ନୂଆଦିଲ୍ଲୀ: ସାଇବର ଅପରାଧ ରୋକିବାକୁ କେନ୍ଦ୍ର ସରକାର ବଡ଼ କାର୍ଯ୍ୟାନୁଷ୍ଠାନ ନେଇଛନ୍ତି। ୨୮,୨୦୦ ମୋବାଇଲ୍ ଫୋନ୍କୁ ବ୍ଲକ୍ କରିବାକୁ ଟେଲିକମ୍ ଅପରେଟରଙ୍କୁ ନିର୍ଦ୍ଦେଶ ସରକାର ନିର୍ଦ୍ଦେଶ ଦେଇଛନ୍ତି। ଏହି ମୋବାଇଲ୍ ଫୋନ୍ ବ୍ୟବହାରକାରୀମାନେ ବିଭିନ୍ନ ସାଇବର କ୍ରାଇମ୍ ଅପରାଧରେ ଲିପ୍ତ ଥିବା ଜଣାପଡ଼ିବା ପରେ କେନ୍ଦ୍ର ସରକାର ଏଭଳି ନିର୍ଦ୍ଦେଶ ଦେଇଛନ୍ତି।
କେବଳ ସେତିକି ନୁହେଁ ଏହିସବୁ ମୋବାଇଲ୍ଗୁଡିକ ସହ ସମ୍ପୃକ୍ତ ୨୦ ଲକ୍ଷ ମୋବାଇଲ୍ ନମ୍ବରକୁ ରି-ଭେରିଫିକେସନ(ପୁନଃ ପ୍ରମାଣନ) କରିବାକୁ ନିର୍ଦ୍ଦେଶ ଦିଆଯାଇଛି। ଯଦି ଏହିସବୁ ସିମ୍ ଭେରିଫିକେସନ ଫେଲ୍ ମାରେ ତେବେ ଏଗୁଡ଼ିକୁ ସବୁ କ୍ୟାନ୍ସଲ କରିବାକୁ ନିର୍ଦ୍ଦେଶ ଦିଆଯାଇଛି। କେନ୍ଦ୍ର ଗୃହମନ୍ତ୍ରଣାଳୟ ଓ ରାଜ୍ୟ ପୁଲିସ ଦ୍ୱାରା ଯାଞ୍ଚ କରିବା ପରେ ୨୮,୨୦୦ ମୋବାଇଲ୍ ସାଇବର କ୍ରାଇମ୍ରେ ବ୍ୟବହାର ହେଉଥିବା ଜଣାପଡ଼ିଥିଲା। ଏହାପରେ ଟେଲିକମ୍ୟୁନିକେଶନ(DoT) ଦ୍ୱାରା ମଧ୍ୟ ଏକ ଯାଞ୍ଚ କରାଯାଇଥିଲା। ଯେଉଁଥିରେ ଜଣାପଡ଼ିଥିଲା ଯେ ଏହି ମୋବାଇଲ୍ଗୁଡ଼ିକରେ ୨୦ ଲକ୍ଷ ନମ୍ବର ବ୍ୟବହାର କରାଯାଇଛି। ତେଣୁ ଏଗୁଡିକର ରି-ଭେରିଫିକେସନ୍ ପାଇଁ ଡଟ୍ ନିର୍ଦ୍ଦେଶ ଦେଇଛନ୍ତି। ଏନେଇ ଜାରି ହୋଇଥିବା ସରକାର ବିବୃତ୍ତିରେ କୁହାଯାଇଛି “ଡଟ୍ ଟେଲିକମ ସର୍ଭିସ୍ ଯୋଗାଉଥିବା କମ୍ପାନୀମାନଙ୍କ ପାଇଁ ନର୍ଦ୍ଦେଶନାମା ଜାରି କରି ୨୮,୨୦୦ ମୋବାଇଲ୍ରେ ବ୍ୟବହାର ହେଉଥିବା ୨୦ ଲକ୍ଷ ମୋବାଇଲ କନେକ୍ସନର ରି-ଭେରିଫିକେସନ୍ ପାଇଁ ନିର୍ଦ୍ଦେଶ ଦେଇଛି। ଭେରିଫିକେସନ ଫେଲ୍ ମାରିଲେ ଏଗୁଡ଼ିକୁ ଡିସ୍କନେକ୍ଟ କରିବାକୁ କୁହାଯାଇଛି।”
ସାଇବର କ୍ରାଇମ୍ ଦ୍ୱାରା ହେଉଥିବା ଆର୍ଥିକ ଠକେଇ ରୋକିବାକୁ ଡଟ୍, ଗୃହମନ୍ତ୍ରଣାଳୟ ଓ ଷ୍ଟେଟ୍ ପୁଲିସ ମିଳିତ ଉଦ୍ୟମରେ ଏଭଳି ପ୍ରୟାସ ହୋଇଛି। ଠକେଇ କରୁଥିବା ନେଟ୍ୱର୍କକୁ ନଷ୍ଟ କରିବା ସହ ଜନସାଧାରଣଙ୍କୁ ଡିଜିଟାଲ୍ ବିପଦରୁ ରକ୍ଷା କରିବା ଓ ସୁରିକ୍ଷତି ଡିଜିଟାଲ ପରିବେଶ ଏହାର ମୂଳ ଉଦେଶ୍ୟ। ସାଇବର ଅପରାଧ ଓ ଆର୍ଥିକ ଠକେଇରେ ଅପବ୍ୟବହାର ହେଉଥିବା ଟେଲିକମ ସୋର୍ସକୁ ରୋକିବାକୁ ଷ୍ଟେକ୍ହୋଲ୍ଡରଙ୍କ ସହ ସହଯୋଗ ରଖିବାକୁ ନିକଟରେ ସରକାର ଡିଜିଟାଲ୍ ଇଣ୍ଟେଲିଜେନ୍ସ ପ୍ଲାଟ୍ଫର୍ମ(ଡିଆଇପି) ଲଞ୍ଚ୍ କରାଯାଇଥିଲା।
ରିୟଲ ଟାଇମ୍ ଇଣ୍ଟେଲିଜେନ୍ସ ଶେୟାରିଂ, ଇନ୍ଫର୍ମେସନ ଏକ୍ସଚେଞ୍ଜ୍ ଏବଂ ବିଭିନ୍ନ ଅଂଶାଦାରମାନଙ୍କ ସହ ସହଯୋଗ ରକ୍ଷା କରିବା ପାଇଁ ଡଟ୍ ଦ୍ୱାରା ଡିଆଇପି ସର୍ଭର ବିକଶିତ କରାଯାଇଥିଲା। ଅଂଶୀଦାରମାନଙ୍କ ମଧ୍ୟରେ ଟେଲିକମ୍ କମ୍ପାନୀ,ଆଇନ ପ୍ରବର୍ତ୍ତନ ସଂସ୍ଥା(ଏଲ୍ଇଏ), ବ୍ୟାଙ୍କ୍, ଏବଂ ଆର୍ଥିକ ସଂସ୍ଥାନ, ସୋସିଆଲ୍ ମିଡିଆ ପ୍ଲାଟ୍ଫର୍ମ ଏବଂ ପରିଚୟପତ୍ର ଜାରି କରୁଥିବା ଅଧିକାରୀ ଆଦି ରହିଛନ୍ତି।
ସୁରକ୍ଷିତ ସଂଯୋଗ ଦ୍ୱାରା(ସିକ୍ୟୁର କନେକ୍ଟଭିଟି)ଡିଆଇପି ନିଜର ଭୂମିକା ଅନୁସାରେ, ଆବଶ୍ୟକୀୟ ସୂଚନା ଶେୟାର କରିଥାଏ। ତେବେ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ପ୍ଲାଟ୍ଫର୍ମଟି ସାଧାରଣ ନାଗରିକଙ୍କ ବ୍ୟବହାର ପାଇଁ ଉଦ୍ଦିଷ୍ଟ ନୁହେଁ।
