ଭଦ୍ରକ ୦୨/୦୨: ପୂର୍ବତନ ଚାନ୍ଦବାଲି ବିଧାୟକ ଗଙ୍ଗାଧର ଦାସଙ୍କ ୯୧ ବର୍ଷ ବୟସରେ ପରଲୋକ ହୋଇଛି। ଭଦ୍ରକ ଜିଲ୍ଲା ମୁଖ୍ୟ ଚକିତ୍ସାଳୟରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସ୍ୱର୍ଗତ ଦାସ ଚାନ୍ଦବାଲି ସଂରକ୍ଷିତ ବିଧାନସଭା ନିର୍ବାଚନ ମଣ୍ଡଳୀରୁ ୧୯୭୧ ଏବଂ ୧୯୭୭ମସିହାରେ ଦୁଇ ଥର ବିଧାୟକ ଭାବେ ନିର୍ବାଚିତ ହୋଇଥିଲେ। ତାଙ୍କ କାର୍ଯ୍ୟକାଳ ସମୟରେ ସେ ବହୁ ବିକାଶମୂଳକ କାର୍ଯ୍ୟ କରିଛନ୍ତି। ସେ ବାର୍ଦ୍ଧକ୍ୟଜନିତ ରୋଗରେ ଅସୁସ୍ଥତା ପାଇଁ ସେ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟ ଭର୍ତ୍ତି ହୋଇଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି।
ସୂଚନାଥାଉକି, ସ୍ୱର୍ଗତ ବିଧାୟକ ତାଙ୍କ ସରଳ ଜୀବନ ଯାପନ ଶୈଳୀ ପାଇଁ ବେଶ ଚର୍ଚ୍ଚାରେ ଥିଲେ। ସେ ସବୁବେଳେ ସାଇକେଲରେ ଯିବା ଆସିବା କରୁଥିଲେ। ତାଙ୍କ ମୃତ୍ୟୁରେ ଧାମନଗର ପୂର୍ବତନ ବିଧାୟକ ରାଜେନ୍ଦ୍ର ଦାସ, ଚାନ୍ଦବାଲି ପୂର୍ବତନ ବିଧାୟକ ବିଜୟ ନାୟକଙ୍କ ସହିତ ବହୁ ବିଶିଷ୍ଟ ମାନ୍ୟଗଣ୍ଯ ବ୍ୟକ୍ତି ଶୋକପ୍ରକାଶ କରିଛନ୍ତି। ମୃତ୍ୟୁ ଶଜ୍ଜା ପାଖରେ ତାଙ୍କ ଝିଅ, ପୁଅ,ବୋହୁ ଓ ନାତି,ନାତୁଣୀମାନେ ଉପସ୍ଥିତ ଥିଲେ। ତାଙ୍କ ଦେହାନ୍ତରେ ଭଦ୍ରକ ଅଞ୍ଚଳରେ ଶୋକର ଛାୟା ଖେଳିଯାଇଛି।