ଶ୍ରୀନଗର: କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶଙ୍କୁ ମାନହାନୀ ନେଇ ଲିଗାଲ୍ ନୋଟିସ୍ ପଠାଇଲେ  ଡେମୋକ୍ରାଟିକ୍ ପ୍ରୋଗ୍ରେସିଭ୍ ଆଜାଦ ପାର୍ଟି(ଡିଡିଏପି) ଅଧ୍ୟକ୍ଷ ଗୁଲାମ ନବୀ ଆଜାଦ।

ଜୟରାମ ରମେଶ ତାଙ୍କୁ, ଗୁଲାମ, ମୀର ଜାଫର ଓ ଭୋଟର କଟର କହିଥିବାରୁ ଗୁଲାମନବୀ ଆଜାଦ ତାଙ୍କୁ ଲିଗାଲ ନୋଟିସ୍ ପଠାଇଛନ୍ତି। ଆଜାଦଙ୍କ ଆଇନ ପରାମର୍ଶଦାତା ନରେଶ କୁମାର ଗୁପ୍ତା ଏହି ନୋଟି୍ସ ପଠାଇଛନ୍ତି। ଆଜାଦଙ୍କ ନିର୍ମଳଭାବ ମୂର୍ତ୍ତୀକୁ ବଦନାମ କରିବାକୁ ଚେଷ୍ଟା କରିଥିବାରୁ ନୋଟିସ୍‌ରେ ୨ କୋଟି ଟଙ୍କାର କ୍ଷତିପୂରଣ ଦାବି କରାଯାଇଛି।

ଆଜାଦ୍ ପଠାଇଥିବା ନୋଟିସ୍‌ରେ କୁହାଯାଇଛି ” ଶ୍ରୀ ଯୁକ୍ତ ଜୟରାମ ରମେଶ ଆପଣ ଆଜାଦଙ୍କୁ ଜାତୀୟ ସ୍ତରରେ ମିଳିଥିବା ମାନ ସମ୍ମାନ ଓ ବଢ଼ୁଥିବା ପ୍ରତିଷ୍ଠାକୁ ଅପମାନିତ କରିବା ଓ ତାଙ୍କୁ କ୍ଷତି ପହଞ୍ଚାଇବାକୁ ମଉକା ଖୋଜୁଥାନ୍ତି। ଆଜାଦଙ୍କୁ ପଦ୍ମଭୂଷଣ ମିଳିବା ପରେ ଆପଣ ବ୍ୟବହାର କରିଥିବା ଗୁଲାମମ ଶବ୍ଦ ବ୍ୟବହାର କରି ତାଙ୍କୁ ହୀନ ଦେଖାଇବାକୁ ଚେଷ୍ଟା କରିଛନ୍ତି।”

ଗୁଲାମ ଶବ୍ଦକୁ ଆପଣ ଭୃତ୍ୟ ଆକାରରେ ଦର୍ଶାଇଛନ୍ତି। ଲୋକଙ୍କ ସାମ୍ନାରେ ନେତାଙ୍କୁ ବଦନାମ କରିବାକୁ ଜାଣିଶୁଣି ଆପଣ ଏମିତି କରିଛନ୍ତି ବୋଲି ନୋଟିସ୍‌ରେ କୁହାଯାଇଛି। ରମେଶଙ୍କର ଏହି ମନ୍ତବ୍ୟକୁ ଭାରତୀୟ ପିଙ୍ଗଳ କୋର୍ଟର ଧାରା ୫୦୦ ଅନୁସାରେ ଏକ ଅପମାନ ବୋଲି ଧରାଯିବ। ତେଣୁ ସେ କ୍ଷତିପୂରଣ ରାଶି ଦେବାକୁ ଉତ୍ତରାଦାୟୀ ବୋଲି ନୋଟିସ୍‌ରେ କୁହାଯାଇଛି।    

ମୀର ଜାଫର ସେତେବେଳର ବଙ୍ଗଦେଶର ଶାସକ ସିରାଜ ଉଦ୍ ଦୌଲାଙ୍କ ସେନାପତି ଥିଲେ। ହେଲେ ପଲାସୀ ଯୁଦ୍ଧରେ ସେ ସିରାଜଙ୍କୁ ଧୋକା ଦେଇ ଭାରତରେ ବ୍ରିଟିଶ ସରକାରଙ୍କ ପ୍ରବେଶରେ ସହଯୋଗ କରିଥିଲେ। ସେବେଠାରୁ ତାଙ୍କୁ ଧୋକାବାଜ ବୋଲି କୁହାଯାଉଛି।  

ଏଥିପାଇଁ ରମେଶ ଆଜାଦଙ୍କୁ ପ୍ରିଣ୍ଟ ମିଡିଆ ଓ ଇଲେକ୍ଟ୍ରୋନିକ ମିଡିଆ ମାଧ୍ୟମରେ ନିସର୍ତ୍ତ କ୍ଷମାପ୍ରାର୍ଥନା କରନ୍ତୁ ବୋଲି ଗୁପ୍ତା ଉପଦେଶ ଦେଇଛନ୍ତି। ନୋଟିସ୍ ପାଇବାର ଦୁଇ ସପ୍ତାହ ଭିତରେ କ୍ଷମା ମାଗିବାକୁ ନୋଟିସ୍‌ରେ କୁହାଯାଇଛି।