ଲମତାପୁଟ, ୦୯|୦୧: କୋରାପୁଟ ପୋଲିସ ପୁଣି ୧୬ ଏକର ଜମିରେ ବିପୁଳ ପରିମାଣର ଗଞ୍ଜେଇ ନଷ୍ଟ କରିଛି । ଏହି ଜମିରେ ପ୍ରାୟ ଚାଷ ହୋଇଥିବା ୧୯ହଜାର ୨ଶହ ଗଞ୍ଜେଇ ଗଛ ନଷ୍ଟ କରାଯାଇଛି ।
ମାଓ ପ୍ରଭାବିତ ପାଡୁଆ ଥାନା ଅଞ୍ଚଳରେ ଥିବା ଆନ୍ଧ୍ର ସୀମାନ୍ତବର୍ତ୍ତୀ ବିଭିନ୍ନ ଗ୍ରାମରେ ଲଗାତାର ୩ ଦିନ ଧରି ଚାଲିଛି ଅପରେସନ୍ ଗ୍ରୀନ କ୍ଲିନ୍ । କୁଲାବିର ଏବଂ ପୂଜାରିପୁଟ ଗ୍ରାମ ନିକଟ ଜଲାପୁଟ ଜଳ ଭଣ୍ଡାର କୂଳରେ ବିପୁଳ ପରିମାଣରେ ଗଞ୍ଜେଇ ଚାଷ ନଷ୍ଟ କରିଛି ପୋଲିସ । ମାଓ ପ୍ରଭାବିତ ଅଞ୍ଚଳ ହୋଇଥିବାରୁ ପୂର୍ବରୁ ପୋଲିସ ସେଠାକୁ ପହଞ୍ଚି ପାରୁ ନଥିଲା । ଏହାର ସୁଯୋଗ ନେଇ ବେଆଇନ ଭାବରେ ବେଧଡକ ଗଞ୍ଜେଇ ଚାଷ ବଢ଼ି ଚାଲିଥିଲା ।
ତେବେ କଡ଼ା ସୁରକ୍ଷାରେ ପାଡୁଆ, କୋରାପୁଟ ପୋଲିସ, ଡି.ବି.ଏଫ, ଅବକାରୀ ବିଭାଗ, ବନ ବିଭାଗ ଏବଂ ଏଗଜ୍ୟୁକେଟିଭ୍ ମାଜିଷ୍ଟେଟଙ୍କ ଉପସ୍ଥିତିରେ ୧୬ ଏକର ଗଞ୍ଜେଇ ଚାଷ ନଷ୍ଟ କରାଯାଇଛି । ଲଗାତାର ତିନିଦିନରେ ଧରି ଚାଲିଥିବା ଅପରେସନରେ ୫୯ ଏକର ଗଞ୍ଜେଇ ଚାଷ ନଷ୍ଟ ହେଲାଣି । ଏହି ଅପରେସନ ଲଗାତାର ଜାରି ରହିବ ବୋଲି ନନ୍ଦପୁର ଏସଡିପିଓ ସୂଚନା ଦେଇଛନ୍ତି ।