ପୁଡ଼ୁଚେରୀ: ସରକାରୀ ବସ୍‌ରେ ମାଗଣା ଯାତ୍ରା କରିପାରିବେ ମହିଳା। ଏଥିପାଇଁ ତାଙ୍କୁ ଟିକେଟ୍ କିଣିବାକୁ ପଡ଼ିବ ନାହିଁ। ଓଡ଼ିଶାରେ ନୁହେଁ, କେନ୍ଦ୍ର ଶାସିତ ଅଞ୍ଚଳ ପୁଡ଼ୁଚେରୀରେ ମିଳିବ ଏହି ସୁବିଧା। ବୁଧବାର ପୁଡ଼ୁଚେରୀ ମୁଖ୍ୟମନ୍ତ୍ରୀ ଏନ୍‌ ରଙ୍ଗାସାମୀ ବିଧାନସଭାରେ ଏହି ଘୋଷଣା କରିଛନ୍ତି। ସରକାରୀ ବସ୍‌ର ଯାତ୍ରା କରୁଥିବା ବେଳେ ମହିଳାଙ୍କୁ ଆଉ ଟିକେଟ୍ କିଣିବାକୁ ପଡ଼ିବ ନାହିଁ ବୋଲି ମୁଖ୍ୟମନ୍ତ୍ରୀ କହିଛନ୍ତି।

କେବଳ ସେତିକି ନୁହେଁ, ବିଧବାଙ୍କୁ ମିଳୁଥିବା ଭତ୍ତାରେ ମଧ୍ୟ ବୃଦ୍ଧି କରିଛନ୍ତି ପୁଡ଼ୁଚେରୀ ସରକାର। ପୂର୍ବରୁ ଏହି କେନ୍ଦ୍ର ଶାସିତ ଅଞ୍ଚଳରେ ବିଧବା ଭତ୍ତା ୨୦୦୦ ଟଙ୍କା ଥିଲା। ହେଲେ ଏବେ ଭତ୍ତାକୁ ଆହୁରି ୧୦୦୦ ଟଙ୍କା ବଢ଼ାଇ ଦିଆଯାଇଛି। ଏବେ ପୁଡ଼ୁଚେରୀର ବିଧବା ମହିଳା ମାସକୁ ୩୦୦୦ ହଜାର ଟଙ୍କା ଭତ୍ତା ପାଇବେ ବୋଲି ମୁଖ୍ୟମନ୍ତ୍ରୀ ଏନ୍‌ ରଙ୍ଗାସାମୀ ଘୋଷଣା କରିଛନ୍ତି।