ଶ୍ରୀକ୍ଷେତ୍ରରେ ନିଆରା ଦୃଶ୍ୟ, ବଡବଡୁଆ ଡାକି କାଉଁରିଆ କାଠି ଜାଳିଲେ ବିଦେଶୀ ପର୍ଯ୍ୟଟକ

Published By : Prameya-News7 Bureau | November 12, 2023 IST

ପୁରୀ ୧୨।୧୧ : ଶ୍ରୀକ୍ଷେତ୍ରରେ ନିଆରା ଦୃଶ୍ୟ। ଶ୍ରୀମନ୍ଦିର ସିଂହଦ୍ୱାର ନିକଟରେ ବଡବଡୁଆ ଡାକି କାଉଁରିଆ କାଠି ଜାଳିଲେ ବିଦେଶୀ ପର୍ଯ୍ୟଟକ। ଯାହାକି ବେଶ୍ ଚର୍ଚ୍ଚାର ବିଷୟ ହୋଇଥିବା ବେଳେ ଭାରତୀୟ ସଂସ୍କୃତି ପ୍ରତି ସାରା ବିଶ୍ଵରେ କିଭଳି ଆଦର ବଢ଼ୁଛି ତାହା ଏକ ପ୍ରକାର ପ୍ରମାଣ ହୋଇଛି।

ତେବେ ଆଜି ପୟାଶ୍ରାଦ୍ଧ ଅବସରରେ ହଜାର ହଜାର ଭକ୍ତ ନିଜ ପିତୃପୁରୁଷଙ୍କ ଉଦ୍ଦେଶ୍ୟରେ ଶ୍ରାଦ୍ଧ ଦେବା ସହ କାଉଁରିଆ କାଠି ଜାଳି ବଡବଡୁଆ ଡାକିଛନ୍ତି। ଏହି ଦୃଶ୍ୟ ଦେଖି ବିଦେଶୀ ପର୍ଯ୍ୟଟକ ଜଣକ ବେଶ୍ ଖୁସି ହୋଇଥିଲେ। ପୟାଶ୍ରାଦ୍ଧ ଓ ବଡବଡୁଆ ଡାକିବା ପରମ୍ପରା ବିଷୟରେ ଜଣେ ସେବାୟତଙ୍କୁ ପଚାରି ବୁଝିଥିଲେ। ସେବାୟତ ଜଣକ ଏହି ପରମ୍ପରା ବିଷୟରେ କହିବା ପରେ ବିଦେଶୀ ପର୍ଯ୍ୟଟକ ଜଣଙ୍କ ବେଶ୍ ଖୁସି ହୋଇଥିଲେ। ନିଜ ପୂର୍ବଜଙ୍କୁ ହିନ୍ଦୁ ଧର୍ମ ଲୋକ ପୟାଶ୍ରାଦ୍ଧରେ ଯେଭଳି ସମ୍ମାନ ଦେଉଛନ୍ତି ତାକୁ ସେ ଉଚ୍ଚ ପ୍ରଶଂସା କରିଥିଲେ।

ଭାରତୀୟ ପରମ୍ପରାକୁ ସେ ବହୁତ୍ ପସନ୍ଦ କରିଥିଲେ। ପରେ ସେ ସେବାୟତଙ୍କ ସହଯୋଗରେ କାଉଁରିଆ କାଠି ନେଇ ନିଜ ପିତୃପୁରୁଷଙ୍କ ଉଦ୍ଦେଶ୍ୟରେ କାଉଁରିଆ କାଠି ଜାଳି ବଡବଡୁଆ ଡାକିଥିଲେ। ତେବେ ଆଧୁନିକତା ଆଳରେ ଆମେ ଆମର ପୁର୍ବ ପ୍ରଥା ଭୁଲିଯିବାକୁ ବସିଥିବା ବେଳେ ଜଣେ ବିଦେଶୀ ଆମ ସଂସ୍କୃତିକୁ ପସନ୍ଦ କରି ନିଜ ପିତୃପୁରୁଷଙ୍କ ଉଦ୍ଦେଶ୍ୟରେ ବଡବଡୁଆ ଡାକିବା ଆମ ସମସ୍ତଙ୍କୁ ସଚେତନ କରାଇଛି। ଆମେ ଯେତେ ଆଧୁନିକ ହେଲେ ମଧ୍ୟ ଆମ ପରମ୍ପରା, ସଂସ୍କୃତିକୁ ବଜାୟ ରଖିବା ଉଚିତ୍ ବୋଲି ବିଦେଶୀ ପର୍ଯ୍ୟଟକ ଜଣଙ୍କ ବାର୍ତ୍ତା ଦେଇଛନ୍ତି।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.