ବଡ଼ବିଲ: ରାଜ୍ୟପାଳ ପ୍ରଫେସର ଗଣେଶୀ ଲାଲ ଶୁକ୍ରବାର କେନ୍ଦୁଝର ଜିଲ୍ଲାର ଯୋଡ଼ା ଓ ବଡ଼ବିଲ ଗସ୍ତ କରିଛନ୍ତି । ଏହି ଅବସରରେ ରାଜ୍ୟପାଳ ମୁଖ୍ୟ ଅତିଥି ଭାବେ ଯୋଗଦେଇ ଯୋଡ଼ାରେ ଆୟୋଜିତ ବୁକ୍ ଫେୟାରର ଉଦଘାଟନ କରିବା ସହ ବଡ଼ବିଲ, ସେରେଣ୍ଡା ଠାରେ ଥିବା ତୁଳସୀ ମୁଣ୍ଡାଙ୍କ ଆଦିବାସୀ ବିକାଶ ସମିତି ଆଶ୍ରମ ପରିଦର୍ଶନ କରିଛନ୍ତି ।
ରାଜ୍ୟପାଳ, ସକାଳ ୦୧ ଟା ୧୮ ମିନିଟରେ ଯୋଡ଼ାରେ ପହଞ୍ଚିବା ପରେ ସେଠାରୁ ଯୋଡ଼ା ଇଷ୍ଟ ଟାଉନସିପରେ ଆୟୋଜିତ ଭ୍ୟାଲିସିଟି ବୁକ୍ ଫେୟାରକୁ ଉଦଘାଟନ କରିଥିଲେ । ଅନୁଷ୍ଠିତ ସଭାରେ ସମାଜସେବୀ ଡ. ପଦ୍ମଶ୍ରୀ ତୁଳସୀ ମୁଣ୍ଡା, ଯୋଡ଼ା ପୌରାଧ୍ୟକ୍ଷ ଜଗଦୀଶ ପ୍ରସାଦ ସାହୁ ଓ ବୁକ୍ ଫେୟାର ଆୟୋଜନ କମିଟିର ଆବାହକ ତାରିଣୀ ପ୍ରସାଦ ମହାନ୍ତି ସମ୍ମାନିତ ଅତିଥିଭାବେ ଯୋଗଦେଇଥିଲେ । ବୁକ୍ ଫେୟାର୍ ୫ ଦିନ ଧରି ଚାଲିବାକୁ ଥିବାବେଳେ, ଏଥିରେ ବିଭିନ୍ନ ପ୍ରକାଶନ ସଂସ୍ଥା ପକ୍ଷରୁ ବିଶିଷ୍ଟ ଲେଖକ ଲେଖିକାଙ୍କ ପୁସ୍ତକ ସ୍ଥାନପାଇଛି ।
ଏହାପରେ ଦିନ ୨ ଟା ୩୦ ମିନିଟ୍ ସମୟରେ ବଡ଼ବିଲ, ସେରେଣ୍ଡା ସ୍ଥିତ ପଦ୍ମଶ୍ରୀ ତୁଳସୀ ମୁଣ୍ଡାଙ୍କ ଆଦିବାସୀ ବିକାଶ ସମିତିକୁ ଯାଇ ପରିଦର୍ଶନ କରିବା ସହ ଆଶ୍ରମର ପିଲାମାନଙ୍କ ସହ କିଛି ସମୟ ଅତିବାହିତ କରିଥିଲେ । ଏଥିସହିତ ସେମାନଙ୍କ ସହ ମଧ୍ୟାହ୍ନ ଭୋଜନ ଖାଇଥିଲେ । ଏହି ଅବସରରେ ରାଜ୍ୟପାଳ ଆଦିବାସୀ ବିକାଶ ସମିତିର କୁନି କୁନି ଅନ୍ତେବାସୀଙ୍କ ସହ କଥା ହେବା ସହ ସେମାନଙ୍କୁ କୋଳେଇ ନେଇଥିଲେ ।
