ଚଣ୍ଡିଖୋଲ ୧୧।୫: ଗାଡ଼ି ଗୁଡିକରେ ମାଡି ଗଲାଣି ଗଛଲତା । ବର୍ଷ ବର୍ଷ ଧରି ଏଭଳି ଭାବେ ପଡିରହିଛି ଗାଡ଼ି । ସୃଷ୍ଟି ହୋଇ ଗଲାଣି ଜଙ୍ଗଲ । ଏହା କୌଣସି କବାଡିଆଖାନା କିମ୍ବା ଅନ୍ୟ ଅଞ୍ଚଳର ନୁହେଁ ବରଂ ଯାଜପୁର ଜିଲ୍ଲା ଡାଳିଯୋଡ଼ା ବଇରୀ ରେଞ୍ଜ ଅଫିସ୍ ପରିସରର ଦୃଶ୍ୟ ।

ବନ ବିଭାଗ ପକ୍ଷରୁ ଚଢ଼ାଉ କରାଯାଇ ବିଭିନ୍ନ ମାମଲାରେ ଗାଡ଼ିଗୁଡିକ ଜବତ କରାଯାଇଥିଲା । ସମସ୍ତ ଆଇନଗତ ପକ୍ରିୟା ଶେଷ ହେବା ପରେ ବନ ବିଭାଗ ପକ୍ଷରୁ ୨୦ରୁ ଉର୍ଦ୍ଧ୍ବ ଗାଡ଼ିକୁ ବାଜ୍ୟାପ୍ତି ଘୋଷଣା କରାଯାଇଛି । ହେଲେ ଗାଡ଼ିଗୁଡିକ ବର୍ଷ ବର୍ଷ ଧରି ସେହି ଅଫିସ୍ ପରିସରରେ ପଡିରହିଛି । ଯାହା ଫଳରେ ଅଫିସ୍ ପରିସର ଜଙ୍ଗଲ ସୃଷ୍ଟି ହୋଇଥିବା ବେଳେ ଗାଡ଼ିଗୁଡିକ ସମ୍ପୂର୍ଣ୍ଣ ଭାଙ୍ଗିରୁଜି ଗଲାଣି ।

ବନ ବିଭାଗ ପକ୍ଷରୁ ଜବତ ଗାଡ଼ିଗୁଡିକୁ ବାଜ୍ୟାପ୍ତି ଘୋଷଣା କରାଯାଇଛି । ଗାଡ଼ି ଗୁଡିକର ମୂଲ୍ୟାୟନ କରାଯିବା ପାଇଁ ପରିବହନ ବିଭାଗକୁ ବାରମ୍ବାର ଚିଠି କରାଯାଇଥିଲେ ସୁଦ୍ଧା ଏ ପର୍ଯ୍ୟନ୍ତ ପରିବହନ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନି । ଯାହା ଫଳରେ ଗାଡ଼ି ଗୁଡିକର ନିଲାମ କରାଯାଇ ପାରୁନାହିଁ । ଯେଉଁଥି ପାଇଁ ସରକାରଙ୍କ ରାଜସ୍ବ ମଧ୍ୟ ହାନି ମଧ୍ୟ ହେଉଛି ।

କେବଳ ବଇରୀ ରେଞ୍ଜ ଅଫିସ୍ ପରିସର ନୁହେଁ ଚଣ୍ଡିଖୋଲ ସ୍ଥିତ ବନ ବିଭାଗ ଅଫିସ୍ ପରିସରରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି । ଅଫିସ୍ ପରିସରରେ ମାଳ ମାଳ ଗାଡ଼ି ପଡି ରହିଛି । ପରିବହନ ବିଭାଗର ଉଦାସୀନତା ପାଇଁ ଗାଡ଼ିଗୁଡିକ ଏହିଭଳି ପଡି ରହୁଛି । ଏ ନେଇ ପରିବହନ ବିଭାଗକୁ ଅବଗତ କରାଯାଇଥିବା ରେଞ୍ଜର କହିଥିବା ବେଳେ ଚଣ୍ଡିଖୋଲ ଆରଟିଓ ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ।