ଭୁବନେଶ୍ୱର: କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ପୁରୁଷ ହକି ବିଶ୍ୱକପର ପ୍ରଥମ ସେମିଫାଇନାଲରେ ଅଷ୍ଟ୍ରେଲିଆକୁ ହରାଇ ଫାଇନାଲରେ ପ୍ରବେଶ କରିଛି ଜର୍ମାନୀ । ଅଷ୍ଟ୍ରେଲିଆକୁ ୪-୩ରେ ହରାଇ ୧୩ ବର୍ଷ ପରେ ଫାଇନାଲରେ ପହଞ୍ଚିଛି ଜର୍ମାନୀ ।

ମ୍ୟାଚର ପ୍ରଥମ କ୍ୱାର୍ଟରରେ ମିଳିଥିବା ପେନାଲ୍ଟି କର୍ଣ୍ଣରକୁ ଗୋଲରେ ପରଣିତ କରିବାରେ ସଫଳ ହୋଇଥିଲା ଅଷ୍ଟ୍ରେଲିଆ । ପ୍ରଥମ କ୍ୱାର୍ଟର ଶେଷ ସୁଦ୍ଧା ୧-୦ରେ ଅଷ୍ଟ୍ରେଆଲ ମ୍ୟାଚରେ ଆଗୁଆ ରହିଥିଲା । ଦ୍ୱିତୀୟ କ୍ୱାର୍ଟରରେ ମଧ୍ୟ ଦୁଇ ଦଳ ମଧ୍ୟରେ ବେଶ ରୋମାଞ୍ଚକର ମୁକାବିଲା ଦେଖିବାକୁ ମିଳିଥିଲା । ଅଷ୍ଟ୍ରେଲିଆ ନାଥାନ ଇଫ୍ରାଉମ ଦ୍ୱିତୀୟ ଗୋଲ ଦେଇ ଟିମକୁ ୨-୦ର ଲିଡ୍ ଦେଇଥିଲେ ।

ପ୍ରଥମ ଦୁଇ କ୍ୱାର୍ଟରରେ ୨-୦ରେ ପଛୁଆ ରହିଥିବା ଜର୍ମାନୀ ତୃତୀୟ କ୍ୱାର୍ଟରରେ କମବ୍ୟାକ୍ କରିଥିଲା । ପେନାଣ୍ଟି କର୍ଣ୍ଣରକୁ ଗୋଲରେ ପରିଣତ କରି ଗୋଲ ବ୍ୟବଧାନକୁ ୨-୧କୁ କମାଇବାରେ ସଫଳ ହୋଇଥିଲା । ତୃତୀୟ କ୍ୱାର୍ଟର ଶେଷ ସୁଦ୍ଧା ଜର୍ମାନୀ ୧ ଏବଂ ଅଷ୍ଟ୍ରେଲିଆ ୨ ଗୋଲରେ ରହିଥିଲେ । ଚତୁର୍ଥ କ୍ୱାର୍ଟର ଆରମ୍ଭରେ ଜର୍ମାନୀ ଅକ୍ରଣାତ୍ମକ ଖେଳ ପ୍ରଦର୍ଶନ କରିଥିଲା । ନିଜର ୧୨ ନମ୍ୱର ପେନାଲ୍ଟି କର୍ଣ୍ଣରକୁ ଗୋଲରେ ପରିଣତ କରି ଜର୍ମାନୀ ୨-୨ ଗୋଲରେ ବରାବର କରିଥିଲା । ତେବେ ମ୍ୟାଚର ଶେଷ ୨ ମିନିଟ ୪୦ ସେକେଣ୍ଡ ପୂର୍ବରୁ ଅଷ୍ଟ୍ରେଲିଆ ପୁଣି ଏକ ପେନାଲ୍ଟି କର୍ଣ୍ଣରକୁ ଗୋଲ କରି ମ୍ୟାଚରେ ୩-୨ରେ ଆଗୁଆ ହୋଇଥିଲା । ଏହାର କିଛି ସେକେଣ୍ଡ ପରେ ହିଁ ଜର୍ମାନୀ ଆଉ ଏକ ପେନାଲ୍ଟିକୁ ଗୋଲରେ ପରିଣତ କରିବାରେ ସଫଳ ହୋଇଥିଲା ଏବଂ ମ୍ୟାଚ ୩-୩ରେ ବରାବର ହୋଇଥିଲା । ତେବେ ମ୍ୟାଚର ଶେଷ ୬ ସେକେଣ୍ଡରେ ଜର୍ମାନୀ ପାଇଁ ନିକଲାସ ଗୋଲ ଦେଇ ୪-୩ରେ ଅଷ୍ଟ୍ରେଲିଆକୁ ପରାସ୍ତ କରିଥିଲେ ।