ନୂଆଦିଲ୍ଲୀ: ମନୋରଞ୍ଜନ ଦୁନିଆରୁ ପୁଣି ଏକ ଦୁଃଖଦ ଖବର ସାମନାକୁ ଆସିଛି । ଜଣାଶୁଣା ବଡିବିଲ୍ଡର ତଥା ପୂର୍ବତନ ମିଷ୍ଟର ଇଣ୍ଡିଆ ପ୍ରେମରାଜ ଅରୋରାଙ୍କ ୪୨ ବର୍ଷ ବୟସରେ ହାର୍ଟଆଟ୍‌କରେ ପରଲୋକ ହୋଇଛି । କୋଟାରେ ତାଙ୍କ ମୃତ୍ୟୁ ହୋଇଛି । ଖବର ଅନୁସାରେ ୱର୍କଆଉଟ୍ କରିବା ପରେ ସେ ବାଥରୁମ୍ ଯାଇଥିଲେ । ତେବେ ଦୀର୍ଘ ସମୟ ଯାଏଁ ବାହାରକୁ ନଆସିବା ପରେ ପରିବାର ଲୋକେ ତାଙ୍କୁ ଅଚେତ ଅବସ୍ଥାରେ ବାଥରୁମରେ ଦେଖିଥିଲେ । ଉଲ୍ଲେଖଯୋଗ୍ୟ ଯେ ଗତ ୩୬ ଘଣ୍ଟା ମଧ୍ୟରେ ଏଣ୍ଟରଟେନମେଣ୍ଟ ଦୁନିଆରୁ ଏହା ଦ୍ୱିତୀୟ ଘଟଣା । ବୁଧବାର ଟିଭି ଅଭିନେତା ନିତେଶ ପାଣ୍ଡେଙ୍କ ହୃଦଘାତରେ ପରଲୋକ ହୋଇଥିଲା ।

ତେବେ ସବୁଠୁ ଆଶ୍ଚର୍ଯ୍ୟକର ବିଷୟ ହେଉଛି ଷ୍ଟ୍ରିକ୍ଟ ରୁଲ୍ ଫଲୋ କରିବା ପରେ ବି ପ୍ରେମରାଜ ଅରୋରାଙ୍କ ହୃଦଘାତରେ ପରଲୋକ ହୋଇଛି । ପ୍ରେମରାଜଙ୍କ ପରିବାର ଲୋକେ ନିଜେ ଏହି ସୂଚନା ଦେଇଛନ୍ତି । ପ୍ରେମରାଜ ଅରୋରା ବଡିବିଲ୍ଡର ହୋଇଥିବା କାରଣରୁ ସବୁବେଳେ ଡାଇଟ୍ ଫଲୋ କରୁଥିଲେ । କେବଳ ଏତିକି ନୁହେଁ, ସେ ସବୁ ପ୍ରକାଶ ନିଶାରୁ ମଧ୍ୟ ଦୂରେଇ ରହୁଥିଲେ ।

ପ୍ରେମରାଜ ୨୦୧୨ରେ ରାଜସ୍ଥାନର ସର୍ବଶ୍ରେଷ୍ଠ ପାୱାର ଲିଫ୍ଟିଂ ପୁରସ୍କାର ଜିତିଥିଲେ । ୨୦୧୪ରେ ନାଗପୁରରେ ଆୟୋଜିତ ପ୍ରତିଯୋଗିତାରେ ମିଷ୍ଟର ଇଣ୍ଡିଆ ହୋଇଥିଲେ ଏବଂ ସ୍ୱର୍ଣ୍ଣ ପଦକ ଜିତିଥିଲେ ।