ନୂଆଦିଲ୍ଲୀ: ଦେଶରେ ପୁଣି ଥରେ କରୋନା ଏବଂ ଏନଫ୍ଲୁଏଞ୍ଜା ମାମଲା ବଢିବାରେ ଲାଗିଛି । ଏହାରି ଭିତରେ ସରକାର ହସ୍ପିଟାଲଗୁଡିକ କେତେ ପ୍ରସ୍ତୁତ ଅଛନ୍ତି ତାହା ଜାଣିବା ପାଇଁ ଏପ୍ରିଲ ୧୦ ଏବଂ ୧୧ରେ ରାଷ୍ଟ୍ରବ୍ୟାପୀ ମକ ଡ୍ରିଲ୍ ପାଇଁ ଯୋଜନା କରୁଛନ୍ତି । ଏହାକୁ ନେଇ କେନ୍ଦ୍ର ସରକାର ଏକ ଆଡଭାଇଜରୀ ଜାରି କରିଛନ୍ତି ।

ଏଥିରେ କୁହାଯାଉଛି ଯେ ଦେଶର ସମସ୍ତ ଜିଲ୍ଲାରେ ସାର୍ବଜନୀନ ଏବଂ ଘରୋଇ ଉଭୟ କ୍ଷେତ୍ରର ହସ୍ପିଟାଲରେ ଏହି ମକ ଡ୍ରିଲରେ ସାମିଲ ହେବେ । ଏହି ମକ ଡ୍ରିଲରେ ହସ୍ପିଟାଲ ଏବଂ ଏଥିରେ ଶଯ୍ୟା ସଂଖ୍ୟା, ଚିକିତ୍ସା ଉପକରଣ ଏବଂ ଚିକିତ୍ସା ଅକ୍ସିଜେନର ଉପଲବ୍ଧତାର ଯାଞ୍ଚ କରାଯିବ । ଏହାସହ ଏଥିରେ କୁହାଯାଇଛି ଯେ ମାର୍ଚ୍ଚ ୨୭ରେ ହେବାକୁ ଥିବା ଭର୍ଚୁଆଲ ବୈଠକରେ ମକ ଡ୍ରିଲ ଉପରେ ସଠିକ୍ ବିବରଣୀ ରାଜ୍ୟ ସରକାରଗୁଡିକୁ ଦିଆଯିବ ।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଏବଂ ଆଇସିଏମଆର ଦ୍ୱାରା ଶନିବାର ଜାରି ଏକ ମିଳିତ ମାର୍ଗଦର୍ଶିକାରେ କୁହାଯାଇଛି ଯେ ଗତ କିଛି ସପ୍ତାହରେ କିଛି ରାଜ୍ୟରେ କରୋନା ଟେଷ୍ଟିଂରେ ହ୍ରାସ ଘଟିଛି । ଏହାସହ ଡବ୍ଲୁଏଚଓ ଦ୍ୱାରା ନିର୍ଦ୍ଧାରିତ ମାନଦଣ୍ଡ ତୁଳନାରେ ବର୍ତ୍ତମାନର ପରୀକ୍ଷଣ ପର୍ଯ୍ୟାପ୍ତ ନୁହେଁ ।

କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଏବଂ ଆଇସିଏମଆର ମହାନିର୍ଦ୍ଦେଶକ ଡା.ରାଜୀବ ବହଲଙ୍କ ଦ୍ୱାରା ଜାରି ଆଡଭାଇଜରୀରେ ଏହା ମଧ୍ୟ କୁହାଯାଉଛି ଯେ ଫେବ୍ରୁଆରୀ ମଧ୍ୟରୁ ଦେଶରେ କରୋନା ମାମଲାରେ ନିରନ୍ତର ବୃଦ୍ଧି ଦେଖିବାକୁ ମିଳୁଛି । ବର୍ତ୍ତମାନ ସମୟରେ ଦେଶରେ ଅଧିକାଂଶ କରୋନା ମାମଲା କେରଳ (୨୬.୪ ପ୍ରତିଶତ), ମହାରାଷ୍ଟ୍ର (୨୧.୭ ପ୍ରତିଶତ), ଗୁଜରାଟ (୧୩.୯ ପ୍ରତିଶତ), କର୍ଣ୍ଣାଟକ (୮.୬ ପ୍ରତିଶତ) ଏବଂ ତାମିଲନାଡୁ (୬.୩ ପ୍ରତିଶତ) ଚିହ୍ନଟ ହେଉଛି ।