ନୂଆଦିଲ୍ଲୀ:ଦେଶର ବିଦେଶୀ ମୁଦ୍ରା ଭଣ୍ଡାରରେ ଗତ ତିନି ସପ୍ତାହ ଧରି ଲଗାତାର ବୃଦ୍ଧି ହୋଇଛି । ଭାରତର ବିଦେଶୀ ମୁଦ୍ରା ଭଣ୍ଡାର ମେ’ ୧୭ରେ ଶେଷ ହୋଇଥିବା ସପ୍ତାହରେ ସର୍ବକାଳୀନ ଉଚ୍ଚ ସ୍ତର ଛୁଇଁଛି । ଦେଶର ମୁଦ୍ରା ଭଣ୍ଡାରରେ ୪.୫୪୯ ବିଲିୟନ ଡଲାର ବୃଦ୍ଧି ଘଟିଛି । ଏହାପରେ ଦେଶର ଫରେକ୍ସ ରିଜର୍ଭ ବଢି ୬୪୮.୭ ବିଲିୟନ ଡଲାରର ରେକର୍ଡ ସ୍ତରରେ ପହଞ୍ଚିଛି । ଭାରତୀୟ ରିଜର୍ଭ ବ୍ୟାଙ୍କ ଶୁକ୍ରବାର ଏହି ସୂଚନା ଦେଇଛି ।
ଆରବିଆଇ ଅନୁସାରେ ମେ ୧୭ରେ ଶେଷ ହୋଇଥିବା ମୁଦ୍ରା ଭଣ୍ଡାରର ଗୁରୁତ୍ୱପୂର୍ଣ୍ଣ ଅଂଶ କୁହାଯାଉଥିବା ବିଦେଶୀ ମୁଦ୍ରା ସମ୍ପତ୍ତି ୩.୩୬ ବିଲିୟନ ଡଲାର ବଢି ୫୬୮.୦୧ ବିଲିୟନ ଡଲାର ହୋଇଛି । ଏଥିରେ ମୁଦ୍ରା ଭଣ୍ଡାରରେ ଥିବା ୟୁରୋ, ପାଉଣ୍ଡ ଏବଂ ୟେନ ପରି ଅଣ-ଆମେରିକୀୟ ମୁଦ୍ରାର ଉତ୍ଥାନ ଏବଂ ପତନର ପ୍ରଭାବ ସାମିଲ ରହିଥାଏ ।
ରିଜର୍ଭ ବ୍ୟାଙ୍କ କହିଛି ଯେ ଆଲୋଚ୍ୟ ସପ୍ତାହରେ ସୁନା ଭଣ୍ଡାରରେ ୧.୨୪୪ ବିଲିୟନ ଡଲାର ବଢି ୫୭.୧୯୫ ବିଲିୟନ ଡଲାର ହୋଇଛି । ଅନ୍ୟପଟେ ଏସଡିଆର ୧୧.୩ କୋଟି ଡଲାର ବୃଦ୍ଧି ସହ ୧୮.୧୬୮ ବିଲିୟନ ଡଲାରରେ ପହଞ୍ଚିଛି । ଏହା ବ୍ୟତୀତ ଏହି ସପ୍ତାହରେ ଆଇଏମଏଫ ସହ ଭାରତର ରିଜର୍ଭ ପୋଜିସନ ୧୬.୮ କୋଟି ଟଙ୍କା କମି ୪.୩୨୭ ବିଲିୟନ ଡଲାର ହୋଇଛି ।
