ନୂଆଦିଲ୍ଲୀ: ବୈଶ୍ୱିକ ମାନ୍ଦାବସ୍ଥା ଭୟ ଏବଂ ଆମେରିକା ଉପରେ ଥିବା ଆର୍ଥିକ ସଂକଟ ଭିତରେ ୟୁରୋପର ସବୁଠୁ ବଡ଼ ଅର୍ଥବ୍ୟବସ୍ଥା ଜର୍ମାନୀ ଆନୁଷ୍ଠାନିକ ଭାବେ ମନ୍ଦାବସ୍ଥାର ଶିକାର ହୋଇଛି । ଏଠାରେ ଅତ୍ୟାବଶ୍ୟକୀୟ ସାମଗ୍ରୀର ମୂଲ୍ୟରେ ଅସାଧାରଣ ବୃଦ୍ଧି ଦେଖିବାକୁ ମିଳିଛି । ନୂଆ ଡାଟା ଅନୁସାରେ ଚଳିତ ବର୍ଷର ପ୍ରଥମ ତ୍ରୈମାସରେ ଜର୍ମାନୀର ଅର୍ଥନୀତିରେ ବଡ଼ ହ୍ରାସ ଦେଖିବାକୁ ମିଳିଛି । ସଂଘୀୟ ପରିସଂଖ୍ୟାନ କାର୍ଯ୍ୟାଳୟ ଦ୍ୱାରା ଗୁରୁବାର ଜାରି ଡାଟା ଅନୁସାରେ, ଜାନୁଆରୀ-ମାର୍ଚ୍ଚରେ ଜର୍ମାନୀର ସକଳ ଘରୋଇ ଉତ୍ପାଦ (ଜିଡିପି)ରେ ୦.୩ ପ୍ରତିଶତ ହ୍ରାସ ଘଟିଛି ।

୨୦୨୨ର ଶେଷ ତ୍ରୈମାସରେ ଜର୍ମାନୀର ଜିଡିପିରେ ୦.୫ ପ୍ରତିଶତ ହ୍ରାସ ଦେଖିବାକୁ ମିଳିଥିଲା । ଲଗାତାର ଦୁଇ ତ୍ରୈମାସରେ ଜିଡିପି ତଳକୁ ଖସିବା ଅର୍ଥନୀତିରେ ମନ୍ଦାବସ୍ଥା ସ୍ଥିତି ହୋଇଥାଏ । ଅର୍ଥନୀତି ଉପରେ ଏହି ଡାଟା ଜର୍ମାନୀ ସରକାରଙ୍କ ପାଇଁ ଏକ ବଡ଼ ଝଟକା ଅଟେ । ଗତ ମାସରେ ହିଁ ସରକାର ନୂଆ ବର୍ଷରେ ନିଜ ଅଭିବୃଦ୍ଧି ହାର ଅନୁମାନକୁ ଦ୍ୱିଗୁଣା କରିଥିଲେ ।

ଜର୍ମାନୀ ସରକାର କହିଥିଲେ ଯେ ଦେଶର ଅର୍ଥବ୍ୟବସ୍ଥା ୦.୪ ପ୍ରତିଶତ ହାରରେ ବଢିବ । ଜାନୁଆରୀରେ ଅର୍ଥବ୍ୟବସ୍ଥା ୦.୨ ପ୍ରତିଶତ ହାରରେ ବଢିବା ନେଇ ଅନୁମାନ କରାଯାଇଥିଲା । ଅର୍ଥଶାସ୍ତ୍ରୀଙ୍କ କହିବା ଅନୁସାରେ ଉଚ୍ଚ ମୁଦ୍ରାସ୍ଫୀତି କାରଣରୁ ଲୋକଙ୍କ ଖର୍ଚ୍ଚ ପ୍ରଭାବିତ ହୋଇଛି । ଏପ୍ରିଲରେ ମୁଦ୍ରାସ୍ଫୀତି ଏକ ବର୍ଷ ତୁଳନାରେ ୭.୨ ପ୍ରତିଶତ ଅଧିକ ରହିଛି ।

ରୟଟର୍ସର ରିପୋର୍ଟରେ କୁହାଯାଇଛି ଯେ ଜର୍ମାନୀବାସୀଙ୍କ କ୍ରୟ ଶକ୍ତି କମିବା, ଇଣ୍ଡଷ୍ଟ୍ରିଆଲ୍ ଅର୍ଡର କମିବା, ମୁଦ୍ରାନୀତିର କଡ଼ା ଅନୁପାଳନ ଏବଂ ଆମେରିକା ଉପରେ ଥିବା ଆର୍ଥିକ ସଂକଟ ଜର୍ମାନୀ ଅର୍ଥବ୍ୟବସ୍ଥାରେ ମାନ୍ଦାବସ୍ଥା ଆଣିଛି ।

ଉଲ୍ଲେଖଯୋଗ୍ୟ ଆମେରିକା, ଚୀନ ଏବଂ ଜାପାନ ପରେ ଜର୍ମାନୀ ଦୁନିଆର ଚତୁର୍ଥ ସବୁଠୁ ବଡ଼ ଏବଂ ୟୁରୋପର ସବୁଠୁ ଅର୍ଥବ୍ୟବସ୍ଥା ଅଟେ । ଏହା ବିଶ୍ୱସ୍ତରରେ ତୃତୀୟ ସବୁଠୁ ବଡ଼ ରପ୍ତାନକାରୀ ଦେଶ । ଦେଶର ଜିଡିପିରେ ସବୁଠୁ ବଡ଼ ଯୋଗଦାନ ସର୍ଭିସ୍ ସେକ୍ଟର ରହିଛି, ପ୍ରାୟ ୭୦ ପ୍ରତିଶତ ।