ଖଲ୍ଲିକୋଟ ୧୪।୧୧: ଗଞ୍ଜାମ ପରିବହନ ବିଭାଗ ପକ୍ଷରୁ ଦିଆଯାଉଥିବା ଗାଡି ଚାଳନା ଲାଇସେନ୍ସ, ପଞ୍ଜିକରଣ, ରିନ୍ୟୁ, ଟିକସ ପୈଠ କରିବା ପାଇଁ ଦଲାଲ ମାନଙ୍କ ମାଧ୍ୟମରେ ଗଲେ ହିଁ ଯାଇ କାମ ହେଉଥିବାର ଅଭିଯୋଗ ହୋଇ ଆସୁଥିଲା ।  ଏନେଇ ଗଞ୍ଜାମ ଏସପିଙ୍କ ନିର୍ଦ୍ଦେଶ କ୍ରମେ ଛତ୍ରପୁର ପୋଲିସର ଏକ ସ୍ୱତନ୍ତ୍ର ଟିମ୍ ଆଞ୍ଚଳକି ପରିବହନ କାର୍ଯ୍ୟାଳୟରେ ଅଚାନକ ଚଢ଼ାଉ କରି ଚାରି ଦଲାଲକୁ କାବୁ କରିବାରେ ସଫଳ ହୋଇଥିଲେ । ପରେ ଛତ୍ରପୁର ପୋଲିସ କାର୍ଯ୍ୟାଳୟ ପରିସରରେ ଛତ୍ରପୁର ଏସଡ଼ିପିଓ ଗୌରହରି ସାହୁ ଏକ ସାମ୍ବାଦିକ ସମ୍ମିଳନୀ କରି ଘଟଣା ସମ୍ପର୍କରେ କହିବା ସହ ଏକ ମାମଲା ରୁଜୁ ହୋଇ ଚାରି ଜଣକୁ ଛତ୍ରପୁର ପୋଲିସ ଗିରଫ କରିଛି ।

ଗିରଫ ଚାରି ଦଲାଲ ହେଲେ ପାଲିଆ ଛତ୍ରପୁରର ଜଗନ୍ନାଥ ସାହୁ, କୁମାରବେଗପଲ୍ଲୀର ରବୀନ୍ଦ୍ର କୁମାର ଗୌଡ଼, ବ୍ରହ୍ମପୁରର ପି. ଚନ୍ଦ୍ରଶେଖର ଓ ଛତ୍ରପୁର ଏମଡି ଆଲ୍ଲାଉଦ୍ଦୀନ । ସେମାନଙ୍କ ନିକଟରୁ ପୋଲିସ ୧୨ଟି ଡ଼ିଏଲ, ୭ଟି ଆରସି ଜବତ କରିବା  ସମେତ ବିଭିନ୍ନ ବ୍ୟକ୍ତିଙ୍କ ଗାଡି ଚାଳନା ଲାଇସେନ୍ସ, ପଞ୍ଜିକରଣ, ରିନ୍ୟୁ, ଟିକସ ପୈଠ, ଫିଟନେସ ସମ୍ବନ୍ଧୀୟ ବହୁ କାଗଜପତ୍ର ଜବତ କରିଛି । ଏ ସମ୍ପର୍କରେ ଛତ୍ରପୁର ପୋଲିସ ମାମଲା ସଂଖ୍ୟା ୭୬୪/୨୩ ରୁଜୁ କରି ଅଭିଯୁକ୍ତଙ୍କୁ ଗିରଫ କରି ମିଳିଥିବା ସାମଗ୍ରୀଗୁଡିକୁ ଜବତ କରିଛି । ଏବେ ବି ଘଟଣାର ତଦନ୍ତ ଜାରି ରହିଛି ।

You Can Read :