ନୂଆଦିଲ୍ଲୀ,୧୫/୮ : ଭାରତ ସ୍ୱାଧିନତାର ୭୫ ବର୍ଷ ପାଳନ କରି ୭୬ ବର୍ଷରେ ପାଦ ଦେଇଛି । ଏହି ଅବସରରେ ଦେଶବାସୀ ଖୁସି ଓ ଆନନ୍ଦ ମନାଉଛନ୍ତି । ପରସ୍ପରକୁ ସ୍ୱାଧିନତା ଦିବସ ଉପଲକ୍ଷେ ଶୁଭେଚ୍ଛା ଜଣାଉଛନ୍ତି । ଏଥିରୁ ବାଦ୍ ପଡିନି ସବୁଠୁ ଲୋକପ୍ରିୟ ସର୍ଚ୍ଚ ଇଞ୍ଜିନ୍ ଗୁଗଲ । କମ୍ପାନୀ ସ୍ୱତନ୍ତ୍ର ଡୁଡଲ କରି ଶୁଭକାମନା ଜଣାଇଛି ।
ଗୁଗଲର ଡୁଡଲରେ ଆକାଶରେ ଗୁଡି ଉଡୁଥିବା ଦେଖିବାକୁ ମିଳିଛି । ଏଥିରେ ଭାରତ ସ୍ୱାଧିନତା ପରେ କେତେ ବିକାଶ କରିଛି ଓ କେତେ ଉଚ୍ଚତାକୁ ସ୍ପର୍ଶ କରିଛି ତାହା ଦର୍ଶାଯାଇଛି ।
ଗୁଡି ଉଡାଇବା ଭାରତୀୟ ସଂସ୍କୃତିର ଅଂଶବିଶେଷ
ଡୁଡଲରେ କେରଳର କଳା ସ୍ଥାନ ପାଇଛି । ଗୁଡି ଉଡାଇବା ଭାରତୀୟ ସଂସ୍କୃତିର ଏକ ଗୁରୁତ୍ୱପୂର୍ଣ୍ଣ ଅଂଶ । ଏହା ମାଧ୍ୟମରେ ଦେଶର ବିକାଶକୁ ପ୍ରଦର୍ଶନ କରାଯାଇଛି । ଏହାସହ ଗୁଡି ଉଚ୍ଚତା ଓ ଆତ୍ମବିଶ୍ୱାସର ପ୍ରତୀକ । ଜିଆଇଏଫ୍ ଆନିମେସନ୍ ଦ୍ୱାରା ଏହା ଅଧିକ ଆକର୍ଷକ ଲାଗିଛି ।
ସ୍ୱାଧିନତା ସଂଗ୍ରାମରୁ ଆଜି ଯାଏଁ ଆନନ୍ଦ ଉଲ୍ଲାସର ଦିନରେ ଗୁଡିକୁ ବ୍ୟବହାର କରାଯାଏ । ସ୍ୱାଧିନତା ସଂଗ୍ରାମୀମାନେ ଗୁଡିରେ ନାରା ଲେଖି ଆକାଶରେ ଉଡାଉଥିଲେ । ଏହାକୁ ଉଡାଇ ନିଜ ଭାବନା ସେମାନେ ବ୍ୟକ୍ତ କରୁଥିଲେ । ପ୍ରତିବର୍ଷ ସ୍ୱାଧିନତା ଦିବସରେ ଆକାଶରେ ଶହଶହ ଗୁଡି ଉଡୁଥିବା ଦେଖିବାକୁ ମିଳିଥାଏ ।
