୋଡ୍ରୋମ ଏବଂ ସି-ପ୍ଲେନ୍ ସେବା ଆରମ୍ଭ କରିଥିଲେ। ଏହି ସେବା ଗୁଜରାଟର ଦୁଇଟି ବଡ ପ୍ରକଳ୍ପ ସହ ସଂଯୋଜିତ ହେବ। ଏହି ସେବା ଜରିଆରେ ଅହମଦାବାଦ ଓ କେଭଡିୟାରେ ସାବରମତୀ ରିଭରଫ୍ରଣ୍ଟର ୨୦୦ କିମି ଦୂରତା କମ ସମୟରେ ଯାଇହେବ। ସଡକ ମାର୍ଗରେ ଏହି ଦୂରତାରେ ଯାତ୍ରା କରିବାକୁ ୪ ଘଣ୍ଟା ସମୟ ଲାଗୁଥିଲା। କିନ୍ତୁ ବର୍ତ୍ତମାନ ମାତ୍ରା ୪୦ ମିନିଟ୍ ସମୟ ଲାଗିବ।