କାବୁଲ, ୨୪|୦୮: ତାଲିବାନର ବର୍ବରତା ପାଇଁ ଆତଙ୍କିତ ଆଫଗାନ ନାଗରିକ । ଅନେକ ଦେଶ ସେମାନଙ୍କ ନାଗରିକଙ୍କୁ ଆଫଗାନିସ୍ତାନରୁ ନେଇଯାଉଛନ୍ତି । ଏହାମଧ୍ୟରେ ଆଫଗାନିସ୍ତାନର ପୂର୍ବତନ ସେନା ମୁଖ୍ୟ ଓ୍ୱାଲି ମହମ୍ମଦ ଅହମଦାଇ କାବୁଲ ବିମାନବନ୍ଦରରେ ଲାଇନରେ ଠିଆ ହୋଇଥିବା ଦେଖିବାକୁ ମିଳିଛି ।
ଗଣମାଧ୍ୟମରେ ଓ୍ୱାଲି ଏକ ଫଟୋ ସାମ୍ନାକୁ ଆସିଛି । ସେ ଦେଶ ଛାଡିବା ପାଇଁ ଧାଡିରେ ଠିଆ ହୋଇଛନ୍ତି ।ସେ ଆଫଗାନିସ୍ତାନ ଛାଡି କେଉଁଠିକି ଯିବେ ତାହା ଏବେସୁଦ୍ଧା ଜଣାପଡି ନାହିଁ ।ଓ୍ୱାଲି ହଜାର ହଜାର ଆଫଗାନବାସୀଙ୍କ ସହ ବିମାନବନ୍ଦରରେ ଫସି ରହିଛନ୍ତି । ଅନ୍ୟ ସାଧାରଣ ଲୋକଙ୍କ ଭଳି ଦେଶରୁ ବାହାରିବାରୁ ଅପେକ୍ଷା କରିଛନ୍ତି ।
ସୂଚନାଯୋଗ୍ୟ, ଅଗଷ୍ଟ ୧୫ ତାରିଖରେ ରାଜଧାନୀ କାବୁଲକୁ ତାଲିବାନ କବଜା କରିନେଇଥିଲା । ଏହାପରେ ପୂର୍ବତନ ରାଷ୍ଟ୍ରପତି ଆଶରଫ ଘନୀ ଦେଶ ଛାଡି ପଳାୟନ କରିଥିଲେ । କିଛି ମାସ ତଳେ ଆଶରଫ ଘନୀ ଓ୍ୱାଲିଙ୍କୁ ହଟାଇ ହିବତୁଲ୍ଲା ଅଲିଜାଇଙ୍କୁ ସେନା ମୁଖ୍ୟ କରିଥିଲେ ।ତେବେ ଅଲିଜାଇଙ୍କ ଅଧିନରେ ଥିବା ଆଫଗାନ ସେନା ତାଲିବାନ ଆଗରେ ସମ୍ପୂର୍ଣ୍ଣ ଭାବେ ଆତ୍ମ ସମର୍ପଣ କରିଥିଲା ।